​ក្រុមហ៊ុនធំមួយរបស់ចិន​ចរចារទិញគ្រាប់ស្វាយចន្ទី ​២០ ម៉ឺនតោន​ពីកម្ពុជា​

​ក្រុមហ៊ុនធំមួយរបស់ចិនដែលមានមូលដ្ឋាននៅខេត្តក្វាងស៊ី​នៅថ្ងៃទី ​២០ ខែឧសភា ​ឆ្នាំ ២០២៤ ​បាន​មកជួបសមាគមស្វាយចន្ទីកម្ពុជា ​ដើម្បីចរចារទិញគ្រាប់ស្វាយចន្ទីស្ងួតចំនួន ២០ ម៉ឺនតោន សម្រាប់​ឆ្នាំ ២០២៥។​

​លោក ស៊ុយ កុកធាន ​អនុប្រធានសមាគមស្វាយចន្ទីកម្ពុជា ​ប្រាប់កម្ពុជាថ្មីនៅថ្ងៃទី ២១ ខែឧសភានេះថា ក្រុមហ៊ុនចង់ទិញ​ពី​កម្ពុជា​សម្រាប់ផ្គត់ផ្គង់នៅក្នុងខេត្តក្វាងស៊ី ​ខណៈក្រុមប្រឹក្សាភិបាលរបស់ក្រុមហ៊ុន និងក្រុមការងារ​សមា​គម​ត្រៀមចរចារមួយជំហានទៀត ​ដើម្បីសម្រេចនីតិវិធីលើការដឹកជញ្ជូន ​និងចុះកុងត្រា។

បើតាមលោក ស៊ុយ កុកធាន៖ «បើយើងដល់ការចុះកុងត្រាជាមួយគ្នាថា តើត្រូវទិញកន្លែងណា! ហើយគុណភាពយ៉ាងម៉េច យើងត្រូវជជែកលម្អិត»។

​ចំពោះលក្ខខណ្ឌតម្លៃលោកបញ្ជាក់ថា ​ធ្វើឡើងទៅតាមទីផ្សារ ខណៈបច្ចុប្បន្នចន្ទីមានតម្លៃ​ប្រមាណ​ជាង ១ ពាន់ ៦០០ ដុល្លារ ​ក្នុងមួយតោន ខណៈភាគីក្រុមហ៊ុនបានដឹងពីគុណ​ភាពចន្ទីកម្ពុជា​រួចហើយ។

សមាគមស្វាយចន្ទីកម្ពុជាបានឱ្យដឹងថា តម្លៃគ្រាប់ស្វាយចន្ទីសើមបានហក់ឡើងខ្ពស់មិនធ្លាប់​មានក្នុងរយៈ​ពេល១៥ឆ្នាំ ដោយមួយគីឡូមានតម្លៃប្រមាណ៥០០០រៀល បន្ទាប់ពីធ្លាក់​ចុះជា​ច្រើនខែ។ ​

ការកើនឡើងនេះ ​ដោយសារ​កាល​ពីដើមខែកុម្ភៈ ខណៈតម្លៃចន្ទីកំពុងដាំក្បាលចុះ ​សមាគមបានអំពាវ​នាវឱ្យ​សមាជិកដែល​មាន​លទ្ធភាពហាល​គ្រាប់ចន្ទីទុក ដោយកុំលក់​ប្រជែងជាមួយកសិករ ​ដើម្បីកុំឱ្យឈ្មួញបរទេស​ឆ្លៀតឱកាសទម្លាក់ថ្លៃ។

កាលពីដើមឆ្នាំ ២០២៤​ តម្លៃគ្រាប់សើម ប្រជាកសិករអាចលក់បានចន្លោះពី៣៥០០រៀល​ ទៅ៤០០០រៀលប៉ុណ្ណោះក្នុងមួយគីឡូ។

យោងតាមទិន្នន័យពីសមាគមស្វាយចន្ទីកម្ពុជានៅក្នុងត្រីមាសទី១ ឆ្នាំ ២០២៤ ​កម្ពុជាផលិតគ្រាប់ស្វាយចន្ទីឆៅជាង ៤០ ម៉ឺនតោន (៤៧៤ ០០០) ក្នុងនោះនាំចេញទៅវៀតណាមចំនួន ៤២ម៉ឺន ៤ ពាន់តោន ​គិតជាទឹកប្រាក់ ​៥៤៣ លានដុល្លារ ​កើនឡើង ១៣% បើធៀបនឹងរយៈពេលដូចគ្នានៅឆ្នាំ ២០២៣។

នៅក្នុងឆ្នាំ២០២៣ កម្ពុជាបាននាំចេញគ្រាប់ស្វាយចន្ទីទៅកាន់ទីផ្សារអន្តរជាតិចំនួនជាង៦៥ម៉ឺនតោន ទទួលបានចំណូល​៨៣៧លានដុល្លារ ថយចុះជិត១០%​ធៀបនឹងឆ្នាំ២០២២៕

អត្ថបទ៖ ឡេង ដេត