ព័ត៌មានជាតិ

គ្រឹះស្ថានបណ្ដុះបណ្ដាលបច្ចេកទេស ១១ បន្ថែមទៀតរបស់ក្រសួងការងារ ធ្វើតេស្តបញ្ជាក់សមត្ថភាពសិក្ខាកាមកម្រិតសញ្ញាបត្របច្ចេកទេស និងវិជ្ជាជីវៈ ១(C1)

បានផុស

១០ ខែ មុន

នៅ

ថ្ងៃអង្គារ ២១ ឧសភា ២០២៤

ដោយ

គ្រឹះស្ថានបណ្ដុះបណ្ដាលបច្ចេកទេសទូទាំងប្រទេសចំនួន ១១ ទៀត របស់សួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ២០ ខែឧសភា ឆ្នាំ ២០២៤ បានធ្វើតេស្តបញ្ជាក់សមត្ថភាពសិក្ខាកាមកម្រិតសញ្ញាបត្របច្ចេកទេស និងវិជ្ជាជីវៈ ១(C1) បន្ទាប់ពីបើកបវេសនកាល នៅថ្ងៃទី ១៥ ខែមករា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្វើតេស្តបញ្ជាក់សមត្ថភាពនេះ ដើម្បីវាយតម្លៃបញ្ជាក់សមត្ថភាពដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ ដែលជាកម្មវិធីថ្នាក់ជាតិរបស់រាជរដ្ឋាភិបាលកម្ពុជា មុនឈានជើងចូលទីផ្សារ។

គ្រឹះស្ថានទាំង ១១ នោះ រួមមាន ៖ វិទ្យាស្ថានជាតិសហគ្រិនភាព និងនវានុវត្តន៍ វិទ្យាស្ថានពហុបច្ចេកទេសព្រះកុសុមៈ វិទ្យាស្ថានជាតិវិជ្ជាជីវៈបាត់ដំបងជាដើម ដែលបានបណ្ដុះបណ្ដាលសិក្ខាកាមលើវេនសិក្សាថ្ងៃចន្ទ-សុក្រ ពេញមួយថ្ងៃ។

លោក តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ បានគូសបញ្ជាក់ថា កាលពីថ្ងៃទី ២០ ខែឧសភា វិទ្យាស្ថាន បានប្រឡងបញ្ជាក់សមត្ថភាពដល់សិក្ខាកាមសរុប ១៩២ នាក់ លើជំនាញ ៧ មុខ ដូចជា ជំនាញធុរកិច្ច ,ភេសជ្ជៈ ,ម្ហូបអាហារ ,ការផលិតនំ ,អគ្គិសនី ,ម៉ាស៊ីនត្រជាក់ និងសម្អាងកាយ។

លោកបញ្ជាក់បន្ថែមថា «ក្រោយពីបណ្ដុះបណ្ដាលរយៈពេល ៤ ខែ មកនេះ ខ្ញុំ ឃើញសមត្ថភាពរបស់ពួកគាត់ពិតជាមានសមត្ថភាពអាចធ្វើបាន ជាពិសេសនៅពេលដែលបញ្ចប់ ពួកគាត់អាចទៅបើកអាជីវកម្មខ្នាតតូចសម្រាប់ខ្លួនឯងផ្ទាល់ និងមួយចំនួនទៀតអាចទៅធ្វើការនៅក្រុមហ៊ុន ឬរោងចក្រ សហគ្រាសនានា»។

បើតាម លោក តាន់ កុសល បច្ចុប្បន្នមិនថាធ្វើការនៅតាមក្រុមហ៊ុន និងសហគ្រាសនានា ឬបើកអាជីវកម្មខ្លួនឯងក៏ដោយ គឺសុទ្ធតែត្រូវការជំនាញ។

ទន្ទឹមនឹងនេះ លោក តាន់ កុសល ក៏បានអំពាវនាវដល់យុវជនដែលមិនទាន់មានជំនាញទាំងអស់ បន្តចុះឈ្មោះចូលរៀនវគ្គបណ្ដុះបណ្ដាលវិជ្ជាជីវៈនៅទូទាំងប្រទេសដោយឥតគិតថ្លៃ និងទទួលបានប្រាក់ឧបត្ថម្ភចំនួន ២៨ ម៉ឺនរៀល ប្រសិនមានបណ្ណសមធម៌ ដើម្បីមានជំនាញមួយពិតប្រាកដ និងមានប្រាក់ចំណូលសមរម្យ ដើម្បីខ្លួនឯង និងសង្គមជាតិ។

សូមបញ្ជាក់ថា គ្រឹះស្ថានចំនួន ៣៥ ក្នុងចំណោម ៣៧ នៃក្រសួងការងារ និងបណ្ដុះបណ្ដាលវិជ្ជាជីវៈ ដែលបានបណ្ដុះបណ្ដាលវេនសិក្សាថ្ងៃចន្ទ-សុក្រ ពេញមួយថ្ងៃ បានធ្វើតេស្តបញ្ជាក់សមត្ថភាពសិក្ខាកាមប្រមាណជិត ៤ ពាន់នាក់ ដោយបែងចែកជា ៣ លើក។ នៅថ្ងៃទី ២០ ខែឧសភា គឺជាការធ្វើតេស្តលើកទី ២ បន្ទាប់ពីវិទ្យាស្ថានចំនួន ១៤ ធ្វើតេស្តលើកទី ១ កាលពីថ្ងៃទី ១៥ ខែឧសភា កន្លងទៅ ខណៈគ្រឹះស្ថាន ១០ ផ្សេងទៀត នឹងធ្វើតេស្តបញ្ជាក់សមត្ថភាពសិក្ខាកាមនាថ្ងៃទី ២៧ ខែឧសភា ឆ្នាំ ២០២៤ ខាងមុខ៕