ព័ត៌មានជាតិ

រោងចក្រកែច្នៃគ្រាប់ស្វាយចន្ទីតម្លៃ ១២ លានដុល្លារសម្រេចការសាងសង់បាន ៧០ ភាគរយ

បានផុស

១០ ខែ មុន

នៅ

ថ្ងៃអង្គារ ២១ ឧសភា ២០២៤

ដោយ

គម្រោងសាងសង់រោងចក្រកែច្នៃគ្រាប់ស្វាយចន្ទី CSNC នៅខេត្តកំពង់ធំសម្រេចការសាងសង់បាន ៧០ ភាគរយ និងគ្រោងដាក់ឱ្យដំណើរការនៅដើមឆ្នាំ ២០២៥ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន CSNC Agriculture Co.,Ltd ជាក្រុមហ៊ុនមកពីប្រទេសសឹង្ហបុរី បានបើកការដ្ឋានសាងសង់រោងចក្រកែច្នៃគ្រាប់ស្វាយចន្ទីជាមួយទុនវិនិយោគតម្លៃ១២ លានដុល្លារ ស្ថិតនៅភូមិស្នោ ឃុំត្រពាំងប្ញស្សី ស្រុកកំពង់ស្វាយ ខេត្តកំពង់ធំ កាលពីថ្ងៃទី ០៦ ខែធ្នូ ឆ្នាំ ២០២៣។

លោក ស៊ុយ កុកធាន អនុប្រធានសមាគមស្វាយចន្ទីកម្ពុជា មានប្រសាសន៍ថា រោងចក្រ CSNC Agriculture សម្រេចបានការសាងសង់បាន ៧០ ភាគរយ ដោយបានដំឡើងដំបូលរួចអស់ហើយ នៅតែចាក់សាប និងបាំងជញ្ជាំង។

រោងចក្រនេះ សាងសង់នៅលើផ្ទៃដីសរុប ១៤ ហិកតា ដោយមានផ្ទៃដីចាក់សាបទំហំ ៦ ហិកតា និងឃ្លាំងស្តុក មួយចំនួន ដែលមានសមត្ថភាពកែច្នៃ ៤០ តោនក្នុង ១ ថ្ងៃ ដែលត្រូវការកម្លាំងពលកម្មជិត ២០០ នាក់។

សូមជំរាបថា ក្រៅពីក្រុមហ៊ុនសិង្ហបុរី ក៏មានក្រុមហ៊ុនដ៏ធំមួយរបស់ជប៉ុន MIRATH Agri Tech ក៏បានបោះទុនវិនិយោគបើករោងចក្រកែច្នៃគ្រាប់ស្វាយចន្ទី ដែលរោងចក្រនេះមានសមត្ថភាពផលិតបាន ២០ តោន ក្នុង១ ថ្ងៃ។

សមាគមស្វាយចន្ទីកម្ពុជាបានឱ្យដឹងថា បើកបូកនឹងរោងចក្រ CSNC និង MIRATH Agri Tech កម្ពុជាមាន ៥រោងចក្រធុនមធ្យមនាពេលអនាគត ប៉ុន្តែកម្ពុជាត្រូវការរោងចក្រប្រភេទធុនមធ្យមនេះ ៣០ ដើម្បីស្ថិរភាពទីផ្សារស្វាយចន្ទីរបស់កម្ពុជា។

បច្ចុប្បន្ននេះ ផ្ទៃដីដែលបានដាំដំណាំស្វាយចន្ទីសរុបប្រមាណ ៧០ ម៉ឺនហិកតា ក្នុងនោះខេត្តកំពង់ធំ បានដាំដុះដំណាំស្វាយចន្ទីច្រើនជាងគេនៅក្នុងប្រទេសកម្ពុជា សរុបមានចំនួនជាង ១៥០ ពាន់ហិកតា។ បច្ចុប្បន្ននេះ កម្ពុជាបាននាំគ្រាប់ស្វាយចន្ទីឆៅ ចេញក្រៅប្រទេសប្រមាណជាង ៩០ភាគរយ ក្នុងតម្លៃទាប៕

អត្ថបទ៖ ឡេង ដេត