ស្ពាន​ឆ្លង​ទន្លេពី​ដីឥដ្ឋ​ ភ្ជាប់​ទៅ​​ផ្លូវល្បឿន​លឿនភ្នំពេញបាវិត បន្ត​វឌ្ឍនភាព​តាម​ការ​​គ្រោង​ទុក

នៅព្រឹកមិញនេះ មន្រ្តី​ជាន់ខ្ពស់ក្រសួង​សាធារណការ​និង​ដឹកជញ្ជូន បាន​បើក​កិច្ចប្រជុំពិភាក្សាពាក់ព័ន្ធនឹងគម្រោង​សាងសង់​​ស្ពាន (ដីឥដ្ឋ-ថ្មគរ) ចំណុចតភ្ជាប់ផ្លូវក្រវាត់ក្រុងទី ៣ និងផ្លូវល្បឿនលឿនភ្នំពេញ-បាវិត។ កិច្ចប្រជុំក៏​មានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ និងមន្ត្រីជំនាញពាក់ព័ន្ធផ្សេងទៀត។

កិច្ចប្រជុំ​ដែលដឹកនាំ​ដោយ​លោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគ្រប់គ្រងគម្រោង ដើម្បីពិនិត្យ​ការអនុវត្តការងារជាអាទិភាពមួយចំនួន សំដៅជំរុញ​ឱ្យ​គម្រោង​សាងសង់ហេដ្ឋារចនាសម្ព័ន្ធស្ពាន (ដីឥដ្ឋ-ថ្មគរ) ដំណើរការ​ទៅដោយរលូន។

ប្រាប់​កម្ពុជា​ថ្មី​នៅ​រសៀលនេះ​ លោក ផន រឹម មន្រ្តី​អ្នកនាំពាក្យ​ក្រសួង​សាធារណការ​និង​ដឹកជញ្ជូន​បាន​ឲ្យ​ដឹងថា កិច្ចប្រជុំនេះ​ត្រូវបាន​ធ្វើឡើងជាទៀងទាត់ ដើម្បីពិនិត្យវឌ្ឍនភាពនិង​ដោះស្រាយ​បញ្ហា​ប្រឈមនានា។

ទាក់ទង​លទ្ធផល​ជុំវិញ​គម្រោង​​សាងសង់ស្ពានឆ្លង​ទន្លេ​ (ដីឥដ្ឋ-ថ្មគរ) លោក ផន រឹម​ បាន​បញ្ជាក់ថា ​ដំណើរការ​​ស្រប​តាមគោលការណ៍​ណែនាំ​ពី​ថ្នាក់ដឹកនាំ និង​ស្របតាម​ប្រតិទិន​ការងារ​ដែល​បាន​គ្រោង​ទុក។

យ៉ាងណាមិញ មន្រ្តី​ក្រសួង​សាធារណការ​រូប​នេះ​មិនបានបង្ហាញ​លទ្ធផលជាក់ស្តែង​បន្ថែម​លើការដ្ឋាន​សាងសង់​ស្ពានដ៏​សំខាន់នេះ ដែលជាចំណុចតភ្ជាប់ពីផ្លូវក្រវាត់ក្រុងទី៣ និង​​ផ្លូវល្បឿនលឿនភ្នំពេញ-បាវិត។

នៅ​ក្នុង​សន្និសីទ​ជាមួយក្លឹបអ្នកកាសែត​កម្ពុជាស្តីពី «ស្ថានភាព​វិនិយោគ​នៅកម្ពុជា និង​វឌ្ឍនភាព​​គម្រោងព្រែកជីក​ហ្វ៊ូណន​តេជោ»​ កាល​ពី​ថ្ងៃទី ៧ ខែឧសភា លោក ស៊ុន ចាន់ថុល ឧបនាយករដ្ឋមន្ត្រី អនុ​ប្រធាន​ក្រុម​ប្រឹក្សា​អភិវឌ្ឍន៍​កម្ពុជា​បាន​​ឆ្លើយតប​ទៅ​សំនួរ​របស់​កម្ពុជា​ថ្មី​ថា ស្ពាន​ឆ្លង​ទន្លេ​នៅ​ដី​ឥដ្ឋ​តភ្ជាប់​ទៅ​ផ្លូវ​ល្បឿនលឿនភ្នំពេញ​បាវិត​ ដែលដំបូង​ឡើង​គ្រោង​ប្រើប្រាស់​ថវិកា​ជាតិយកមក​សាងសង់ ប៉ុន្តែ​ក៏​មាន​ការ​កែសម្រួល​​ខ្លះៗ​ដោយ​បង្វែរ​យក​ប្រាក់​សន្សំ​ពី​​ដៃគូ​អភិវឌ្ឍ​​ដើម្បី​យក​មក​សាងសង់​ស្ពាន​នេះវិញ។

លោក​ ស៊ុន ចាន់ថុល​ បានលើកឡើង​ថា ក្រោយ​បើក​ការដ្ឋានសាងសង់​មានការ​យឺត​យ៉ាវ​ខ្លះ ​ប៉ុន្តែ​គ​ម្រោង​នៅ​តែ​បន្ត​ទៅមុខ​អត់មាន​ឈប់​នោះ​ទេ។

ក្នុង​ឱកាស​​បើក​ការដ្ឋាន​សាងសង់​គម្រោង​ផ្លូវ​ល្បឿន​លឿន​ភ្នំពេញ​បាវិត សម្តេច​តេជោ ហ៊ុន សែន អតីត​នាយករដ្ឋមន្ត្រី​កម្ពុជា​បាន​គូស​បញ្ជាក់​ថា រដ្ឋាភិបាល​នឹង​ប្រើប្រាស់​ថវិកា​ជាតិ​សាងសង់​ស្ពាន​ឆ្លង​ទន្លេ​ពី​ដី​ឥដ្ឋ​តភ្ជាប់​ទៅ​គម្រោង​ផ្លូវ​ល្បឿន​លឿន​​ភ្នំពេញ​បាវិត​។

បើតាម​ប្រមុខ​ដឹកនាំ​កម្ពុជា គម្រោងដើមដំបូងដំណើរការ​ការសាងសង់ផ្លូវល្បឿនលឿនភ្នំពេញ-បាវិត ត្រូវ​ភ្ជាប់ជាមួយការ​សាងសង់ស្ពានឆ្លង​ទន្លេមេគង្គក្រោម (កៀនស្វាយ-ល្វាឯម) ដោយតម្រូវឱ្យពលរដ្ឋ​ត្រូវបង់ថ្លៃ​ធ្វើ​ដំណើរ​ទាំងនៅលើ​ស្ពានទាំងផ្លូវ ប៉ុន្តែដោយសារ​គិតគូរដល់ជីវភាព​ប្រជាពលរដ្ឋ រាជរដ្ឋាភិបាលក៏បានបញ្ចេញថវិកាជាតិ​ប្រមាណ ២៣០ លានដុល្លារ ចេញថ្លៃសាងសង់ស្ពាន ដើម្បី​ឱ្យប្រជាពលរដ្ឋអាច​ធ្វើ​ដំណើរ​ឆ្លងកាត់ដោយមិនចាំបាច់បង់ថ្លៃឆ្លងស្ពាននោះឡើយ។

«បើ​ឲ្យ​ក្រុមហ៊ុន​ទទួល​បន្ទុក​ចំណាយ​សាងសង់​ទាំង​ផ្លូវ​និង​ស្ពាន គឺ​​ពលរដ្ឋ​ត្រូវ​បង់​ថ្លៃ​ធ្វើ​ដំណើរ​ទាំង​ប្រើប្រាស់​ផ្លូវ​និង​ស្ពាន។ អីចឹង​រដ្ឋាភិបាល​សុខចិត្ត​បញ្ចេញ​ប្រាក់​វិនិយោគ​សាងសង់​ស្ពាន​ដោយ​ខ្លួនឯង បញ្ចៀស​ការ​យក​លុយ​ពីពលរដ្ឋ​ក្នុង​ការ​ធ្វើ​ដំណើរ​ឆ្លងកាត់​ស្ពាន»។ សម្តេច​បញ្ជាក់។

ថ្លែង​នៅ​ចំពោះមុខ​ពលរដ្ឋ​និង​ក្រុមហ៊ុន​សាងសង់ សម្ដេចតេជោ ហ៊ុន សែន ក៏បានណែនាំដល់ក្រុមហ៊ុនដែលទទួល​បន្ទុក​សាងសង់ស្ពាន និងផ្លូវល្បឿនលឿនត្រូវតែ​សាង​សង់ឱ្យរួចដំណាល​គ្នា ហើយប្រសិនបើស្ពានសាងសង់រួចមុនគឺកាន់តែល្អព្រោះប្រជាជននឹងឆាប់បានធ្វើដំណើរឆ្លងកាត់ដោយមិនចាំបាច់ឆ្លងទូកដរដូចមុនទៀត៕