ប្រធានសមាគមសិល្បករខ្មែរ អ្នកឧកញ៉ា ម៉ៅ ចំណាន អញ្ជើញសួរសុខទុក្ខភរិយាអធិរាជសំឡេងមាស

នៅរសៀលថ្ងៃទី​២១ ខែឧសភា​ ឆ្នាំ២០២៤​ នេះ​ អ្នកឧកញ៉ា​ ម៉ៅ​ ចំណាន​ បានដឹកនាំក្រមការងារអញ្ជេីញទៅសួរសុខទុក្ខលោកយាយ ខាវ ថងញ៉ុត ភរិយារបស់អធិរាជសំឡេងមាស ស៊ីន ស៊ីសាមុត ដែលកំពុងមានជំងឺប្រចាំកាយជាច្រើនមុខជាពិសេសបញ្ហាឆ្អឹងខ្នងដែលធ្វើឱ្យលោកយាយមិនអាចដើរ ឬអង្គុយបាន ដោយកំពុងសម្រាកនៅផ្ទះកូនក្មួយនៅរាជធានីភ្នំពេញរង់ចាំការព្យាបាលបន្ត។ នេះបើតាមសំណេរនៅលើទំព័រហ្វេសប៊ុកសមាគមសិល្បករខ្មែរ។

តាមសំណេរដដែល បានឱ្យដឹងថា លោកស្រីប្រធានសមាគមសិល្បករខ្មែរ បានសាកសួរអំពីអាការៈរបស់លោកយាយ ខាវ ថងញ៉ុត ប្រកបដោយការព្រួយបារម្ភ ព្រមទាំងបានរិះរកមធ្យោបាយផ្សេងៗដើម្បីសម្រាលបន្ទុកចំណាយរបស់លោកយាយ ដែលបច្ចុប្បន្នមានវ័យរហូតដល់៨៥ឆ្នាំទៅហើយ និងកំពុងរស់តែពីរនាក់កូនស្រី។

ជាមួយគ្នានោះ លោកស្រីក៏បាននាំយកនូវថវិការបស់សមាគមសិល្បករខ្មែរ​ និងថវិការបស់លោកស្រីផ្ទាល់ប្រគល់ជូនដល់លោកយាយ ខាវ ថងញ៉ុត​ ដេីម្បីសម្រាលបន្ទុកចំណាយមួយផ្នែក និងដោយមើលឃើញថា ភរិយារបស់អធិរាជសំឡេងមាសជាអ្នកមានសទ្ធារក្សាសីលជាប្រចាំ លោកស្រីក៏ជូននូវថវិកាដោយឡែកសម្រាប់ធ្វើបុណ្យទានផងដែរ។

តាមសំណេរដដែល ភរិយាលោក ស៊ីន ស៊ីសាមុត បានស្រក់ទឹកភ្នែក ពេលដែលបានឃើញប្រធានសមាគមសិល្បករខ្មែរ មកសាកសួរសុខទុក្ខ។ ភរិយាលោក ស៊ីន ស៊ីសាមុត ក៏បានជូនពរចំពោះលោកស្រីប្រធានសមាគមសិល្បករខ្មែរ ព្រមទាំងសហការី ដែលបានយកចិត្តទុកដាក់ចំពោះការសុខទុក្ខនាពេលនេះ៕