ព័ត៌មានជាតិ

សម្តេចតេជោ បង្ហើបថាមានបរទេសញុះញង់ឱ្យធ្វើរដ្ឋប្រហារទើបនាំឱ្យមានអំពើប្រល័យពូជសាសន៍នៅកម្ពុជា

បានផុស

៤ ខែ មុន

នៅ

ថ្ងៃពុធ ២២ ឧសភា ២០២៤

ដោយ

នាពិធីបិទសន្និសីទស្ដីពី « អនាគតកម្ពុជាគ្មានអំពើប្រល័យពូជសាសន៍ » នៅថ្ងៃទី២២ ខែឧសភានេះ ប្រធានព្រឹទ្ធសភា និងជាអតីតនាយករដ្ឋមន្រ្តីកម្ពុជាសម្តេចតេជោ ហ៊ុន សែន បានថ្លែងថា ការធ្វើរដ្ឋប្រហារនៅកម្ពុជា ដែលនាំមានអំពើប្រល័យពូជសាសន៍ គឺមានការញុះញង់ពីសំណាក់បរទេសដែលធ្វើឱ្យខ្មែរបែកបាក់គ្នា។
សម្តេចបានលើកយកទិដ្ឋភាពថា៖«មុននេះប្រទេសមហាអំណាចខ្លះបានលើកកងទ័ពចូលទៅប្រទេសនេះឬប្រទេសនោះអាហ្នឹងរឿងម្ខាង។ ប៉ុន្តែអ្វីដែលគ្រោះថ្នាក់សម្រាប់ប្រទេស ឧទាហរណ៍ដូចកម្ពុជា កម្ពុជាមានការធ្វើរដ្ឋប្រហារទម្លាក់សម្តេចព្រះនរោត្តម សីហនុ សូមកុំភ្លេចបើគ្មានរដ្ឋប្រហារ ១៨ មីនា១៩៧០ ទេ គឺគ្មានអំពើប្រល័យពូជសាសន៍កើតឡើងទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនឹងបទពិសោធន៍ដ៏ជូរចត់របស់ខ្មែរដែលមានការញុះញង់ពីសំណាក់បរទេស សម្តេចតេជោ ថ្លែងទៀតថា៖«ពេលមុនគេនិយមធ្វើរដ្ឋប្រហារ បរទេសញុះញង់ឱ្យធ្វើ ឥឡូវនេះគេមិនធ្វើរដ្ឋប្រហារទេតែគេធ្វើបដិវត្តន៍ពណ៌តែម្តង អ៊ីចឹង!បើឃើញមានការធ្វើបដិវត្តន៍ពណ៌ដាក់វាទៅ ព្រោះនេះនាំដល់អំពើប្រល័យពូជសាសន៍ទៀតហើយនាំដល់សង្គ្រាម»។

បើតាមសម្តេចតេជោ អះអាងថា នៅកម្ពុជាមានការប៉ុនប៉ងឆ្នាំ២០១៣ម្តង ប៉ុន្តែសម្តេច បានរកឃើញគន្លឹះរបស់វា ពោលគន្លឹះបដិវត្តន៍ពណ៌ឋិតនៅលើចំណុចអព្យាក្រឹត្យកម្លាំងប្រដាប់អាវុធ និងរដ្ឋបាលស៊ីវិល។
ត្រង់ចំណុចនេះ សម្តេចផ្តាំដល់មេបញ្ជាការកងទ័ពជើងគោក រដ្ឋមន្រ្តីក្រសួងការពារជាតិ អគ្គបញ្ជាការ មេប៉ូលិស ត្រូវចាំឱ្យច្បាស់ថា អព្យាក្រឹត្យបានតែចំពោះមុខរវាងបក្សនិងបក្សទេ ពោលបើយើងការពារឱ្យបក្សនយោបាយណាមួយត្រូវការពារនយោបាយបក្សដទៃដូចគ្នា។ ប៉ុន្តែរវាងបក្សនយោបាយ ជាមួយរដ្ឋាភិបាលអត់មានអព្យាក្រឹត្យទេ ពោលបើមានបក្សណាចង់ផ្តួលរំលំរដ្ឋាភិបាល ត្រូវតែកម្ចាត់ចោល ដើម្បីការពារប្រជាជន ១៧ លាននាក់។

សម្តេចតេជោ ផ្តល់ដំបូលន្មានថា៖«មធ្យោបាយដើម្បីការពារកុំឱ្យមានរបបប្រល័យពូជសាសន៍ ដំបូងបំផុតត្រូវការពារសន្តិភាពឱ្យបាន បើការពារសន្តិភាពបានហើយមិនចាំបាច់ព្រួយបារម្ភរឿងអំពើមានប្រល័យពូជសាសន៍ទេ»៕

អត្ថបទ៖ ឡាយ សាមាន