សម្តេចតេជោ ផ្តាំទៅប្រទេសមហាអំណាចថា កម្ពុជាសុំតែសុខទេ កុំដាក់សម្ពាធមកកម្ពុជាទៀតអី

ប្រធានព្រឹទ្ធសភាកម្ពុជា សម្តេចតេជោ ហ៊ុន សែន ថ្លែងចំអកទៅកាន់ប្រទេសមហាអំណាចមួយចំនួន ដែលតាំងខ្លួនជាអ្នកប្រជាធិបតេយ្យ និងការគោរពសិទ្ធិមនុស្ស ប៉ុន្តែគាំទ្រការធ្វើរដ្ឋប្រហារ ហើយ​គាប​សង្កត់មកលើប្រទសតូចតាច តួយ៉ាងដាក់សម្ពាធមកលើកម្ពុជាជាដើម។

នាពិធីបិទសន្និសីទស្ដីពី « អនាគតកម្ពុជាគ្មានអំពើប្រល័យពូជសាសន៍ » នៅថ្ងៃទី​២២​​​ ខែឧសភានេះ សម្តេចតេជោ ថ្លែងថាប្រទេសធំៗមួយចំនួនអាងតែខ្លួនមានអំណាចធ្វើបាបប្រទេសតូចតាច និងតែងតែអនុវត្តស្តង់ដាច្រើន និងមិនស្មើភាព។ សម្តេចថ្លែងថា៖«តាំងខ្លួនជាអ្នកប្រជាធិបតេយ្យ តែគាំទ្ររដ្ឋប្រហារយោធា តាំងខ្លួនជាអ្នកគោរពសិទ្ធិម​នុស្ស ប៉ុន្តែគាំទ្រ ប៉ុល ពត នៅអង្គការ​សហប្រជាជាតិ»។ សូមកុំធ្វើកំហុសទី៣មកលើយើង។ យើងអត់ត្រូវការទេ យើងសុំតែសុខទេ ម្តងចោទយើងទៅនេះ ទាញយើងទៅនោះ ​លើពិភពលោកគ្មានទេស្តង់ដាមួយនោះមានតែស្តង់ដា ២ ឬស្តង់ដា ៣»។

ក្នុងន័យនេះ ទោះបីសម្តេចមិនបានលើកឈ្មោះប្រទេសនោះ ប៉ុន្តែសំដៅដល់សហរដ្ឋអាមេរិក និងប្រទេសមួយចំនួនដែលតែងតែចោទមកលើរដ្ឋាភិបាលកម្ពុជាមានទំនោលទៅចិន និងចោទថាកម្ពុជា​កសាងមូលដ្ឋាន​សម្រាប់កងទ័ពចិនថែមទៀតផង។  សម្តេចគូសបញ្ជាក់ថា៖«លើការជាក់ស្តែងក្នុងតំបន់របស់យើង អ្នកណាប្រឆាំងចិន នោះគឺមិត្តរបស់អ្នកដទៃ…អ្នកណារកស៊ីច្រើនជាមួយចិន ស្និទ្ធជាមួយចិន គឺមានរឿងហើយ ប៉ុន្តែប្រទេសរបស់គេនោះក៏ទាក់ទងជាមួយចិន។  ប្រទេសខ្លះទៀត​គេគិតណាស់​អំពីប្រជាធិបតេយ្យ សេរីពហុបក្ស ក៏ប៉ុន្តែទាក់ទងទងជាមួយប្រទេសដែលមានបក្សតែមួយ ហើយធ្វើជា​ដៃគូ​យុទ្ធសាស្រ្តទៀត»។

គួរជម្រាបថា អាមេរិកដែលជាប្រទេសកាន់របបប្រជាធិបតេយ្យដ៏មានវ័យចំណាស់មួយនៅលើពិភពលោក និងវៀតណាមដែលជា​ប្រទេសកាន់របបបក្ស​កម្មុយ​នីស្ត បានឯកភាព ទៅជាភាពជាដៃគូយុទ្ធសាស្ត្រលើគ្រប់ជ្រុងជ្រោយ កាលពីខែកញ្ញា ឆ្នាំ២០២៣ ។
ក្នុងន័យនេះ សម្តេចដាក់ជាសំណួរថា តើនេះជាការអនុវត្តស្តង់ដាមួយ ឬស្តង់ដាច្រើន។ សម្តេចថ្លែងបែបរិះគន់ថា៖«ពិបាកណាស់នៅលើពិភពលោក អាធំចេះតែបង្ក្រាបអាចតូច ចឹងបង្កើត​ទម្លាប់នៅក្នុងប្រទេសមួយៗ បក្សធំបង្ក្រាបបក្សតូចទៀត បើចឹងវាទាស់ខុសអី។ ឥឡូវយើងគិតមើល ប្រទេសធំមិនដែលឱ្យអាតូចសង្កត់ទេ តែងធ្វើបាបប្រទេសតូច ។ តើប្រទេសធំ ឈប់ធ្វើបាប​ប្រទេសតូចបានឬអត់ បើឈប់បានហើយ ចាំមកប្រដៅថា បក្សធំឯងឈប់ធ្វើបាបបក្សតូច»។

ជុំវិញបញ្ហានេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាលោកបណ្ឌិត គិន ភា បានថ្លែងថា ពាក់ព័ន្ធអំពើប្រល័យពូជសាសន៍នៅកម្ពុជាគឺជាសោកនាដកម្មមួយដែលឈឺចាប់ ហើយក៏​ជាការចងចាំដ៏អាក្រក់មួយសម្រាប់ប្រជាជាតិកម្ពុជាទាំងមូល។ លោកថ្លែងប្រាប់កម្ពុជាថ្មីថា៖«យើងដឹងហើយថាតើអ្នកណានៅពីក្រោយដែលនាំឱ្យមានអំពើប្រល័យពូជសាសន៍នៅកម្ពុជា ពិតហើយមានការពាក់ព័ន្ធពីមហាអំណាច ដែលឬសគុលធំបំផុតទី១គឺ ការធ្វើរដ្ឋ​ប្រហាររបស់ លន់ នល់ ដែលជាការបើកផ្លូវឱ្យខ្មែរក្រហមចូលមកគ្រប់គ្រងប្រទេសកម្ពុជា ហើយអនុវត្តនូវ និយោបាយប្រល័យពូជសាសន៍។ ហើយអ្នកនៅពីក្រោយរបបសាធារណរដ្ឋខ្មែរ ឬជួយគាំទ្ររបបនេះ ពិតហើយមានការរួមចំណែកពីសហរដ្ឋអាមេរិកផងដែរ ដែលជាអ្នកគាំទ្រ លន់ នល់ »។

លោកបន្ថែមថា សម្រាប់លោកមិនចោទប្រកាន់បែបណាទេ ប៉ុន្តែសហរដ្ឋអាមេរិក​ហាក់បីដូចជាខ្ន​ងបង្អែក​មួយ​សម្រាប់របបសាធារណរដ្ឋខ្មែរ ដែលជំរុញឱ្យកម្ពុជាធ្លាក់ចូលសង្គ្រាមស៊ីវិល ធ្លាក់ចូលទៅ​ក្នុងរបបប្រល័យពូជសាសន៍។
លោកបណ្ឌិតថ្លែងទៀតថា៖« ប៉ុន្តែធ្ងន់ធ្ងរជាងនេះ ក្រោយពេលដែលយើងបានផ្តួលរំលំរបបប្រល័យពូជសាសន៍មក ក្រុមកម្ពុជាប្រជាធិបតេយ្យ​នៅតែត្រូវ​បាន​ទទួល​ការគាំទ្រពីសហគមន៍អន្តរជាតិមួយចំនួន ដោយសារតែបរិបទនាពេលនោះ អាសនៈរបស់​កម្ពុជានៅអង្គការសហប្រជាជាតិ នៅតែស្ថិតនៅក្រោមការគ្រប់គ្រងរបស់ពួកខ្មែរក្រហម» ។
​លោកបន្ថែមទៀតថា៖«គឺមិនបានឱ្យមករដ្ឋាភិបាលនៃសាធារណរដ្ឋប្រជាមានិតកម្ពុជា ដែលមាន​ប្រជាពលរដ្ឋក្រោម​ការគ្រប់​គ្រងរបស់ខ្លួនជិត ៩០ភាគរយ ដែលនេះជារឿងអយុត្តិធម៌មួយ​ក្រោយ​របបប្រល័យពូជសាសន៍ ហើយបន្តមកកម្ពុជារស់នៅក្នុងភាពឯកោក្រោមការហ៊ុំព័ទ្ធខាងផ្នែកសេដ្ឋកិច្ច និងនយោបាយ ហើយយើងត្រូវតស៊ូលំបាកច្រើន»។

បន្ថែមពីនេះ ក្រោយពេលដែលកម្ពុជាបានរកឃើញនូវការផ្សះផ្សាជាតិសុខសន្តិភាព ប្រទេសមួយ​ចំនួនដែលពីមុនធ្លាប់គាំទ្រខ្មែរក្រហម គឺជំរុញឱ្យមានការបង្កើតតុលាការកាត់ទោសមេដឹកនាំខ្មែរក្រហម ដែលប្រើពេលវេលាចរចារាប់ឆ្នាំ ទម្រាំចេញតុលាការកូនកាត់​មួយដើម្បីកាត់ទោស​មេដឹកនាំជាន់ខ្ពស់​បំផុតនៃរបបកម្ពុជាប្រជាធិបតេយ្យ។

លោកបណ្ឌិតសង្កត់ធ្ងន់ថា៖« អ៊ីចឹងទេ! កម្ពុជាដែលធ្លាប់រងសោកនាដកម្មដោយអំពើប្រល័យពូជសាសន៍ ធ្លាប់រងសោកនាដកម្មដោយការហ៊ុំព័ទ្ធផ្នែកសេដ្ឋកិច្ច និងនយោបាយ  គឺកម្ពុជាប្រាថ្នារស់ក្នុងសុខសន្តិភាព ឯករាជ្យ អធិបតេយ្យ ​និងបូរណភាពទឹកដី របស់ខ្លួន។ ហើយកម្ពុជាជារដ្ឋតូចនេះ​ខិតខំប្រឹងប្រែង​បំពេញ​តួនា​ទីរបស់ខ្លួនក្នុងនាមជាសមាជិកនៃសហគមន៍អន្តរជាតិ បំពេញកាតព្វកិច្ចដែលខ្លួនគួរបំពេញ ដើម្បីបុព្វហេតុសន្តិភាព ស្ថិរភាព និងវិបុលភាពតំបន់និងពិភពលោក»៕

អត្តបទ៖ ឡាយ សាមាន