រដ្ឋមន្ត្រីសុខាភិបាល ណែនាំថ្នាក់ដឹកនាំ និងមន្ត្រីថែទាំសុខភាពឱ្យបានល្អ ដើម្បីបម្រើសេវាជូនពលរដ្ឋប្រកបដោយប្រសិទ្ធភាព

លោក សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានធ្វើការណែនាំថ្នាក់ដឹកនាំ និងមន្ត្រីសុខាភិបាលទាំងអស់ត្រូវថែទាំសុខភាពរបស់ខ្លួនឱ្យបានល្អ ដើម្បីបម្រើនឹងផ្តល់សេវាជូនប្រជាពលរដ្ឋប្រកបដោយគុណភាព និងប្រសិទ្ធភាពខ្ពស់។

នៅក្នុងបឋកថាស្តីពីភាពជាអ្នកដឹកនាំ និងនវានុវត្តន៍ក្រោមប្រធានបទ «ភាពជាអ្នកដឹកនាំ និងការយកចិត្តទុកដាក់មើលថែខ្លួនឯង» តាមប្រព័ន្ធវីដេអូសន្និសីទ ជូនដល់មន្រ្តីក្រោមឱវាទក្រសួងសុខាភិបាលកាលពីរសៀលថ្ងៃទី២១ឧសភា នៅទីស្តីការក្រសួង លោករដ្ឋមន្រ្តី បានលើកយកនូវមេរៀនស្តីពីសារៈសំខាន់ដែលអ្នកដឹកនាំត្រូវធ្វើការថែរក្សាសុខភាពខ្លួនឯង និងចែករំលែកវិធីសាស្រ្តផ្សេងៗដែលមានប្រសិទ្ធិភាពក្នុងការធ្វើឲ្យសុខភាពភាពផ្លូវចិត្តមានភាពស្រស់ស្រាយ និងផ្លូវកាយមានភាពរឹងមាំសម្រាប់បន្តរការងារដឹកនាំ។

ក្នុងនោះលោករដ្ឋមន្ត្រី បានណែនាំអ្នកដឹកនាំទាំងអស់ត្រូវខិតខំផ្តោតលើការថែទាំឈឺឆ្អាលអំពីសុខភាព ចំពោះគ្រប់សហភាតររបស់ខ្លួន គ្រប់ឋានានុក្រម  ក៏ដូចជាការថែទាំឈឺឆ្អាលរាល់គ្រប់ការផ្តល់សេវាសុខភាពជូនដល់អ្នកជំងឺ បងប្អូនប្រជាពលរដ្ឋ ដោយការលះបង់ទាំងកំលាំងកាយ និងកំលាំងចិត្តខ្ពស់ ក្នុងវិជ្ជាជីវៈរបស់ខ្លួន។ ដូច្នេះដើម្បីធ្វើការផ្តល់សេវាខាងលើឱ្យបានកាន់តែល្អ អ្នកដឹកនាំគ្រប់រូបត្រូវចាប់ផ្តើមយកចិត្តទុកដាក់ឈឺឆ្អាលថែទាំសុខភាពរបស់ខ្លួនម្នាក់ៗឱ្យបានប្រសើរបំផុត។

លោករដ្ឋមន្ត្រីក៏បានបង្ហាញអំពីការយកចិត្តទុកដាក់សុខភាពផ្លូវចិត្ត និងផ្លូវកាយរបស់បុគ្គលមន្រ្តីរាជការគ្រប់លំដាប់ថ្នាក់ និងបានចែករំលែកវិធីសាស្រ្តមួយចំនួនដែលមានប្រសិទ្ធភាពក្នុងការកាត់បន្ថយភាពនឿយហត់ហួសកំរិត ដោយណែនាំឱ្យមន្រ្តីសុខាភិបាលរៀបចំឱ្យមានតុល្យភាពនៃការធ្វើការងារ តាមរយៈការសំរាកឱ្យគ្រប់គ្រាន់ ការហាត់ប្រាណ និង ការបង្កើតការគិតជាវិជ្ជមាន។ព្រោះថាការយកចិត្តទុកដាក់ថែទាំសុខភាពខ្លួនឯង នឹងជួយបង្កើនភាពឈ្លាសវៃ និងមានថាមពលគ្រប់គ្រាន់ក្នុងការដឹកនាំបំពេញការងារចំពោះមុខអោយមានការរីកចំរើនជាប់ជាប្រចាំ៕

អត្ថបទ៖ សំអឿន