សម្តេចធិបតី៖ ដើម្បីកសាងមូលធនមនុស្ស កត្តាសុខភាព និងចំណេះដឹង គឺជាកិច្ចការសំខាន់

ដើម្បីកសាងមូលធនមនុស្សឱ្យបានរឹងមាំ កត្តាសុខភាព និងចំណេះដឹង គឺជាកិច្ចការសំខាន់ និងចាំបាច់បំផុតដែលត្រូវ យកចិត្តទុកដាក់ និងត្រូវតែគិតគូមុនគេ។ នេះជាការថ្លែងរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

អញ្ជើញប្រកាសដាក់ឱ្យអនុវត្តផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ នាព្រឹកថ្ងៃទី២៣ ខែឧសភា ឆ្នាំ២០២៤សម្ដេចធិបតី ហ៊ុន ម៉ាណែត បានបញ្ជាក់ថា សម្រាប់រាជរដ្ឋាភិបាល អាណត្តិទី៧ យុទ្ធសាស្ត្របញ្ចកោណ ដែលបន្តពីយុទ្ធសាស្ត្រចតុកោណ ធានធានមនុស្សនៅតែជាគន្លឹះអាទិភាពទី១។ សម្ដេចធិបតី ថ្លែងដូច្នេះយ៉ាងថា៖ «ខ្ញុំសូមបញ្ជាក់ជាថ្មីម្ដងទៀត មូលធនមនុស្ស គឺជាគន្លឹះអាទិភាពសម្រាប់ការសាងប្រទេសរបស់យើង ព្រោះមនុស្សកំណត់ប្រទេស មនុស្សជាដង្ហើម គឺជាអ្នកអនុវត្តប្រតិបត្តិក្នុងការជំរុញសេដ្ឋកិច្ច ថែទាំវប្បធម៌ ថែទាំប្រពៃណី និងអត្តសញ្ញាណជាតិ។ ចឹងដើម្បីកសាងមូលធនមនុស្ស សុខភាព និងចំណេះដឹង ជាកិច្ចការសំខាន់»។

បើតាមការគូសបញ្ជាក់របស់សម្ដេចធិបតីនាយករដ្ឋមន្ត្រី គោលដៅក្នុងការកសាងសុខភាព គឺជាការធ្វើឱ្យប្រជាពលរដ្ឋអាចទទួលបានការថែទាំសុខភាពពីសេវាសុខាភិបាលដែលមានគុណភាព តម្លៃសមរម្យ។ សម្ដេចធិបតី លើកឡើងថា គោលដៅ៣ ដែលយើងចង់បាន គឺគុណភាព លទ្ធភាពទទួលបានសេវាសុខាភិបាល និង​តម្លៃសមរម្យ។

សម្ដេចធិបតី ថា នេះគឺជាគោលដៅចាំបាច់ក្នុងការពង្រឹងធនធានមនុស្ស ពង្រឹងមូលធនមនុស្ស ដោយផ្ដោតជាសំខាន់លើសុខភាពជាចម្បង ដោយការកសាងសេវាសុខភាព ដែលមានគុណភាព រុញឱ្យដល់មូលដ្ឋាន ហើយធ្វើយ៉ាងណាឱ្យប្រជាពលរដ្ឋមានលទ្ធភាពនៅក្នុងការទទួលបានដោយមានចីរភាព។ សម្ដេចធិបតី បានបន្ថែមថា ដូច្នេះហើយ ទើបរាជរដ្ឋាភិបាល រៀបចំឱ្យមានផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ នាពេលនេះ៕