លក់ពេញផ្សារ! ត្រីមេពូជពងកូនធំៗ កំពុងរងគ្រោះដោយការនេសាទខុសច្បាប់

ទន្លេមេគង្គ​លើខេត្តស្ទឹងត្រែង ជាសំបុកត្រីមេពូជធំៗដែល​រស់នៅក្នុងអន្លង់ជ្រៅ ដើម្បី​បង្កាត់ពូជពងកូនបន្តនៅរដូវភ្លៀងធ្លាក់ ហើយក៏ដល់រដូវបិទនេសាទដែរ តែគេសង្កេតឃើញថាប្រភេទត្រីមេពូជធំៗកំពុងរងគ្រោះលក់ពេញនៅលើទីផ្សារសាមគ្គីស្ទឹងត្រែង។

ចាប់ពីថ្ងៃទី ២១ ដល់ថ្ងៃ ២៣ ឧសភា មានភ្លៀងធ្លាក់ខ្លាំងជាប់ៗគ្នា ហើយក៏ជារដូវវស្សាឈានមកដល់ដែរ។ ភ្លៀងធ្លាក់ខ្លាំងធ្វើឲ្យទឹកទន្លេឡើង ពពួកត្រីដែលរស់នៅតាមដងទន្លេមេគង្គលើជាប្រភេទត្រីមេពូជធំៗពងពេញពោះ ត្រូវបានអ្នកខ្លះនេសាទជាលក្ខណៈគ្រួសារ និងមួយចំនួនទៀតនេសាទលួចលាក់ដោយប្រើឧបករណ៍នេសាទខុសច្បាប់ នៅក្នុងរដូវបិទនេសាទ។

អាជីវករលក់ត្រីនៅ​ផ្សារសាមគ្គីស្ទឹងត្រែងបានឲ្យដឹងថា នៅខេត្តស្ទឹងត្រែងពេលដែលមានភ្លៀងធ្លាក់ខ្លាំង ទឹកទន្លេរើបឡើងបន្តិច​ត្រីសម្បូរសុទ្ធសឹងតែជាប្រភេទត្រីធំៗពងពេញៗពោះ ដែលមានទម្ងន់មួយក្បាលរហូតដល់មួយជិត ១០ គីឡូក្រាមក៏មានដែរ។

អាជីវករ​បាន​បញ្ជាក់ថា ត្រីដែលគេនេសាទបានភាគច្រើនមានដូចជាប្រភេទ ត្រីក្អែក ត្រីតានេល ត្រីប្រា ត្រីពោ ត្រីដំរី ត្រីឆ្កោក ត្រីកេះ ត្រីប៉ាវ៉ា កូនត្រីប៉ាស៊ីអ៊ីតូចៗ ជាពិសេសត្រីព្រួល មួយៗពងពេញពោះមានទម្ងន់មួយក្បាលរហូតដល់ជិតដប់គីឡូក៏មានដែរ។ តម្លៃវិញក៏រាងថោកដែរមួយគីឡូចាប់ពី ១ ម៉ឺន ៤ ពាន់ រៀលតែប៉ុណ្ណោះនៅព្រឹកថ្ងៃទី ២៣ ឧសភា នេះ។   

ទាក់ទងនឹងរដូវបិទនេសាទនេះ លោកស្រី សម វិចិត្រ នាយរដ្ឋបាលខណ្ឌជលផលស្ទឹងត្រែងបានបញ្ជាក់ថា បានធ្វើការផ្សព្វផ្សាយដល់អ្នកនេសាទត្រូវគោរពច្បាប់ជលផល ដើម្បីរួមគ្នាអភិរក្សធនធានមច្ឆាជាតិនិងការពារត្រីមេពូជ ព្រោះត្រីមេពូជ​នៅខេត្តស្ទឹងត្រែង ចាប់ផ្ដើមពងកូនហើយ ដូច្នេះប្រជានេសាទត្រូវគោរពតាមសេក្តីប្រកាសលេខ១០៧ស្ដីពីរដូវបិទនេសាទរបស់រដ្ឋបាលជលផល ចាប់ពីថ្ងៃទី ១ ឧសភានេះ រហូតដល់ថ្ងៃទី ៣១ខែកញ្ញាឆ្នាំ ២០២៤។

លោកនាយខណ្ឌជលផលខេត្តបានបញ្ចាក់បន្ថែមថា រដូវត្រីពងកូនចូលមកដល់ហើយ ដូចនេះប្រជាអ្នកនេសាទទាំងអស់ត្រូវតែនាំគ្នាអនុវត្តសេចក្តីជូនដំណឹងរបស់រដ្ឋបាលខេត្តឱ្យបានខ្ជាប់ខ្ជួន ដើម្បីរួមគ្នាអភិរក្សត្រីមេពូជដូចរៀងរាល់ឆ្នាំ។

ការចូលរួមអភិរក្សនេះសូមឱ្យភាគីពាក់ព័ន្ធជួយទប់ស្កាត់បទល្មើសផ្សេងៗ ព្រោះមន្ត្រីជលផលបានធ្វើការផ្សព្វផ្សាយច្បាប់ស្តីពីជលផលទៅតាមមូលដ្ឋានបានទូលាយរួចមកហើយដែរ។ បងប្អូនប្រជាអ្នកនេសាទ ត្រូវមានឆន្ទៈស្រឡាញ់ធនធានមច្ឆាជាតិរបស់ខ្លួន ជាពិសេសនៅក្នុងរដូវបិទនេសាទនេះ ចៀសវាងកុំប្រើប្រាស់ឧបករណ៍នេសាទ ដែលខុសច្បាប់ឬលួចចូលទៅធ្វើនេសាទក្នុងអន្លង់អភិរក្ស បង្កផលប៉ះពាល់ត្រីពងកូន។

លោក សៃ សេង អ្នកនេសាទនៅភូមិវាលខ្សាច់ ឃុំថាឡា ស្រុកថាឡាបរិវ៉ាត់ បានបញ្ជាក់ថា ដល់ពេលរដូវបិទនេសាទម្តងៗ អ្នកនេសាទភាគច្រើនចូលរួមអនុវត្តបានល្អមិនហ៊ានចេញធ្វើនេសាទផ្តេសផ្តាស់ទេ។ ប៉ុន្តែ​លោកអះអាង​ថា ក៍នៅមានជនសង្ស័យមួយចំនួនបានលួចលាក់ប្រព្រឹត្តបទល្មើស ហើយប្រជាសហគមន៍បង្រ្កាបមិនបាន គឺបានត្រឹមតែរាយការណ៍ជូនអាជ្ញាធរតែប៉ុណ្ណោ ព្រោះបទល្មើសភាគច្រើនធ្វើសកម្មភាពឆក់នៅពេលយប់ឬពេលជិតភ្លឺតែម្តង។

លោក លី ចិន្ត្រា ប្រធានសហគមន៍នេសាទភូមិថ្មី សង្កាត់សាមគ្គី ក្រុងស្ទឹងត្រែង បានបញ្ជាក់ដែរថា ទោះជាយ៉ាងណាការលួចប្រើឧបករណ៍នេសាទខុសច្បាប់ ប្រជាសហគមន៍ចុះបង្ក្រាបជាប្រចាំ ទោះឃាត់ខ្លួនមិនបានពេលខ្លះ ក៏​រឹបអូសបានឧបករណ៍ល្មើសយកមកកំទេចចោលដែរ។

លោកសង្ឃឹមមុតមាំថា នៅឆ្នាំ២០២៤ ប្រជាអ្នកនេសាទទាំងអស់ នឹង​អនុវត្តតាមសេចក្តីជូនដំណឹងប្រកបដោយការទទួល​ខុសត្រូវ ហើយចងចាំ​នឹង​អនុវត្តតាមយុទ្ធសាស្ត្របច្ចុកោណដំណាក់កាលទី ១ របស់រាជរដ្ឋាភិបាលឱ្យបានព្រមគ្នាដើម្បីចូលរួមថែរក្សាការពារនិងប្រើប្រាស់នូវធនធានមច្ឆជាតិ​ ឱ្យបានគង់វង្សសម្រាប់កូនចៅជំនាន់ក្រោយៗទៀត។ 

កន្លងទៅថ្មីៗនេះ ក្នុងរដូវបិទនេសាទ សមត្ថកិច្ចជំនាញក៏បានធ្វើការឃាត់ខ្លួនជនសង្ស័យប្រើឧបករណ៍ឆក់ចំនួន ៦ នាក់រួមវត្ថុតាងបទល្មើសជាច្រើនទៀតបញ្ជូនខ្លួនទៅដាក់ពន្ធនាគារផងដែរ៕

អត្ថបទ៖ ងិនលីម