ព័ត៌មានជាតិ
អ្នកនាំពាក្យ ៖ កម្ពុជា មិនខ្វះការងារធ្វើទេ តែខ្វះកម្លាំងពលកម្មជំនាញ
លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ២៣ ឧសភា នេះថា បច្ចុប្បន្ន កម្ពុជា មិនខ្វះការងារសម្រាប់ប្រជាពលរដ្ឋធ្វើទេ តែអ្វីដែលប្រឈមនោះគឺខ្វះកម្លាំងពលកម្មជំនាញសម្រាប់បម្រើនៅតាមរោងចក្រសហគ្រាសផ្សេងៗ។
លោកបានបន្តថា ដោយសារខ្វះកម្លាំងពលកម្មជំនាញនេះហើយទើបរាជរដ្ឋាភិបាលបានដាក់ឱ្យដំណើរការកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១ លាន ៥ សែននាក់ ដោយឥតគិតថ្លៃ កាលពីថ្ងៃទី ១៤ ខែវិច្ឆិកា ឆ្នាំ ២០២៣ ដើម្បីបណ្ដុះបណ្ដាលជំនាញដល់យុវជនមានជំនាញវិជ្ជាជីវៈ និងបច្ចេកទេសច្បាស់លាស់ឆ្លើយតបទៅនឹងតម្រូវការនៅតាមរោងចក្រសហគ្រាស និងរួមចំណែកលើកកម្ពស់ជីវភាពគ្រួសារកាន់តែប្រសើរ។
លោកបានបន្តថា បន្ទាប់ពីបានប្រកាសដំណើរកម្មវិធីរហូតមកដល់ថ្ងៃទី ១៣ ខែឧសភា ឆ្នាំ ២០២៤ មានអ្នកចុះឈ្មោះចូលរៀនចំនួន ៣៧ ៤៩៣ នាក់ (ស្រី ១២ ៨៧១ នាក់) ក្នុងនោះមានសិស្សកំពុងរៀនជំនាញវិជ្ជាជីវៈ និងបច្ចេកទេសកម្រិតសញ្ញាបត្របច្ចេកទេស និងវិជ្ជាជីវៈ ១ (C1) សរុបចំនួន ១៧ ៧៧០ នាក់ (ស្រី ៥ ៨១៩ នាក់) ស្មើនឹងចំនួន ៨០៥ ថ្នាក់ បន្ទាប់ពីបានបើកវគ្គសិក្សាជាលើកដំបូងកាលពីថ្ងៃទី ១៥ ខែមករា ឆ្នាំ ២០២៤ ដោយសិក្សាលើវិស័យសំណង់, អគ្គិសនី និងថាមពល , អេឡិចត្រូនិក ,កម្មន្តសាល ,មេកានិចទូទៅ/មេកានិចរថយន្ត, ធុរកិច្ច និងព័ត៌មានវិទ្យា ,សេវាកម្ម, បរិក្ខារត្រជាក់ និងកម្តៅ, ទេសចរណ៍, និងកសិកម្ម និង កសិ-ឧស្សាហកម្ម និងសិស្សធ្វើតេស្តវាយតម្លៃបញ្ចប់វគ្គចំនួន ៣ ៩០៩ នាក់ ស្រី ៨៨៤ នាក់។
លោកបានបន្ថែមថា វគ្គទី ១ នេះ នឹងត្រូវប្រឡងបញ្ចប់នៅទូទាំងប្រទេសនៅក្នុងខែឧសភា ឆ្នាំ ២០២៤ នេះហើយ អ្នកដែលបានប្រឡងបញ្ចប់តេស្តដោយជោគជ័យ នឹងអាចទទួលបានការងារសមរម្យសម្រាប់ចិញ្ចឹមជីវិត។
លោកបានបញ្ជាក់ថា «រោងចក្រសហគ្រាសជាច្រើន កំពុងរង់ចាំទទួលពួកគាត់។ នៅកម្ពុជាមិនខ្វះការងារធ្វើទេ ប៉ុន្តែខ្វះអ្នកដែលមានជំនាញទៅវិញ»។
លោក កត្តា អ៊ន បានលើកឧទាហរណ៍មកបញ្ជាក់ថា ជាក់ស្ដែងនៅខេត្តកំពង់ស្ពឺ មានរោងចក្រសហគ្រាសជាង ៤០០ ត្រូវការកម្លាំងពលកម្មជំនាញ តែយើងផ្គត់ផ្គង់បានតែ ១៧ រោងចក្រទេ កាលពីឆ្នាំ ២០២៣ កន្លងទៅ ដូចនេះនៅខ្វះកម្លាំងពលកម្មច្រើនទៀត។
លោកបានបន្ថែមទៀតថា វគ្គបណ្ដុះបណ្ដាលជំនាញទី ២ មានយុវជនមកពីគ្រួសារក្រីក្រ និងគ្រួសារងាយរងហានិភ័យប្រមាណជាង ៥ ពាន់នាក់ កំពុងរៀនជំនាញវិជ្ជាជីវៈ និងបច្ចេកទេស។ ចំណែកគ្រឹះស្ថានបណ្ដុះបណ្ដាលនានា ក៏កំពុងបន្តចុះឈ្មោះសិស្សចូលរៀនជាបន្តបន្ទាប់ទៀតផងដែរ។
ថ្មីៗ នេះ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសពីតម្រូវការកម្លាំងពលកម្មក្នុងស្រុកប្រមាណជិត ៥ ម៉ឺនកន្លែង នៅទូទាំងប្រទេស សម្រាប់បម្រើក្នុងវិស័យធំៗ ចំនួន ៣ រួមមាន វិស័យឧស្សាហកម្ម វិស័យសេវាកម្ម និងវិស័យកសិកម្ម ក្នុងនោះវិស័យឧស្សាហកម្មមានតម្រូវការខ្ពស់ជាងគេរហូតដល់ទៅជាង ៣៥ ០០០ នាក់៕
អត្ថបទ ៖ សំអឿន
-
ព័ត៌មានជាតិ១ សប្តាហ៍ ago
ព្យុះ ប៊ីប៊ីនកា បានវិវត្តន៍ទៅជាព្យុះសង្ឃរា បន្តជះឥទ្ធិពលលើកម្ពុជា
-
ព័ត៌មានជាតិ៥ ថ្ងៃ ago
ព្យុះ ពូលឡាសាន ជាមួយវិសម្ពាធទាប នឹងវិវត្តន៍ទៅជាព្យុះទី១៥ បង្កើនឥទ្ធិពលខ្លាំងដល់កម្ពុជា
-
ព័ត៌មានអន្ដរជាតិ៤ ថ្ងៃ ago
ឡាវ បើកទំនប់ទឹកនៅខេត្ត Savannakhet
-
ព័ត៌មានអន្ដរជាតិ១ សប្តាហ៍ ago
អឺរ៉ុបកណ្តាលនិងខាងកើត ក៏កំពុងរងគ្រោះធ្ងន់ធ្ងរ ដោយទឹកជំនន់ដែរ
-
ព័ត៌មានអន្ដរជាតិ១ សប្តាហ៍ ago
វៀតណាម ប្រាប់ឲ្យពលរដ្ឋត្រៀមខ្លួន ព្រោះព្យុះថែមទៀត នឹងវាយប្រហារ ចុងខែនេះ
-
ព័ត៌មានជាតិ៣ ថ្ងៃ ago
Breaking News! កម្ពុជា សម្រេចដកខ្លួនចេញពីគម្រោងCLV-DTA
-
ព័ត៌មានអន្ដរជាតិ៦ ថ្ងៃ ago
ព្យុះកំបុងត្បូង នឹងវាយប្រហារប្រទេសថៃ នៅថ្ងៃសុក្រនេះ
-
ព័ត៌មានជាតិ៧ ថ្ងៃ ago
ព្យុះចំនួន២ នឹងវាយប្រហារក្នុងពេលតែមួយដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជា