ទស្សនិកជនយ៉ាងច្រើនចូលទស្សនា ព្រឹត្តិការណ៍ការប្រណាំងម៉ូតូនិងឡាន «Car & Bike Festival» នៅព្រលានយន្តហោះចាស់ ក្រុងសៀមរាប

ទស្សនិកជនជាច្រើនបានចូលទស្សនាព្រឹត្តិការណ៍ដែលក្រសួងទេសចរណ៍បានសហការជាមួយអង្គការសប្បុរសធម៌ហ្វិចឆីរ៉ាល់ និងក្រុមហ៊ុនClip RV Media និងSalakamreuk Commune រៀបចំព្រឹត្តិការណ៍ជំនួបក្រុមម៉ូតូ និងរថយន្ត ទេសចរណ៍ Siem Reap Bike Week ដោយប្រមូលផ្តុំម៉ូតូ និងរថយន្តល្បីៗ ដែលប្រព្រឹត្តទៅចាប់ពីថ្ងៃទី២៤-២៦ខែឧសភា ឆ្នាំ២០២៤ នៅក្នុងបរិវេណអាកាសយានដ្ឋានសៀមរាបចាស់ ខេត្តសៀមរាប។

   ព្រឹត្តិការណ៍នេះ ជាឱកាសដ៏ល្អក្នុងការជំរុញបង្កើនការផ្សព្វផ្សាយពីសក្តានុពលទេសចរណ៍ ដ៏សម្បូរបែបរបស់ កម្ពុជា ឱ្យកាន់តែទូលំទូលាយទៅកាន់ទីផ្សារអន្តរជាតិ និងផ្សព្វផ្សាយយុទ្ធនាការ “ទស្សនាសៀមរាប ឆ្នាំ២០២៤” “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤” “ឆ្នាំទេសចរណ៍ កម្ពុជា-ឥណ្ឌា លើកទី១” និងជាការជំរុញទេសចរណ៍ក្នុងស្រុក ក៏ដូចជារួមចំណែកជំរុញប្រសិទ្ធភាព នៃការអនុវត្តយុទ្ធសាស្ត្រ“បង្កើន៥ និងអភិវឌ្ឍន៍៣”របស់ក្រសួងទេសចរណ៍។

   សម្រាប់នៅរសៀលថ្ងៃទី២៥ ខែឧសភា ឆ្នាំ២០២៤នេះ ក្រុមកីឡាករជិះម៉ូតូ និងរថយន្ត ជាច្រើនអ្នកកំពុងប្រណាំង នៅទីលានអាកាសយានដ្ឋានអន្តរជាតិសៀមរាបចាស់ ប្រកបទៅដោយភាពសប្បាយរីករាយ និងមានការអបអរសាទរយ៉ាងច្រើនពីសំណាក់ទស្សនិកជនផងដែរ៕

ដោយ៖ជុន កុសល