ព័ត៌មានជាតិ

កម្ពុជា អំពាវនាវភាគីពាក់ព័ន្ធ ពង្រឹងកិច្ចសហប្រតិបត្តិការអន្តរជាតិ ប្រកបដោយប្រសិទ្ធភាពខ្ពស់ ឆ្លើយតបបញ្ហាសុខភាពជាសកល

បានផុស

៤ ខែ មុន

នៅ

ថ្ងៃពុធ ២៩ ឧសភា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអំពាវនាវដល់ភាគីពាក់ព័ន្ធទាំងអស់ ឱ្យពង្រឹងកិច្ចសហប្រតិបត្តិការអន្តរជាតិ ប្រកបដោយបរិយាបន្ន សាមគ្គីភាព និងប្រសិទ្ធភាពខ្ពស់ ដើម្បីឆ្លើយតបបានទៅនឹងបញ្ហាប្រឈមសុខភាពជាសកល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវនេះបានធ្វើឡើងក្នុងឱកាសដែលលោករដ្ឋមន្ត្រីបានអញ្ជើញថ្លែងសុន្ទរកថាក្នុងមហាសន្និបាតសុខភាពពិភពលោក លើកទី ៧៧ នៅទីក្រុងហ្សឺណែវ ប្រទេសស្វីស កាលពីថ្ងៃទី ២៨ ឧសភា។

លោករដ្ឋមន្ត្រី បានសម្ដែងនូវអំណរគុណដល់អង្គការសុខភាពពិភពលោក និងគ្រប់ដៃគូអភិវឌ្ឍន៍ទាំងអស់ ដែលបាននិងកំពុងចូលរួមគាំទ្រដល់វិស័យសុខាភិបាលកម្ពុជា រហូតសម្រេចបានគោលដៅអភិវឌ្ឍន៍សហស្សវត្សនាពេលកន្លងមក។

លោករដ្ឋមន្ត្រី បានបន្តថា ចំពោះមុខទំហំ នៃកិច្ចការរួម ជាពិសេសរបៀបវារៈ នៃគោលដៅអភិវឌ្ឍន៍ប្រកបដោយចីរភាព កម្ពុជា បានអំពាវនាវដល់ភាគីពាក់ព័ន្ធទាំងអស់ ឱ្យពង្រឹងកិច្ចសហប្រតិបត្តិការអន្តរជាតិ ប្រកបដោយបរិយាបន្ន សាមគ្គីភាព និងប្រសិទ្ធភាពខ្ពស់ ដើម្បីឆ្លើយតបបានទៅនឹងបញ្ហាប្រឈមសុខភាពជាសកល។

លោករដ្ឋមន្ត្រី បានគូសបញ្ជាក់ថា «ការដែលយើងធ្វើសកលភាវូបនីយកម្មពាណិជ្ជកម្មជាការចាំបាច់ បន្ថែមពីនោះសកលភាវូបនីយកម្មសុខាភិបាលរឹតតែមានសារៈសំខាន់ ព្រោះថាការចែករំលែកព័ត៌មានទិន្នន័យ ចំណេះដឹងផ្នែកសុខភាព ព្រមទាំងធនធាន យុទ្ធវិធីក្នុងដំណោះស្រាយបញ្ហាសុខភាព និងការព្យាបាល ជាពិសេសនវានុវត្តន៍ផ្នែកសុខភាពប្រកបដោយសមធម៌ គឺជាកត្តាកំណត់ប្រសិទ្ធភាពខ្ពស់ក្នុងការសម្រេចបានជោគជ័យរួមជាសកល»។

ជាមួយគ្នានេះដែរ លោករដ្ឋមន្ត្រី ក៏បានសង្កត់ធ្ងន់លើសាមគ្គីភាព លើភាពរឹងមាំ នៃកិច្ចសហប្រតិបត្តិការអន្តរជាតិ និងកិច្ចខិតខំជួយពង្រឹងសន្តិសុខ និងស្វ័យភាពសុខភាព នៃរដ្ឋជាសមាជិក។ ដូច្នេះការចូលរួម នៃរដ្ឋសមាជិក ក្នុងកិច្ចការខិតខំប្រឹងប្រែងរួមគ្នាកសាងពិភពលោកមួយប្រកបដោយសមធម៌ មានសមត្ថភាពប្រឈមមុខនឹងហានិភ័យសុខភាព រួមគ្នាផ្លាស់ប្ដូរទំនាក់ទំនងសេដ្ឋកិច្ចសកល ឈានទៅគ្រប់គ្រងប្រព័ន្ធអេកូឡូស៊ីសុខភាពពិភពលោក ការពង្រឹង និងពង្រីកការយល់ដឹងពីទ្រព្យសាធារណៈសកលផ្នែកសុខភាព ជាពិសេសថ្នាំបង្ការក្នុងស្ថានភាពអាសន្ន នៃជំងឺរាតត្បាត ដើម្បីស្ដារឡើងវិញនូវសមភាពចំពោះមុខការប្រឈមនឹងជំងឺ និងការពង្រឹងក្របខ័ណ្ឌនិយ័តកម្មសកលរឹងមាំជាងមុន ប្រកបដោយភាពធន គឺជាកត្តាគន្លឹះដែលនាំឱ្យសម្រេចបានគោលដៅអភិវឌ្ឍន៍ ប្រកបដោយចីរភាព។

គួរបញ្ជាក់ថា លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានដឹកនាំគណៈប្រតិភូជាន់ខ្ពស់ក្រសួងសុខាភិបាល ចូលរួមក្នុងសម័យប្រជុំពេញអង្គ នៃមហាសន្និបាតសុខភាពពិភពលោក លើកទី ៧៧ នៅទីក្រុងហ្សឺណែវ ប្រទេសស្វីស ចាប់ពីថ្ងៃទី ២៧ ខែឧសភា ដល់ថ្ងៃទី ១ ខែមិថុនា ឆ្នាំ ២០២៤៕

អត្ថបទ ៖ សំអឿន