លោក ឃឹម ហ្វីំណង់៖ ប្រទេសកម្ពុជា ជាប្រទេសជាប់ចំណាត់ថ្នាក់លេខ១ ក្នុងការនាំគ្រាប់ស្វាយចន្ទី​​ទៅក្រៅប្រទេស

ថ្លែងក្នុងពិធីសម្ពោធដាក់ឲ្យប្រើប្រាស់ឃ្លាំង និងឧបករណ៍គ្រឿងចក្ររបស់សហគមន៍កសិកម្ម ស្ថិតក្នុងភូមិធួយទុំ ឃុំចាអ៊ុង ស្រុកអូរជុំ ខេត្តរតនគិរី កាលពីព្រឹកថ្ងៃទី២៨ ខែឧសភា ឆ្នាំ២០២៤ លោក ឃឹម ហ្វីណង់ អនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ បានបញ្ជាក់ថា ប្រទេសកម្ពុជា ជាប្រទេសជាប់ចំណាត់ថ្នាក់លេខ១ ក្នុងការនាំគ្រាប់ស្វាយចន្ទីរចេញទៅក្រៅប្រទេស។ លោកបានបញ្ជាក់ថា ប្រទេសកម្ពុជា បាននាំចេញគ្រាប់ស្វាយចន្ទី យកទៅលក់នៅក្រៅប្រទេសក្នុងមួយឆ្នាំៗ បានច្រើនជាងគេទូទាំងប្រភពលោក។

មានប្រសាសន៍ក្នុងពិធីសំណេះសំណាលជាមួយបងប្អូនប្រជាពលរដ្ឋសហគមន៍កសិកម្ម លោក ឃឹម ហ្វីណង់ លើកឡើងថា ខេត្តរតនគិរី ក៏ជាខេត្តមួយដែលមានផ្ទៃដីដាំដំណាំ ស្វាយចន្ទីច្រើនជាងគេ ទូទាំងប្រទេសផងដែរ។ ហេតុដូចនេះក្នុងនាមលោកតំណាងឲ្យក្រសួងកសិកម្មរុក្ខាប្រមាញ់ និងនេសាទ សូមឲ្យបងប្អូន ដែលដាំដំណាំស្វាយចន្ទី ចងក្រងជាសហគមន៍ និងយកចិត្តទុកដាក់ក្នុងការថែទាំឲ្យបានល្អ ដើម្បីឲ្យបងប្អូនទទួលបាននូវទិន្នផលល្អប្រសើរឡើង។

លោក ញ៉ែម សំអឿន អភិបាលខេត្តរតនគិរី បានថ្លែងនូវការកោតសរសើរដោយស្មោះ ចំពោះថ្នាក់ដឹកនាំ និងមន្ត្រីរាជការក្រសួងកសិកម្ម រុក្ខាប្រមាញ់ និងនេសាទ ដែលបានខិតខំយកចិត្តទុកដាក់ សហការសម្របសម្រួលរហូតដល់សម្រេចបានការគាំទ្រពីស្ថានទូតជប៉ុន លើគម្រោងជំនួយឥតសំណងគូសាណូណិ (Kusanoe grant project)​សម្រាប់​សាងសង់ឃ្លាំងទីលានហាល ម៉ាស៊ីនញែកគ្រាប់ស្វាយចន្ទី និងឧបករណ៍វាស់សំណើម ដល់សហគមន៍កសិកម្មចំនួន៤ ដែលមានទឹកប្រាក់សរុបប្រមាណ ២២៤,៥៨៦ដុល្លារ(អាមេរិក) និងការចូលរួមថវិកាចំនួន៤លានរៀល របស់សហគមន៍សម្រាប់ស្លាក។

លោកបន្តថា គម្រោងសាងសង់ឃ្លាំង និងទីវាលសម្រាប់ហាលគ្រាប់ស្វាយចន្ទី ចំនួន៤សហគមន៍ ត្រូវបានបញ្ចប់ជាស្ថាពរ និងបំពាក់នូវម៉ាស៊ីនញែកគ្រាប់ស្វាយចន្ទី និងឧបករណ៍វាស់សំណើម ដោយឃ្លាំងនីមួយៗមានបំពាក់ចំនួន១គ្រឿង ដែលប្រារព្វពិធីប្រគល់-ទទួល និងដាក់ឲ្យសហគមន៍កសិកម្មប្រើប្រាស់នាពេលនេះ៕

អត្ថបទ៖ វុទ្ធឦសាន