មេឃុំទទួលស្គាល់ទំនប់ផ្លូវ៤១ មានតាំងពីរបបប៉ុលពត គ្រាដែលទីតាំងនោះ​កំពុងមានភាពចម្រូងចម្រាស

មេឃុំស្នំក្រពើ ស្រុកគងពិសី លោក ឃឹម ងួន បានធ្វើលិខិតមួយ ទៅអភិបាលស្រុកគងពិសី ខេត្តកំពង់ស្ពឺ ជុំវិញបញ្ហាទំនាស់ដីធ្លីនៅទីតាំងទំនប់នៅលើផ្លូវ៤១ កំពុងស្ថិតក្នុង​ភាពចម្រូង​ចម្រាស់ ដោយប្រជាពលរដ្ឋជាច្រើនគ្រួសារតវ៉ាឲ្យអាជ្ញាធរដោះស្រាយ ក្នុងពេលដែលទីតាំងនោះ ត្រូវបានឈ្មួញ អ្នកមានអំណាចចាក់ដីលុប នឹងធ្វើរបងព័ទ្ធធ្វើជាកម្មសិទ្ធ។

ប្រជាពលរដ្ឋ​ជា​ច្រើន​នាក់បាន​ធ្វើ​ដំណើរ​ទៅ​កាន់​ឃុំ​ស្នំ​ក្រពើ ស្រុក​គងពិសី ខេត្ត​កំពង់ស្ពឺ ដើម្បី​អោយ​អាជ្ញាធរ​មូលដ្ឋាន​ជួយ​បញ្ជាក់​អោយ​បាន​ច្បាស់ អំពី​ភាព​ចម្រូង​ចម្រាសដែល​ថា ដី​នៅ​ចំណុច​លើ​ផ្លូវ​លេខ​៤១ ចន្លោះ​គីឡូម៉ែត្រ​លេខ​២៦-២៧ មិនមែន​ជា​ដី​ទំនប់នោះ​ទេ។

ពាក់ព័ន្ធនឹងការបំភ្លឺពេលនេះ លោក ឃឹម ងួន មេឃុំស្នំក្រពើ បានទទួលស្គាល់ថា ទីតាំងទំនប់ផ្លូវ៤១នេះ ពិតជាមានទំនប់ តាំងពីរបប ប៉ុលពត ពិតប្រាកដមែន។

បើតាមលោកមេឃុំស្នំក្រពើ កន្លងមកប្រជាពលរដ្ឋ ភូមិអណ្តូងច្រុះ បានអាស្រ័យផលលើទំនប់ នេះ ជាយូរយារមកហើយ ពោលគឺ តាំងពីជំនាន់ ប៉ុលពត មកម្ល៉េះ តែដោយពុំមានស្តារទំនប់ បានរាក់ដូចជាដីស្រែ។

ប្រភពព័ត៌មានពីប្រជាពលរដ្ឋ សុំមិនប្រាប់ឈ្មោះបាន អះអាងថា ពេលនេះ ដីទំនប់កំពុងត្រូវបាន​ឈ្មួញមានលុយ មានអំណាច រំលោភយក ដោយរៀបឥដ្ឋ និង ធ្វើរបងថ្មព័ទ្ធ ធ្វើជាកម្មសិទ្ធិ តែម្តង។

ទោះបីយ៉ាងណាក៏ដោយកម្ពុជាថ្មីមិនទាន់អាចសុំការបំភ្លឺពីភាគីម្ខាងទៀតនៅឡើយនោះទេ។

ប្រជាពលរដ្ឋ បានសំណូមពរយ៉ាងទទូចដល់អាជ្ញាធរពាក់ព័ន្ធក្នុងស្រុកគងពិសី ខេត្តកំពង់ស្ពឺ ជាពិសេស សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តែម្តង សូមមេត្តាជួយអន្តរាគមន៍បញ្ហានេះផង ដើម្បីអោយប្រជាពលរដ្ឋ មានទំនប់ និង មានទឹក ដើម្បីអាស្រ័យផល ធ្វើស្រែចំការ ចិញ្ចឹមជីវិត៕

អត្ថបទ៖ ឌីរៀ