ព័ត៌មានជាតិ

វៀតណាមស្នើគម្រោងកសាងកំពង់ផែធំតម្លៃ ២ ប៊ីលានដុល្លារ នៅភាគខាងត្បូងប្រទេស

បានផុស

៨ ខែ មុន

នៅ

ថ្ងៃចន្ទ ៣ មិថុនា ២០២៤

ដោយ

ក្រុមហ៊ុនវៀតណាមបានស្នើដាក់គម្រោងកសាងកំពង់ផែដឹកទំនិញដ៏ធំ តម្លៃ ២ ប៊ីលានដុល្លារ លើផ្ទៃដី ៣៥០ ហិចតា ស្ថិតលើឆ្នេរសមុទ្រខេត្ត Ba Ria – Vung Tau ភាគខាងត្បូងនៃប្រទេស។ នេះបើតាមការចុះផ្សាយរបស់កាសែត VnExpress កាលពីថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងដឹកជញ្ជូនវៀតណាម បាននិយាយថា មានក្រុមហ៊ុនធំៗចំនួន៣ បានស្នើឱ្យកសាង និងធ្វើឱ្យប្រសើរឡើងនូវកំពង់ផែ Cai Mep Ha ក្នុងក្រុង Phu My Town។ ដំណាក់កាលដំបូងរបស់គម្រោង នឹងអនុវត្តចាប់ពីពេលនេះរហូតដល់ឆ្នាំ ២០៣០ ដែលពាក់ព័ន្ធនឹងការកសាងចំណតផែចំនួន២ ដើម្បីដាក់នាវាកុងតឺន័រផ្ទុកទម្ងន់រហូតដល់ ២៥០ ០០០ DWT ។

ក្រុមហ៊ុនដែលដាក់សំណើរួមមានសាជីវកម្មវិនិយោគទុនរដ្ឋ (SCIC) ក្រុមហ៊ុន Geleximco Group ដែលមានមូលដ្ឋាននៅក្រុងហាណូយ និងក្រុមហ៊ុនដឹកជញ្ជូន និងពាណិជ្ជកម្មអន្តរជាតិ (ITC) ដែលមានមូលដ្ឋាននៅទីក្រុងហូជីមិញ។

បើតាមក្រសួងដឹកជញ្ជូនដដែល នៅក្នុងឯកសារដែលបានផ្ញើទៅរដ្ឋាភិបាលកាលពីសប្តាហ៍មុន សំណើសម្រាប់ដំណាក់កាលទី ១ គឺស្របតាមផែនការមេទាំងមូលរបស់វៀតណាម និងផែនការលម្អិតសម្រាប់កំពង់ផែសមុទ្រ ទៅតាមទំហំ និងមុខងាររបស់នាវា។

ដោយសារតែការវិនិយោគនៃគម្រោងនេះធំ ក្រសួងបាននិយាយថា វិនិយោគិនត្រូវបង្ហាញពីសមត្ថភាពហិរញ្ញវត្ថុរបស់ខ្លួន និងសមត្ថភាពក្នុងការរៀបចំដើមទុនជាមូលដ្ឋាន ដើម្បីទទួលបានការអនុម័តស្របតាមបទប្បញ្ញត្តិ។

គួរគូសបញ្ជាក់ថា បច្ចុប្បន្ន កំពង់ផែសមុទ្រនៅខេត្ត Ba Ria – Vung Tau មានចំណតផែចំនួន ៧ ដែលមានសមត្ថភាពផ្ទុករហូតដល់ ៧,៦៦ លាន/ឆ្នាំ នៃប្រភេទកុងតឺន័រ ២០ហ្វីត (TEUs)។ ទោះយ៉ាងណាក៏ដោយ ការដឹកជញ្ជូនកុងតឺន័រជាមធ្យមក្នុងរយៈពេល ៣ ឆ្នាំចុងក្រោយនេះនៅកំពង់ផែនោះ មានលើសពី ៨ លាន TEUs/ឆ្នាំ ដូច្នេះលើសពីសមត្ថភាពដែលបានកសាងឡើងសម្រាប់ចំណតកុងតឺន័រ។

ក្រោមផែនការមេរបស់រដ្ឋាភិបាលស្ដីពីការអភិវឌ្ឍប្រព័ន្ធកំពង់ផែសមុទ្ររបស់វៀតណាមសម្រាប់ទសវត្សរ៍នេះ ជាមួយនឹងចក្ខុវិស័យដល់ឆ្នាំ ២០៥០ កំពង់ផែ Cai Mep Ha ត្រូវបានកំណត់ថាជាតំបន់កំពង់ផែសមុទ្រអាទិភាពមួយ៕

Related Topics:ប្រទេសវៀតណាម