រដ្ឋមន្រ្តីការពារជាតិកម្ពុជា-ចិន សន្យាពង្រឹង ពង្រីកទំនាក់ទំនងវិស័យយោធាឱ្យកាន់តែល្អប្រសើរ

រដ្ឋមន្រ្តីក្រសួងការពារជាតិកម្ពុជាលោក ទៀ សីហា និងរដ្ឋមន្រ្តីក្រសួងការពារជាតិនៃសាធារណរដ្ឋប្រជាមានិតចិនលោក ទុង ជុន (Dong Jun) បានបង្ហាញការតាំងចិត្តធ្វើឱ្យទំនាក់ទំនងវិស័យយោធាទ្វេភាគីកាន់តែល្អប្រសើរ។
ការថ្លែងបែបនេះ ធ្វើឡើងនៅក្នុងជំនួបទ្វេភាគី នាឱកាសដែលប្រមុខការពារជាតិទាំងពីរ បានអញ្ជើញមកចូលរួមក្នុង កិច្ចប្រជុំកំពូលសន្តិសុខអាស៊ី (Shangri-La) លើកទី ២១ នៅប្រទេសសិង្ហបុរីកាលពីថ្ងៃទី២ ខែមិថុនា ឆ្នាំ២០២៤។

នៅចំពោះមុខរដ្ឋមន្រ្តីការពារជាតិចិន លោក ទៀ សីហា បានគូសបញ្ជាក់ជាថ្មីថា៖« រាជរដ្ឋាភិបាលកម្ពុជាក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅតែបន្តគាំទ្រគោលនយោបាយចិនតែមួយ ហើយទំនាក់ទំនងកម្ពុជា-ចិន មានការរីកចម្រើនលើកិច្ចសហប្រតិបត្តិការរវាងកងទ័ពទាំងពីរមកដល់បច្ចុប្បន្ននេះ ក្រោមការដឹកនាំ របស់សម្ដេចពិជ័យសេនា ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ»។
ក្នុងនាមជាអ្នកបន្តវេន លោក ទៀ សីហា បានសន្យាថានឹងបន្តពង្រឹងពង្រីកកិច្ចទំនាក់ទំនងដែលមានស្រាប់ និងព្យាយាមធ្វើយ៉ាងណាបង្កើននូវទំនាក់ទំនងនេះឱ្យបានកាន់តែល្អប្រសើរឡើងបន្ថែមទៀត។

ជាការឆ្លើយតបលោក ទុង ជុន បានធ្វើការវាយតំលៃខ្ពស់ចំពោះទំនាក់ទំនងកិច្ចសហប្រតិបត្តិការរវាងកងទ័ពនៃប្រទេសទាំងពីរ ។ លោកថ្លែងថា៖« ឯកឧត្តម ទៀ សីហា រដ្ឋមន្ត្រីក្រសួងការពារជាតិកម្ពុជា ជាអ្នកដឹកនាំបន្តវេន នៃកងទ័ពយើងទាំងពីរ កម្ពុជា-ចិន ដើម្បីបន្តដឹកនាំ រឹតចំណងមិត្តភាព និងកិច្ចសហប្រតិបត្តិការរវាងកងទ័ពទាំងពីរ» ។ ឆ្លៀតក្នុងឱកាសនោះដែរ ភាគីទាំងពីរ បានអញ្ជើញទៅបំពេញទស្សនកិច្ចផ្លូវការទៅវិញទៅមកនៅក្នុងឆ្នាំ ២០២៤ ដើម្បីរឹតចំណងមិត្តភាព ពង្រឹង និងពង្រីកកិច្ចសហប្រតិបត្តិការលើផ្នែកយោធា។

សូមជម្រាបថា កងទ័ពកម្ពុជា-ចិន កាលពីថ្ងៃទី​៣០ ខែឧសភា ឆ្នាំ ២០២៤ បានបិទបញ្ចប់វគ្គសមយុទ្ធរួមគ្នា នាគមាស លើកទី ៦ ២០២៤ នៅលើដីគោក នៃទីលានបាញ់គ្រាប់ពិត របស់មជ្ឈមណ្ឌលហ្វឹកហ្វឺនកងរាជអាវុធហត្ថលើផ្ទៃប្រទេស នៅខេត្តកំពង់ឆ្នាំង និងបិទបញ្ចប់សមយុទ្ធកងទ័ពជើងទឹកលើកទី១ នៅលើលម្ហសមុទ្រកម្ពុជា ដោយទទួលបានលទ្ធផលជោគជ័យទ្រង់ទ្រាយធំ។
តាម​រយៈ​សមយុទ្ធរួមគ្នានេះ កង​ទ័​ពប្រទេស​ទាំង​ពីរ​ត្រូវបាន​ពង្រឹង​ស្មារតី​សាមគ្គីភាព​ មិត្តភាពជា​ប្រពៃ​ណី​ល្អ​ប្រសើរ​ បង្កើន​ការ​ផ្លាស់​ប្តូរ​កិច្ច​សហប្រតិបត្តិការ​ សម្រាប់​ឆ្លើយ​តប​ការ​គំរា​ម​កំហែង​សន្តិសុខ​គ្រប់​បែប​យ៉ាង​ នាំ​មក​នូវ​ផលប្រយោជន៍ ​សុភមង្គល​ដល់​ប្រទេស​ជាតិ និង​ប្រជាជន​ទាំង​ពីរ​៕