យុទ្ធនាការពីរថ្ងៃ ​ប្តូរក្រដាសប្រាក់រៀល ចាស់ ទក់ រហែកឥតគិត​សេវា​ នៅ​ខេត្តបន្ទាយមានជ័យ

ធនាគារជាតិនៃកម្ពុជាសាខាខេត្តបន្ទាយមានជ័យ បានសហការជាមួយរដ្ឋបាលក្រុងសិរីសោភ័ណ្ឌ ចុះកិច្ចសហការនិងផ្ដល់ទីតាំងលើការងារចុះផ្សព្វផ្សាយ និងជំរុញការប្រើប្រាស់ KHOR និងប្ដូរប្រាក់រៀល ចាស់ ទក់ រហែក ជូនប្រជាពលរដ្ឋដោយ​ឥតគិត​សេវា​នៅខេត្តបន្ទាយមានជ័យ។

ការប្តូរប្រាក់រៀល ទក់ ចាស់ រហែក នេះ ប្រព្រឹត្តទៅចំនួន ២ ថ្ងៃ នៅថ្ងៃទី ៤ ខែមិថុនា ឆ្នាំ ២០២៤ នៅចំណុចផ្សារ​សិរីសោភ័ណ និងនៅថ្ងៃទី ៦ នៅចំណុចផ្សារចំការគរ។

ធនាគារជាតិនៃកម្ពុជាសាខាខេត្តបន្ទាយមានជ័យ ស្នើសុំកិច្ចសហការចូលរួមរបស់លោកអភិបាលក្រុងសិរីសោភ័ណ
ជាមួយគណៈកម្មការផ្សារសិរីសោភ័ណ និងផ្សារចំការគរ ដើម្បីផ្ដល់ទីតាំងប្រជុំជន​ដើម្បីងាយស្រួលដល់​ក្រុមការងារធនាគារជាតិ​នៃកម្ពុជា និងគ្រឹះស្ថានធនាគារជាតិ និងហិរញ្ញវត្ថុចំនួន ១០ ធ្វើការប្ដូរក្រដាសប្រាក់ ចាស់ ទក់ និងរហែក មិនគិតកម្រៃ និងបើកគណនី​ជូនសាធារណជនឲ្យបានស្រួល។

ធនាគារជាតិនៃកម្ពុជាខេត្តបន្ទាយមានជ័យក៏អំពាវនាវ​ដល់​សាធារណជន ដែលមានក្រដាសប្រាក់ ចាស់ ទក់ និងរហែក អាចទៅប្តូរប្រាក់បាននៅទីតាំងខាងលើដោយមិនគិតកម្រៃសេវា ចាប់ពីម៉ោង ៨:០០ នាទីព្រឹក ដល់ម៉ោង ៣:០០ នាទីរសៀល៕

អត្ថបទ៖ វ៉ាន់ ណាង