ព័ត៌មានជាតិ

កម្ពុជា-គុយបា កំពុងគិតគូរអាហារូបករណ៍សម្រាប់យុវជនសិក្សាជំនាញបច្ចេកវិទ្យា នវានុវត្តន៍ សុខភាព និងកីឡា

បានផុស

៩ ខែ មុន

នៅ

ថ្ងៃអង្គារ ៤ មិថុនា ២០២៤

ដោយ

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និង លោកជំទាវ Milena Caridad Zaldivar Piedra ឯកអគ្គរាជទូតវិសាមញ្ញ និងពេញសមត្ថភាព នៃសាធារណរដ្ឋគុយបា ប្រចាំព្រះរាជាណាចក្រកម្ពុជា បាននិងកំពុងពិភាក្សា គិតគូរ ស្វែងយល់ពីគម្រោងផ្សេងៗ ដែលនឹងផ្តល់ឱកាសអាហារូបករណ៍ដល់យុវជនក្នុងការសិក្សាលើជំនាញបច្ចេកវិទ្យា និងនវានុវត្តន៍ សុខភាព និងកីឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពិភាក្សា គិតគូរ ស្វែងយល់ពីគម្រោងផ្សេងៗ នេះ ក្នុងឱកាស ថ្នាក់ដឹកនាំទាំងពីរ (កម្ពុជា-គុយបា) បានទទួលជួបសម្ដែងការគួរសម និងសំណេះសំណាល នៅទីស្នាក់ការកណ្ដាល ស.ស.យ.ក កាលពីព្រឹកថ្ងៃទី ០៤ ខែមិថុនា ឆ្នាំ ២០២៤ ។

នាឱកាសនោះ ឯកឧត្ដម ហ៊ុន ម៉ានី បានស្វាគមន៍ចំពោះវត្តមានរបស់ លោកជំទាវឯកអគ្គរដ្ឋទូត និងសម្ដែងការអបអរសាទរយ៉ាងកក់ក្ដៅចំពោះការតែងតាំង លោកជំទាវ ជាឯកអគ្គរដ្ឋទូត គុយបា ប្រចាំកម្ពុជា នាពេលថ្មីៗ នេះ ផងដែរ។

ជាមួយនេះ ឯកឧត្ដម ហ៊ុន ម៉ានី សង្ឃឹមថា ក្រោមការដឹកនាំរបស់ លោកជំទាវឯកអគ្គរដ្ឋទូត ទំនាក់ទំនងទ្វេភាគីរវាងប្រទេសកម្ពុជា និងសាធារណរដ្ឋគុយបា នឹងកាន់តែជិតស្និទ្ធបន្ថែមទៀត។

ទន្ទឹមនេះ ថ្នាក់ដឹកនាំកម្ពុជា-គុយបា ក៏បានផ្លាស់ប្ដូរបទពិសោធការងារ និងពិភាក្សាពីកិច្ចសហប្រតិបត្តិការនានា ដែលនឹងរឹតចំណងមិត្តភាព សាមគ្គីភាព រវាងប្រទេសទាំងពីរ ឲ្យកាន់តែប្រសើរឡើងបន្ថែមទៀត ជាពិសេសលើការគិតគូរ និងស្វែងយល់ពីគម្រោងផ្សេងៗ ដែលនឹងផ្តល់ឱកាសអាហារូបករណ៍ដល់យុវជនក្នុងការសិក្សាលើជំនាញបច្ចេកវិទ្យា និងនវានុវត្តន៍ សុខភាព និងកីឡា៕

អត្ថបទ ៖ ពិសី