ខេត្តចំនួន៦ទៀត ត្រៀមប្រកាសបញ្ឈប់ការបន្ទោបង់ពាសវាលពាសកាល នាពេលខាងមុខ

ខេត្តចំនួន៦ទៀត ត្រៀមប្រកាសដាក់ជាខេត្តបញ្ឈប់ការបន្ទោបង់ពាសវាលពាសកាល នាពេលខាងមុខ ដែលនឹងនាំឱ្យរាជធានី-ខេត្តសរុបចំនួន១៣ បញ្ឈប់ការបន្ទោបង់ពាសវាលពាសកាល។ នេះជាការបញ្ជាក់ឱ្យដឹងដោយរដ្ឋមន្ត្រីក្រសួងអភិវឌ្ឍន៍ជនបទ លោក ឆាយ ឫទ្ធិសែន។

បើតាមលោករដ្ឋមន្រ្តី ឆាយ ឫទ្ធិសែន ខេត្តទាំង៦ ដែលក្រសួងអភិវឌ្ឍន៍ជនបទ គ្រោងនឹង​ប្រកាស​បញ្ឈប់ការ​បន្ទោរ​បង់​ពាសវាលពាសកាល ​នា​ពេល​ខាង​មុខ ​រួមមាន៖ ខេត្តព្រះសីហនុ កំពង់ចាម ត្បូងឃ្មុំ បន្ទាយមានជ័យ សៀមរាប និងរតនគិរី។ ក្នុងនោះ ខេត្តព្រះសីហនុ នឹងប្រកាសដាក់ជាខេត្តបញ្ឈប់ការបន្ទោបង់ពាសវាលពាសកាល នាថ្ងៃទី១៣ ខែមិថុនា ឆ្នាំ២០២៤ ខាងមុខ។

ថ្លែងក្នុងវេទិកាពិភាក្សាដែលរៀបចំឡើងដោយក្លិបអ្នកកាសែតកម្ពុជា កាលពីថ្ងៃទី៤ ខែមិថុនា ឆ្នាំ២០២៤ លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានបញ្ជាក់ថា បច្ចុប្បន្ន ខេត្តដែលបញ្ឈប់ការបន្ទោបង់ពាសវាលពាសកាល គឺមានចំនួន ៧ខេត្តរួចហើយ រួមមាន៖ រាជធានីភ្នំពេញ ខេត្ត​ស្វាយរៀង ព្រៃវែង កណ្តាល កំពង់ស្ពឺ កំពង់ឆ្នាំង និង​កែប។

លោករដ្ឋមន្រ្តី ​ក៏បានប្រកាសដែរថា នៅចុង​អាណត្តិ​នេះ ​គ្រប់​ខេត្ត​ទាំងអស់​របស់កម្ពុជានឹង​បញ្ចប់ការ​បន្ទោរបង់​ពាសវាល ពាសកាលទាំងស្រុង​តែម្តង។

គួរជម្រាបថា រាប់ពីឆ្នាំ២០២៣ មកដល់បច្ចុប្បន្ននេះ ក្រសួងអភិវឌ្ឍន៍ជនបទ បានផ្ដល់បង្គន់អនាម័យចំនួន២៨​ ០០០ បង្គន់នៅតាមផ្ទះ និងចំនួន ៧៨បង្គន់អនាម័យ ជាបង្គន់រួម ធ្វើកន្លែងលាងសម្អាតដៃបានចំនួន ២ ៤០០កន្លែង ហើយបានចុះអប់រំអនាម័យ ៣១៣ដង​ផងដែរ៕