អភិបាលខេត្ត ស្នើគយចល័តសហការជាមួយរដ្ឋបាលខេត្ត ពេលចុះប្រតិបត្តិការក្នុងដែនសមត្ថកិច្ចខេត្តត្បូងឃ្មុំ

ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តត្បូងឃ្មុំ នាថ្ងៃទី០៥ ខែមិថុនា នេះ លោក ជាម ច័ន្ទសោភ័ណ អភិបាលខេត្ត ស្នើឲ្យក្រុមគយចល័ត ដែលចុះប្រតិបត្តិការក្នុងដែនសមត្ថកិច្ចខេត្តត្បូងឃ្មុំ គួររាយការណ៍ និងចូលរួមសហការជាមួយរដ្ឋបាលខេត្តត្បូងឃ្មុំ ពិសេសក្នុងនាមលោក ជាអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ដើម្បីបានទទួលព័ត៌មាន ក្តាប់ព័ត៌មាន អាចគ្រប់គ្រងស្ថានការណ៍  និងមានចំណាត់ការបានទាន់ពេលវេលា និងរាយការណ៍បន្តទៅថ្នាក់ជាតិ។

លោក ជាម ច័ន្ទសោភ័ណ ស្នើរបែបនេះ នៅក្រោយពេលដែលក្រុមគយចល័ត បានចុះបង្ក្រាប រឹបអូស ទូរស័ព្ទនាំចូលខុសច្បាប់ចំនួនជាង១ពាន់ទូរស័ព្ទ និងប្រេងម៉ាស៊ីនម៉ូតូជិត២រយកេះ នៅចំណុចផ្សារមេមត់ ស្រុកមេមត់ ខេត្តត្បូងឃ្មុំ កាលពីសប្ដាហ៍មុន។

ជាការកត់សម្គាល់ប្រតិបត្តិការនេះ រងការយល់ច្រឡំ និងរិះគន់យ៉ាងចាស់ដៃ ពីសំណាក់អ្នកប្រើប្រាស់បណ្ដាញទំនាក់ទំនងសង្គមនៅកម្ពុជា។

យ៉ាងណា បើតាមការបញ្ជាក់ឱ្យដឹងរបស់ម្ចាស់ហាងលក់ទូរស័ព្ទយីហោររដ្ឋាមេមត់ មកកាន់ «កម្ពុជាថ្មី» នៅថ្ងៃទី០៥ ខែមិថុនាបានឱ្យដឹងគយចល័តបានប្រគល់ជូនទូរស័ព្ទដែលរឹបអូសកាលពីកន្លង ឱ្យរូបលោក និងហាងផ្សេងទៀតវិញហើយ ប៉ុន្តែប្រគល់ជូនតែទូរស័ព្ទមួយទឹកប៉ុណ្ណោះ ចំណែកទូរស័ព្ទថ្មីដែលបានរឹបអូស​ គឺមិនទាន់ប្រគល់ជូនម្ចាស់ហាងវិញឡើយ ព្រោះស្ថិតក្នុងដំណាក់កាលត្រួតពិនិត្យតាមច្បាប់បន្តសិន។

 ដោយឡែក នៅក្នុងកិច្ចប្រជុំនាថ្ងៃទី០៥ ខែមិថុនា ដដែល លោកអភិបាលខេត្តត្បូងឃ្មុំ  បានបញ្ជាឱ្យមន្ត្រីក្រោមឱវាទត្រូវយកចិត្តទុកដាក់ បង្កើនជីវភាពពលរដ្ឋ និងដោះស្រាយរាល់សំណើរសំណូមពរផ្សេងៗដែលពលរដ្ឋស្នើ៕

អត្ថបទ៖សាន វិឡែម