ព័ត៌មានជាតិ

ផ្លូវជាតិលេខ៤៨ ទៅកោះកុង ស្ថាបនាសម្រេចបានជាង ៦០% គ្រោងបញ្ចប់ក្នុងរដូវប្រាំងឆ្នាំ ២០២៥

បានផុស

៨ ខែ មុន

នៅ

ថ្ងៃសុក្រ ៧ មិថុនា ២០២៤

ដោយ

បើតាមក្រសួងសាធារណការ និងដឹកជញ្ជូន គម្រោងសាងសង់លើកកម្រិតគុណភាពផ្លូវជាតិលេខ ៤៨ ប្រវែងសរុប១៤៨ គីឡូម៉ែត្រ ចាប់ពីចំណុចប្រសព្វជាមួយផ្លូវជាតិលេខ៤ ដល់ក្រុងខេមរភូមិន្ទ ខេត្តកោះកុង សម្រេចវឌ្ឍនភាពបាន ៦០,៥០% គិតត្រឹមដើមខែមិថុនា ឆ្នាំ ២០២៤ នេះ ដែលគ្រោងនឹងបញ្ចប់ការសាងសង់នៅក្នុងឆ្នាំ២០២៥ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍វឌ្ឍនភាពនៃការអនុវត្តគម្រោង រហូតមកដល់ពេលនេះ គម្រោងសាងសង់សម្រេចបានស្របតាមកម្មវិធីផែនការដែលបានកំណត់ គិតត្រឹមដំណាច់ខែឧសភា ឆ្នាំ២០២៤។

ផ្លូវជាតិលេខ ៤៨ ដែលមានប្រវែងសរុប១៤៨ គីឡូម៉ែត្រ ចាប់ផ្តើមពីចំណុចប្រសព្វជាមួយផ្លូវជាតិលេខ៤ ត្រង់គីឡូម៉ែត្រលេខ ១៤១+៧៥០ ស្ថិត ក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង ដែលក្នុងនោះរួមមាន ផ្លូវ ២ គន្លង មានប្រវែង ១១៨,៣៧ គីឡូម៉ែត្រ មានទទឹងផ្លូវ ១៣ ម៉ែត្រ និង ផ្លូវ ៤ គន្លង មានប្រវែង ២៩,៦៣ គីឡូម៉ែត្រ មានទទឹងចាប់ពី ១៦ ម៉ែត្រ ដល់ ២១,៥ម៉ែត្រ។

ក្នុងឱកាសចុះពិនិត្យវឌ្ឍនភាពការងារគម្រោងសាងសង់ផ្លូវជាតិលេខ៤៨ នាថ្ងៃទី៥ ខែមិថុនា ឆ្នាំ២០២៤ លោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រងគម្រោង បានត្រួតពិនិត្យមើលស្ថានភាពជាក់ស្ដែងនៃការអនុវត្តគម្រោង ពិភាក្សាពីបញ្ហាប្រឈម និងដំណោះស្រាយ ព្រមទាំងរៀបចំផែនការសកម្មភាព និងទិសដៅការងារបន្ត សំដៅពន្លឿនការងារសាងសង់ឲ្យសម្រេចរួចរាល់ក្នុងរដូវប្រាំងឆ្នាំ២០២៥។

ដំណើរការស្ថាបនាផ្លូវជាតិលេខ ៤៨ គ្រោងប្រើប្រាស់រយៈពេលសាងសង់ចំនួន ៤២ ខែ អនុវត្តការសាងសង់ដោយសម្ព័ន្ធក្រុមហ៊ុនកូរ៉េ ILSUNG & HANIL Joint Venture ដែលចំណាយថវិកាសរុបប្រមាណ ៨៤,៦៤ លានដុល្លារអាមេរិក ក្រោមឥណទានសម្បទានពីរដ្ឋាភិបាលសាធារណរដ្ឋកូរ៉េ៕