គ្រួសារប្តីប្រពន្ធ​វ័យ​ចំណាស់​ បន្ត​មុខរបរ​ធ្វើសំបក​ណែម ៥ ជំនាន់​ រកចំណូលចិញ្ចឹមជីវិត

ស្រុកឯកភ្នំគឺជាស្រុកមួយ​ក្នុងចំណោម​បណ្តាស្រុកនានា​នៃខេត្តបាត់ដំបង ដែល​មានប្រជាពលរដ្ឋ​ប្រកាន់​យកមុខរបរ​បន្តវេន​ក្នុងនោះមានដូចជា ណែម ក្រឡាន ប្រហិត ជាដើម។

តែពេល​នេះ កម្ពុជាថ្មីបានលើកអំពី​ការតស៊ូរបស់គ្រួសារ​វ័យចំណាស់​មួយគូ ដែលបាន​បន្ត​រក្សា​មុខរបរ​ធ្វើសំបក​ណែមពីដូនតា ៥ ជំនាន់​។

ខណៈ​ដែល​ប្រជាពលរដ្ឋជាច្រើនគ្រួសាររស់នៅស្រុកឯកភ្នំ ខេត្តបាត់ដំបង ចាប់យករបរ​ធ្វើសំបក​ណែម​ដើម្បីរកប្រាក់ចំណូលដោះស្រាយ​ជីវភាពគ្រួសារប្រចាំថ្ងៃ ក្នុង​នោះ​ក៏​មាន​គ្រួសារ​ប្តី​ប្រពន្ធ​ពីរ​នាក់ ក្នុងវ័យចំណាស់ៗដែលជាច្រើនជំនាន់​បាន​ចាប់​របរ​ធ្វើ​សំបកណែមគឺ​គ្រួសារ​អ្នកស្រី ស៊ុត ចេក រស់នៅភូមិដូនទាវ ឃុំពាមឯក ស្រុកឯកភ្នំ។

អ្នកស្រី ស៊ុត ចេក ប្រាប់​ថា បានប្រកបរបរធ្វើសំបក​ណែម​​បន្តវេនពីជីដូនជីតា​ ៥ ជំនាន់មកហើយ គិតជារយះពេលមកដល់បច្ចុប្បន្នជិត ១០០ ឆ្នាំ ដោយពុំបាន​ចាប់​របរ​ការងារណា​ផ្សេងនោះឡើយ។

ស្ត្រីវ័យចំណាស់រូបនេះថា មុខរបរនេះយ៉ាងហោចណាស់ត្រូវការ​មនុស្សពី ២ ទៅ ៣ នាក់ ហើយ​ត្រូវ​ចំណាយ​ពេលវេលាចាប់​ពី ៦ ទៅ ៨ ម៉ោង ក្នុងមួយថ្ងៃ ដើម្បីធ្វើសំបកណែមលក់បាន។ ចាប់​ពីម៉ោង ៤ ទាបភ្លឺ អ្នកស្រីនិងប្តី ត្រូវក្រោកពីដំណេកយក អង្ករត្រាំទឹករយះពេល ៤ ម៉ោង ទើបយក​អង្ករលាង ហើយយកមកកិន​ឲ្យក្លាយជាម្សៅ រួចយកទៅដាក់ជាមួយឧបករណ៍ចំហុយ ជាបន្ទះណែមដាក់លើ​បន្ទះឫស្សី​យកទៅហាលថ្ងៃឲ្យស្ងួត ទើបលក់បាន។

អ្នកស្រីបន្តថា កាលពីមុនអ្នកស្រីធ្វើត្រូវចំណាយពេលយូរ ហើយសំបកណែម​បានចំនួនតិច​ជាងសព្វថ្ងៃ ដោយសម័យនោះប្រើត្បាល់ថ្មកិន​និងដៃ តែពេលនេះប្រើដោយម៉ាស៊ីន វាខុស​គ្នា​ឆ្ងាយ​ណាស់។

សំបកណែម​ដែលអ្នកស្រីធ្វើ​ផ្សំ​ចេញពីសារជាតិអង្ករសុទ្ធសាធ ដោយគ្មាន​លាយជាមួយ​សារធាតុគីមី​ណាមួយ​ឡើយ គឺជាអាហារបែបប្រពៃណី​របស់ដូនតាខ្មែរ​មានឈ្មោះល្បីល្បាញ​លើគុណភាពរសជាតិ សម្រាប់ទីផ្សារក្នុងស្រុករហូតដល់បច្ចុប្បន្ន។

អ្នកស្រីថា «របរនេះ វាពិបាកបន្តិច តែគ្រួសារខ្ញុំតស៊ូបន្តវេនរហូត ៥ ជំនាន់ តាំងពីសម័យកិន​ម្សៅ​និងត្បាល់​ថ្មប្រើដោយកម្លាំងដៃ រហូត​ដល់​បច្ចុប្បន្នប្រើដោយម៉ាសុីនកិន ចំណេញពេល​និងកម្លាំង​ច្រើន ហើយផលិតបន្ទះណែមបានច្រើន អាចរកកម្រៃទ្រទ្រង់ជីវភាពគ្រួសារនិង ផ្គត់ផ្គង់ឲ្យកូន​រៀន​បានចប់ចុងចប់ដើមបានដូចគេឯងដែរ»។

បច្ចុប្បន្នអ្នកស្រី ស៊ុត​ ចេក អាច​ធ្វើ​សំបកណែម​បាន ១៥០០ សំបក ក្នុង ១ ថ្ងៃ ហើយតម្លៃលក់ក្នុង ១ ដុំ ស្មើ ១០០​សំបក​ណែម បាន ០៨ ពាន់រៀល។

អ្នកស្រីថា មុខរបរនេះបើ​ទោះជាប្រាក់កម្រៃ​តិចតួចក្តី ក៏អ្នកស្រីក៏ដូចជា​អ្នកភូមិផ្សេងទៀត អាចរក​បាន​ប្រាក់ចំណូល​មួយផ្នែកទៀត​ពីភ្ញៀវទេសចរ ដែលមកទស្សនា ជាពិសេសគឺអ្នកទេសចរ​អន្តរជាតិ​តែម្ដងដែលនិយមទៅ​ទស្សនាដល់ផ្ទះអ្នកស្រី ហើយបានទិញវត្ថុ​អនុស្សាវរីយ៍​ស្ទើររៀងរាល់ថ្ងៃ​។

«យ៉ាងហោចណាស់ភ្ញៀវទេសចរ មកទស្សនាផ្ទះខ្ញុំចន្លោះពី ៥ ទៅ ២០ នាក់ ក្នុងមួយថ្ងៃ ក្នុងនោះភ្ញៀវខ្លះបានទិញសំបកណែម និងក្រុមខ្លះទៀតគ្រាន់តែទស្សនាហើយ​ ក៏បានជូន​ប្រាក់ដល់គ្រួសាររបស់ខ្ញុំ គ្រាន់បានដោះស្រាយ​ជីវភាពគ្រួសារ។ ចំនួនតាមទឹកចិត្តភ្ញៀវ ខ្លះឲ្យ​ ២ ដុល្លារ ខ្លះក៏ឲ្យ ៣ ដុល្លារ ហើយខ្លះក៏សុំថតធម្មតា តែភ្ញៀវម៉ូតូកង់បី ពេល​មកទស្សនា​ភាគច្រើន​គេជូនប្រាក់​ខ្ញុំមិនដែលខានទេ»។ អ្នក​ស្រី​បន្ថែម។

បើភ្ញៀវទេសចរធ្វើដំណើរតាម​ផ្លូវមាត់អូរ​ចាប់ពីផ្លូវបំបែកផ្សារដូនទាវ ឆ្ពោះទៅកាន់ប្រាសាទឯកភ្នំ ខេត្ត​បាត់ដំបង ភ្ញៀវទេសចរ អាចទស្សនាសំបក​ណែមដែលដាក់​និងផ្ទាំងឫស្សីហាល​ថ្ងៃជាហូរហែ​តាម​ដងផ្លូវ។

តាមរយៈ​មុខ​របរ​នេះ បានធ្វើ​ឲ្យ​អ្នក​ភូមិ​ជាច្រើនគ្រួសារ​ មិនបាច់​ធ្វើចំណាក​ស្រុក​ទៅ​ស្វែង​រកការងារ​ធ្វើនៅក្រៅស្រុកចាកឆ្ងាយពីគ្រួសារ។ របរនេះក៏​កំពុងពេញនិយម​ក្នុងការទាក់ទាញ​ភ្ញៀវទេ​សចរជាតិ និងអន្តរជាតិ ទៅទស្សនា និងទិញសំបកណែមជារៀងរាល់ថ្ងៃ លើសពី​នេះ​ពលរដ្ឋ ក៏អាចរកប្រាក់ចំណូល​ពីភ្ញៀវទៅទស្សនា​បានបបន្ថែមបន្តិចបន្តួចផងដែរ ។

ពលរដ្ឋម្នាក់ទៀត គឺអ្នកស្រី “សាម៉ន” រស់នៅ​នៅភូមិដូនទាវ ក៏​បាន​ចាប់​មុខ​របរធ្វើ​សំបក​ណែម​ជាង ១០ ឆ្នាំ ដើម្បី​ជា​ប្រភព​ចំណូល​ក្នុង​គ្រួសារ ដោយមិនបាច់​ធ្វើចំណាក​ស្រុក​ទៅ​ស្វែង​រកការងារធ្វើនៅ​ក្រៅប្រទេស។

នកស្រី “សាម៉ន” បាន​រៀបរាប់ពីរបៀបធ្វើសំបកណែមថា “អង្ករខ្ញុំដាក់ត្រាំទុកពីយប់ ដល់ព្រឹកឡើង​យកទៅកិននឹង​ម៉ូទ័រ​កិនម្សៅ ហើយយកទៅដាក់ចម្រោះទឹកក្នុងស្បៃប្រមាណមួយម៉ោង រួចយកម្សៅ​ទៅចាក់នឹង​ឧបករណ៍​ចំហុយ​សំបក​ណែម ហើយគ្របវាទុកប្រមាណ ១៥ វិនាទីក្នុងមួយបន្ទះ រួចយក​ទៅដាក់​និង​ផ្ទាំងឫស្សី ប្រវែងទទឹងជាង​កន្លះម៉ែត្រ និងបណ្ដោយប្រមាណ ១ ម៉ែត្រកន្លះ ដើម្បីហាល ថ្ងៃឲ្យស្ងួត​សំបក​ណែមទើបលក់លើទីផ្សារបាន។

បើតាមស្រ្តី​រូបនេះ​ភាគច្រើន​គេយកសំបកណែម មូរ​ធ្វើ​គ្រឿងក្លែម​នៅក្នុងពិធី​មង្គលការ និងនៅតាមភោជនីយដ្ឋានផ្សេងៗជាដើម ខ្លះទៀត​គេនិយម​យកសំបកណែមមូរដាក់សាច់ជ្រូកលាយជាមួយបន្លែ និងស្លឹកជីរមួយចំនួនទៀត សម្រាប់​តម្រូវការ​មនុស្ស​គ្រប់វ័យ បរិភោគ ហើយសំបកណែម អាចរក្សាទុកយ៉ាងយូត្រឹមរយះពេល២ខែ ខូចគុណភាព។

អ្នកស្រីអះអាង​ថា របរនេះត្រូវការកម្តៅថ្ងៃ បើខែភ្លៀងជួបផលលំបាក​ខ្លាំង។

យ៉ាងណាមិញ អាជ្ញាធរឃុំពាមឯក បានឲ្យដឹងថា ប្រជាពលរដ្ឋប្រកបរបរផលិត​សំបកណែម​នៅក្នុង​ឃុំនេះ​មា​នជិត ៧០ គ្រួសារ នៅក្នុងភូមិចំនួន០៣ នៃស្រុកឯកភ្នំ ក្នុងនោះមាន ភូមិសួអី ភូមិពាមឯក និង​ភូមិដូនទាវ ហើយនៅក្នុងភូមិទាំង០៣ខាងលើ នេះ គឺភូមិដូនទាវ មានអ្នកធ្វើច្រើនជាងគេ​ប្រមាណ ៣០​គ្រួសារ។

ប្រភពដដែលបន្តថា របរនេះប្រជាពលរដ្ឋធ្វើជាលក្ខណៈគ្រួសារ ហើយរដូវដែលអ្នកភូមិលក់សំបកណែម​បាន​ច្រើន​ចាប់​ពីខែធ្នូ ដល់ ខែមេសា។

នៅឃុំពាមឯក មានរមណីយដ្ឋានទេសចរណ៍ធម្មជាតិប្រាសាទឯកភ្នំមួយកន្លែង ហើយ​កន្លែង​ផលិត​សំបក​ណែម ក៏ជាកន្លែងទេសចរណ៍មួយផ្នែកដែរ ក្រោយពីភ្ញៀវទស្សនាប្រាសាទ។

បើតាមមន្ត្រីទេសចរណ៍ខេត្ត ក្រៅពីភ្ញៀវទេសចរបានចូលទស្សនា រមនីយដ្ឋាន​ទេសចរណ៍​ធម្មជាតិ​ប្រាសាទឯកភ្នំ គោលដៅផលិតសំបកណែម ក៏ជាទីកន្លែងមួយទាក់ទាញ​ភ្ញៀវទេសចរចូលទៅ​ទស្សនា​ផងដែរ។

មន្ត្រីដដែលថា ភ្ញៀវទេសចរអន្តរជាតិដែលចូលទៅទស្សនា​កន្លែងផលិតសំបកណែម គឺស្វែង​យល់​ពីជីវិតការរស់នៅ​របស់អ្នកស្រុក ធ្វើឲ្យពលរដ្ឋមួយចំនួនអាចរកប្រាក់ចំណូលបាន ដោយមិនបាច់​ទៅធ្វើ​ចំណាកស្រុក៕

អត្ថបទ៖ សៅ សារិទ្ធ