ព័ត៌មានជាតិ

ប្រកាសសាខា និងបញ្ចូលសមាជិកបក្សជាង ៥០០ រូប ឈានឆ្ពោះយកជ័យជម្នះបោះឆ្នោតឆ្នាំ ២០២៧-២០២៨

បានផុស

១០ ខែ មុន

នៅ

ថ្ងៃអាទិត្យ ៩ មិថុនា ២០២៤

ដោយ

គណបក្សរាជធានីភ្នំពេញ បានធ្វើពិធីប្រកាសសាខាគណបក្ស ភ.ព ១៦ ភ.ព ១៧ ភ.ព ១៨ កែសម្រួលសមាសភាពសមាជិកសាខាគណបក្ស ភ.ព ១១ ភ.ព ១៤ និងបញ្ចូលសមាជិក-សមាជិកាគណបក្សប្រជាជនកម្ពុជា ចំនួនជាង ៥០០ រូប ដើម្បីឈានឆ្ពោះទៅយកជ័យជម្នះក្នុងការបោះឆ្នោតឆ្នាំ ២០២៧-២០២៨។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះធ្វើឡើងកាលពីព្រឹកថ្ងៃទី ០៩ ខែមិថុនា ឆ្នាំ ២០២៤ នេះ ក្រោមអធិបតីភាព លោក ឃួង ស្រេង សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សរាជធានីភ្នំពេញ នៅមន្ទីរគណបក្សប្រជាជនកម្ពុជារាជធានីភ្នំពេញ ផ្លូវ ២០០៤ ខណ្ឌសែន សុខ។

លោក ឃួង ស្រេង មានប្រសាសន៍លើកឡើងថា ការប្រកាសសាខាគណបក្ស ភ.ព ១៦ ភ.ព ១៧ ភ.ព ១៨ កែសម្រួលសមាសភាពសមាជិកសាខាគណបក្សភ.ព ១១ ភ.ព ១៤ និងបញ្ចូលសមាជិក-សមាជិកាគណបក្សប្រជាជនកម្ពុជារាជធានីភ្នំពេញ នាពេលនេះ ដើម្បីត្រៀមឈានឆ្ពោះទៅយកជ័យជម្នះក្នុងការបោះឆ្នោតឆ្នាំ ២០២៧-២០២៨ ខាងមុខ។ គណបក្សប្រជាជនកម្ពុជា បានដាក់ចេញនូវគោលនយោបាយច្បាស់លាស់ប្រាកដនិយមខ្ពស់។ តាមរយៈការបញ្ចូលសមាជិកថ្មីចំនួនជាង ៥០០ រូបនេះ ពិតជាបានឆ្លុះបញ្ចាំងឲ្យឃើញកាន់តែច្បាស់ពីភាពដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលបានធ្វើឲ្យប្រទេសជាតិមានការអភិវឌ្ឍរីកចម្រើនរុងរឿង។ សមាជិក-សមាជិកាទាំងជាង ៥០០ នាក់នេះ នឹងក្លាយជាប្រតិបត្តិករ ពោរពេញទៅដោយចំណេះដឹងរបស់គណបក្សប្រជាជនកម្ពុជា ទៅថ្ងៃអនាគត។

លោក ឃួង ស្រេង បន្តថា តាមរយៈគម្រោង “ព្រែកជីកហ្វូណន-តេជោ” យើងពិតជាបានឃើញច្បាស់ពីនរណាដែលជាអ្នកស្នេហាជាតិ ហើយនរណាជាអ្នកបំផ្លិចបំផ្លាញជាតិពិតប្រាកដ។ គណបក្សប្រជាជនកម្ពុជា បានរំដោះជាតិពីរបបប្រល័យពូជសាសន៍ប៉ុលពត ហើយបន្តនូវការកសាងប្រទេសជាតិ រហូតមានការអភិវឌ្ឍរីកចម្រើនលើគ្រប់វិស័យមកដល់សព្វថ្ងៃនេះ។

លោក ឃួង ស្រេង លើកឡើងទៀតថា សន្តិភាព សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា រកបានមកដោយលំបាក ដូច្នេះយើងត្រូវរួមគ្នាការពារសន្តិភាពនេះឲ្យបានដាច់ខាត ទោះក្នុងតម្លៃណាក៏ដោយ។ បន្ថែមពីនេះ សម្ដេចតេជោ នៅបានរំដោះអាយុជីវិតប្រជាពលរដ្ឋចេញពីជំងឺឆ្លងដ៏កាចសាហាវកូវីដ-១៩ ថែមទៀត។ ផ្ដល់សិទ្ធិសេរីភាពគ្រប់យ៉ាងជូនប្រជាពលរដ្ឋ អ្វីដែលសំខាន់នោះ គឺសិទ្ធិរស់រានមានជីវិត ក្នុងចំណោមសិទ្ធិទាំង ១០ របស់អង្គការអន្តរជាតិ។ ជាងនេះទៅទៀត គណបក្សប្រជាជនកម្ពុជា នូវបានដោះស្រាយបញ្ហាធំៗ របស់ជាតិ យ៉ាងច្រើនទៀត រួមទាំងការដោះស្រាយការជាប់គាំងនយោបាយ ការទប់ស្កាត់ជំងឺកូវីដ-១៩ ការស្ដារធ្វើឲ្យមានកំណើនសេដ្ឋកិច្ចជាតិ និងការធ្វើឲ្យកេរ្តិ៍ឈ្មោះកម្ពុជា លេចមុខលេចមាត់នៅលើឆាកអន្តរជាតិ។