សម្តេចធិបតី៖ការបណ្តេញមន្រ្តីចេញពីក្រប​ខណ្ឌ ដើម្បីលើកកម្ពស់ការទទួលខុសត្រូវ

នាយករដ្ឋមន្រ្តី សម្តេចធិបតី ហ៊ុន ម៉ាណែត នៅក្នុងរជ្ជកាលរដ្ឋាភិបាលអាណត្តិទី ៧ នេះ បានកំពុងខិតខំប្រឹងប្រែងក្នុងការដោះស្រាយការប្រព្រឹត្តអំពើពុករលួយក្នុងជួរមន្ត្រីរាជការ និងភាពមិនប្រក្រតីនានា ដោយ​បាន​បន្តអនុវត្តវិធានការយ៉ាងតឹងរឹងនូវអភិក្រមទាំង៥។ ការអនុវត្តអភិក្រមទាំង​៥​ នោះរួមមាន ទី១- ឆ្លុះកញ្ចក់ ទី២-ងូតទឹក ទី៣- ដុសក្អែល ទី៤- ព្យាបាល ទី៥- វះកាត់ ដើម្បីលើកកម្ពស់ការទទួល​ខុសត្រូ​វ​របស់​មន្រ្តីរាជការ ទាំងក្នុងរាជការស៊ីវិល និងកងកម្លាំងប្រដាប់អាវុធ។

នេះបើតាមការថ្លែងឡើងរបស់សម្តេចធិបតី ក្នុងពិធី “បិទវគ្គបណ្តុះបណ្តាលឆ្នាំ២០២៣ និង បើកវគ្គបណ្តុះបណ្តាលឆ្នាំ២០២៤ របស់សាលាភូមិន្ទរដ្ឋបាល”​ ។

សម្តេចធិបតី បានលើកឡើងថា រាជរដ្ឋាភិបាលអាណត្តិទី​៧ ក្នុងរយៈពេល ៩ខែមកនេះ គឺបាន​លើក​ទឹកចិត្តឱ្យបន្តអនុវត្តអភិក្រមទាំង៥ ក្នុងនោះអភិក្រមចំនួន៤ គឺធ្វើបានច្រើនហើយ ចំណែកអភិក្រមទី៥ ដែល​ជាដំណាក់កាលវះកាត់ ក៏ធ្វើបានច្រើនដូចគ្នា ដើម្បីលើកកម្ពស់ការទទួលខុសត្រូវេរបស់មន្រ្តីរាជការ។ សម្តេចធិបតី សង្កត់ធ្ងន់ថា៖«ជាក់ស្តែងការដាក់ពិន័យ បានទម្លាក់ឋានន្តរស័ក្តិ ឬឈានដល់​ការវះកាត់បណ្តេញចេញពីក្របខណ្ឌ ចំពោះកងនគរបាល កងទ័ព ដែលប្រព្រឹត្តបទល្មើសផ្សេងៗ ពិសេសបទល្មើសធ្ងន់ធរដូចជាការបាញ់បោះ ជួញដូរ និងប្រើប្រាស់គ្រឿងញៀន» ។

បើតាមសម្តេចធិបតី៖« ថ្មីៗនេះ នៅក្រសួងពាណិជ្ជកម្ម ក៏បានចាត់វិធានការចំពោះមន្រ្តី ក.ប.ប. ខេត្តកំពង់ឆ្នាំង ៥ រូប ដែលបានអនុវត្តខុសនីតិវិធី ហើយឆ្លៀតកេងចំណេញ។ ឯកឧត្តម​ ស៊ុន សុវណ្ណារិទ្ធិ (អភិបាលខេត្តកំពង់ឆ្នាំង) រាយការណ៍ ដំបូងគេផ្អើលគយ ប៉ុន្តែឆែកទៅមន្រ្តី ក.ប.ប.»។

សម្តេចធិបតីបន្ថែមទៀតថា ការអនុវត្តវិធានការទាំងអស់នេះ គឺជាកិច្ចការសំខាន់​ព្រោះមន្រ្តីជាអ្នក​បម្រើរាស្រ្ត ហើយសម្តេចតេជោ ហ៊ុន សែន ធ្លាប់មានប្រសាសន៍ហើយថា មន្រ្តីជាអ្នកបម្រើរាស្រ្ត មិនមែនជាចៅហ្វាយរបស់រាស្រ្តទេ។

ក្រសួងពាណិជ្ជកម្ម ថ្មីៗនេះ បានដាក់ទណ្ឌកម្មខាងវិន័យយ៉ាងតឹងរឹង និងធ្ងន់ធ្ងរ ចំពោះមន្រ្តី​៥រូប​ ស្របតាមបញ្ញត្តិនៃច្បាប់ និងទោសកំហុសដែលបានប្រព្រឹត្ត។ ការដាក់ទណ្ឌកម្មនេះ ក្រោយពី​មន្រ្តីទាំងនោះ កាលពីថ្ងៃទី៤ខែមិថុនា  ២០២៤ បានចុះត្រួតពិនិត្យទំនិញនៅផ្សាររមាស ឃុំអភិវឌ្ឍ ស្រុកទឹកផុស ខេត្តកំពុងឆ្នាំង។ ប៉ុន្តែនៅពេលអនុវត្ត មន្រ្តីទាំង​៥រូប ពុំបានអនុវត្តឱ្យ​បានត្រឹមត្រូវស្រប​តាមនីតិវិធីនៃការពិន័យជាអន្តរការណ៍ ដែលជាការប្រព្រឹត្តខុសនៃនីតិវិធីច្បាប់ជាធរមាន៕
អត្ថបទ៖ ឡាយ សាមាន