ព័ត៌មានជាតិ

ផ្ទះជាង ២ ៥០០ ខ្នង រងការបំផ្លាញដោយខ្យល់កន្ត្រាក់រយៈពេល ៥ ខែ ឆ្នាំនេះ

បានផុស

៩ ខែ មុន

នៅ

ថ្ងៃអង្គារ ១១ មិថុនា ២០២៤

ដោយ

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១១ មិថុនានេះ ឱ្យដឹងថា រយៈពេល ៥ ខែ ឆ្នាំ ២០២៤ នេះ ខ្យល់កន្ត្រាក់បានកើតឡើងចំនួន ១៣៨ លើក បណ្តាលឱ្យផ្ទះរលំខូចខាតធ្ងន់ធ្ងរ ២៩០ ខ្នង របើកដំបូល និងខូចខាតមធ្យម ២ ២៥៥ ខ្នង របើកដំបូលសាលារៀន ២៧ ខ្នង របើកតូបផ្សារ ៦ តូប អគាររដ្ឋបាល ៨ កន្លែង ស្លាប់មនុស្ស ៣ នាក់ និងរបួស ១៧ នាក់។

លោក សុទ្ធ គឹមកុលមុនី បានបន្តថា តួលេខនេះបើធៀបទៅនឹងរយៈពេល ៥ ខែ ដូចគ្នា កាលពីឆ្នាំ ២០២៣ កន្លងទៅ ឃើញថា មានការថយចុះគួរឱ្យកត់សម្គាល់ ដោយ ៥ ខែ ឆ្នាំមុន ខ្យល់កន្ត្រាក់បានកើតឡើង ១៥៥ លើក បណ្ដាលឱ្យផ្ទះ ១ ១៦៤ ខ្នង ដួលរលំ និង ៩ ៧១៥ ខ្នង របើកដំបូល ខណៈមនុស្ស ៦ នាក់ស្លាប់ និងរបួស ៩៩ នាក់ ខណៈ ៥ ខែ ឆ្នាំ ២០២២ ខ្យល់កន្ត្រាក់បានកើតឡើងចំនួន ២១០ លើក បណ្តាលឱ្យរលំផ្ទះចំនួន ១ ១១០ ខ្នង ផ្ទះរបើកដំបូលចំនួន ៩ ៥៣៣ ខ្នង ខូចខាតសាលារៀនចំនួន ៦៤ ខ្នង ស្លាប់មនុស្សចំនួន ៣ នាក់ និងរបួស ៦៦ នាក់។

យោងតាមក្រសួងធនធានទឹក និងឧតុនិយម បានឱ្យដឹងថា ចាប់ពីថ្ងៃទី ១០ ដល់ថ្ងៃទី ១២ ខែមិថុនា ឆ្នាំ ២០២៤ កម្ពុជា អាចមានភ្លៀងផ្គររន្ទះ និងខ្យល់កន្ត្រាក់គ្រប់ដណ្ដប់លើផ្ទៃដីតំបន់វាលទំនាប ១៥០% តំបន់ខ្ពង់រាប ២០% និងតំបន់មាត់សមុទ្រ ២៥%៕

អត្ថបទ ៖ សំអឿន