អ្នកលក់ទឹកកកឈូស អាចរកប្រាក់ចំណេញទាបបំផុត១០ម៉ឺនរៀលក្នុងមួយថ្ងៃ

បុរសម្នាក់ក្នុងវ័យ២៨ឆ្នាំ រស់នៅឯខេត្តព្រះវិហារបានសម្រេចចិត្តមករកសុីនៅភ្នំពេញទីបំផុតបានយកមុខរបរលក់ទឹកកកឈូសបានទទួលកម្រៃគួរសម។

ក្នុងលក្ខខណ្ឌសុំមិនបញ្ចេញឈ្មោះ បុរសរូបនោះបានឲ្យ កម្ពុជាថ្មី ដឹងថា រូបគាត់រស់នៅទីរួមខេត្តព្រះវិហារដែលមុខរបរពីមុន គឺដឹកឥវ៉ាន់ឲ្យគេបានកម្រៃត្រឹម២០០០០រៀលក្នុងមួយថ្ងៃ។ ដោយសារកម្រៃជើងសារគ្រាន់តែបានមួយចម្អែតក្រពះតែខ្លួនឯង លោកក៏សម្រេចចិត្តចាកចេញពីស្រុកកំណើតមករស់នៅភ្នំពេញដោយជួលបន្ទប់ស្នាក់នៅក្នុងតម្លៃ២៥ដុល្លារក្នុងមួយខែ ដោយពុំទាន់គិតពីថ្លៃទឹក និងភ្លើង។

លោកបានបន្ថែមថា មុនដំលោកចង់មកធ្វើការកម្មករសំណង់ប៉ុន្តែប្អូនពុំមានបច្ចេកទេសឲ្យពិតប្រាកដ មេការសំណង់គេមិនត្រូវការ។ លុះចុងក្រោយលោកក៏សម្រេចចិត្តទិញរទេះកង់២មកផ្សារផ្អោបជាមួយម៉ូតូដើម្បីលក់ទឹកកកឈូសលាយជាមួយបង្អែមគ្រប់មុខ។ នារដូវក្តៅខែមុនប្អូនលក់ទឹកកកឈូសសឹងឈូសមិនទាន់ឲ្យម៉ូយ ពិសសេសនៅពេលកម្មករចេញពីធ្វើការថ្ងៃត្រង់។

បុរសអ្នកខេត្តព្រះវិហារបានបញ្ជាក់ទាំងទឹកមុខញញឹមស្រស់ថា លោកសម្រេចចិត្តលក់ទឹកកកឈូសហើយ ព្រោះក្នុងមួយថ្ងៃលោកអាចរកប្រាក់ចំណេញយ៉ាងទាបបំផុត១០មុឺនរៀល ព្រោះទឹកកកឈូស១កែវថ្លៃ២០០០រៀល ទៅ៣០០០រៀលឯណោះ៕

អត្ថបទ៖ នរា