ព័ត៌មានជាតិ

មនុស្សស្លាប់-របួសជាង ៥០ នាក់ ដោយសារអគ្គិភ័យរយៈពេល ៥ ខែ ឆ្នាំនេះ

បានផុស

៨ ខែ មុន

នៅ

ថ្ងៃអង្គារ ១១ មិថុនា ២០២៤

ដោយ

ក្នុងរយៈពេល ៥ ខែ ឆ្នាំ ២០២៤ នេះ គ្រោះអគ្គិភ័យបានកើតឡើងជាង ៤៤០ លើក បណ្តាលឱ្យមនុស្សស្លាប់ និងរងរបួសជាង ៥០ នាក់ មានការកើនឡើងបើធៀបទៅនឹងរយៈពេល ៥ ខែដូចគ្នាឆ្នាំ ២០២៣ កន្លងទៅ។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១១ មិថុនា នេះថា គ្រោះអគ្គិភ័យក្នុងរយៈពេល ៥ ខែ ឆ្នាំ ២០២៤ នេះ បានកើតឡើងចំនួន ៤៤១ លើក បណ្តាលឱ្យឆេះផ្ទះ ៤៦៣ ខ្នង តូបផ្សារ ៥៧ តូប ឃ្លាំងទំនិញ ៩ កន្លែង រោងចក្រសិប្បកម្ម ១៦ កន្លែង អគាររដ្ឋបាល ៦ កន្លែង ស្លាប់មនុស្ស ១២ នាក់ និងរបួស ៤១ នាក់។

លោកបានបន្តថា ក្នុងចំណោមអ្នកស្លាប់ ១២ នាក់ ក្នុងនោះ នៅរាជធានីភ្នំពេញមានចំនួន ១ នាក់ រងរបួស ៨ នាក់ ឆេះផ្ទះ ៨៨ ខ្នង ឆេះតូបផ្សារ ១៦ តូប ឃ្លាំងទំនិញ ៣ កន្លែង រោងចក្រសិប្បកម្ម ៣ កន្លែង និងអគាររដ្ឋបាល ២ កន្លែង ក្នុងករណីអគ្គិភ័យ ៦៤ លើក។ បន្ទាប់មកខេត្តកណ្តាល ក្រចេះ កំពង់ធំ កំពង់ឆ្នាំង បាត់ដំបង និងខេត្តព្រះវិហារស្លាប់ ១ នាក់ៗ ខេត្តតាកែវស្លាប់ ២ នាក់ និងខេត្តសៀមរាបស្លាប់ ៣ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា តួលេខនេះបើប្រៀបធៀបទៅនឹងរយៈពេល ៥ ខែដូចគ្នាឆ្នាំ ២០២៣ ឃើញថា មានការកើនឡើងគួរឱ្យកត់សម្គាល់ ដោយ ៥ ខែឆ្នាំមុន អគ្គិភ័យបានកើតឡើងចំនួន ៣០៤ លើក បណ្តាលឱ្យឆេះផ្ទះចំនួន ៣៤៣ ខ្នង ឆេះតូបផ្សារ ២៣ តូប ឃ្លាំងទំនិញ ៨ កន្លែង សាលារៀន ១ ខ្នង អគាររដ្ឋបាល ៨ កន្លែង រោងចក្រសិប្បកម្ម ៩ កន្លែង ស្លាប់មនុស្ស ១៤ នាក់ និងរបួស ២៣ នាក់។

បើតាម លោកឧត្ដមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ធ្លាប់បានបញ្ជាក់ថា ដើមចមដែលនាំឲ្យមានគ្រោះអគ្គិភ័យកើតឡើង បណ្ដាលមកពីការឆ្លងចរន្តអគ្គិសនីចំនួន ៤១.៥៥ ភាគរយ, ប្រើប្រាស់ភ្លើងចំនួន ៣៨.២៤ ភាគរយ និងក្ដាប់មិនបានចំនួន ២០.២១ ភាគរយ៕

អត្ថបទ ៖ សំអឿន