ព័ត៌មានជាតិ

ចំណែកទីផ្សាររថយន្តថ្មីកើនឡើងដល់ ៥០% ខណៈការលក់រថយន្តជជុះធ្លាក់ចុះ

បានផុស

៣ ខែ មុន

នៅ

ថ្ងៃពុធ ១២ មិថុនា ២០២៤

ដោយ

ចំណែកទីផ្សាររថយន្តថ្មីនៅប្រទេសកម្ពុជាមានការកើនឡើងដល់ ៥០% ដែលជាកំណើនមួយខ្ពស់គួឱ្យកត់សម្គាល់នៅក្នុងរយៈពេល ប៉ុន្មានឆ្នាំចុងក្រោយនេះ ខណៈការលក់រថយន្តជជុះក៏ធ្លាក់ចុះដូចគ្នា។ នេះបើតាមការឱ្យដឹងពីលោក សាយ រតនៈ ប្រធានគ្រប់គ្រងការសិក្សា និងអភិវឌ្ឍក្រុមហ៊ុន អ អិម អេ ខេមបូឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាយ រតនៈ មានប្រសាសន៍នៅថ្ងៃទី ១២ ខែមិថុនា ឆ្នាំ ២០២៤នេះថា បច្ចុប្បន្ន ប្រជាជនខ្មែរ មានការយល់ដឹងច្រើន គាត់បានផ្លាស់ប្ដូរផ្នត់គំនិតថ្មី ចាកចេញពីការប្រើប្រាស់រថយន្តមួយទឹក ទៅរថយន្តថ្មី ដែលមានកំណើនដល់ ៥០ ភាគរយ នាប៉ុន្មានឆ្នាំចុងក្រោយនេះ។

លោក សាយ រតនៈបញ្ជាក់ថា៖ «ដោយសារតែតម្លៃឡានថ្មី ប្រហាក់ប្រហែល នឹងឡានជជុះនៅស្រុកគេ ដែលគេប្រើ ១០ ទៅ ២០ ឆ្នាំ បានយកមកប្រើនៅស្រុកខ្មែរ ការលក់រថយន្តជជុះបានធ្លាក់ចុះ ៥០% ខណៈប្រជាជនខ្មែរ មានការយល់ដឹងខ្ពស់ ដែលនេះក៏ជាកត្តាជំរុញឱ្យសេដ្ឋកិច្ចកម្ពុជារីកចម្រើន»។

បើយោងតាមរបាយការណ៍របស់ធនាគារជាតិនៃកម្ពុជាបានឱ្យដឹងថា ការនាំចូលរថយន្តរបស់កម្ពុជានៅក្នុងឆ្នាំ២០២៣ បានធ្លាក់ចុះរហូតដល់ជិត៣៦% បើធៀបនឹងឆ្នាំ២០២២។

កម្ពុជាបានចំណាយទឹកប្រាក់ចំនួន ៣៨៥ លានដុល្លារ ទៅលើការនាំចូលរថយន្តពីទីផ្សារអន្តរជាតិនៅក្នុងរយៈពេល ៥ ខែ ដើមឆ្នាំនេះ ធ្លាក់ចុះ ១៦ ភាគរយ បើធៀបនឹងរយៈពេលដូចគ្នា កាលពីឆ្នាំមុន។ នេះបើតាមរបាយការណ៍របស់ក្រសួងពាណិជ្ជកម្ម៕