សម្ដេចធិបតី ថា កម្ពុជាត្រូវមានសមត្ថភាពម្ចាស់ការក្នុងកម្រិតណាមួយ មិនត្រូវពឹងគេទាំងស្រុងទេ

សម្ដេចធិបតី ហ៊ុន ម៉ាណែត បានថ្លែងថា កម្ពុជាត្រូវតែមានសមត្ថភាពម្ចាស់ការដោយខ្លួនឯងក្នុងកម្រិតណាមួយ ដោយមិនត្រូវពឹងផ្អែកលើគេទាំងស្រុងនោះឡើយ ពោល គឺកម្ពុជាត្រូវដងដង្ហើមតាមច្រមុះខ្លួនឯងលើគ្រប់វិស័យ។

ថ្លែងចេញពីពិធីប្រគល់សញ្ញាបត្រជូននិស្សិតនៃសាកលវិទ្យាល័យ លីមកុកវីង នាព្រឹកថ្ងៃទី១៣ ខែមិថុនា ឆ្នាំ២០២៤នេះ សម្ដេចធិបតី ហ៊ុន ម៉ាណែត មានប្រសាសន៍ថា ចាប់ពីពេលនេះ កម្ពុជា ត្រូវតែមានឯករាជ្យភាពដោយខ្លួនឯង ពោលគឺដកដង្ហើមតាមច្រមុះខ្លួនឯងលើគ្រប់វិស័យ ដោយមិនពឹងផ្អែកលើប្រទេសដទៃឡើយ។ ក្នុងន័យនេះ សម្ដេចធិបតី បញ្ជាក់ ថា មិនមែនកម្ពុជា ត្រូវនៅតែឯងក្នុងភាពឯកោទេ។ ផ្ទុយទៅវិញ កម្ពុជា ក៏នៅតែបន្តកិច្ចសហប្រតិបត្តិការ និងផ្លាស់ប្ដូរបទពិសោធទៅវិញទៅមកជាមួយប្រទេសជាមិត្តទាំងអស់ ដើម្បីផលប្រយោជន៍ជាតិ និងប្រជាជន។

សម្ដេចធិបតី លើកឡើងដូច្នេះថា៖ «ពិតណាស់ ប្រទេសយើងមិនអាចនៅឯកោទេ យើងត្រូវសហប្រតិបត្តិការ យើងត្រូវរៀន យើងត្រូវច្បាមយកបន្ថែម ការផ្លាស់ប្ដូរបទពិសោធជាមួយប្រទេសផ្សេងៗ តែងត្រូវធ្វើជាប់ជាប្រចាំ ប៉ុន្តែសមត្ថភាពក្នុងការធានាម្ចាស់ការ នៅក្នុងកម្រិតណាមួយ ត្រូវតែមាន មិនអាចពឹងគេទាំងស្រុងនោះទេ»។

ការលើកឡើងបែបនេះ សម្ដេចធិបតី ចង់សំដៅដល់ការពង្រឹងធនធានមនុស្សរបស់កម្ពុជាកាន់តែខ្លាំង ដើម្បីប្រកួតប្រជែងជាមួយបណ្ដាប្រទេសផ្សេងៗ ក៏ដូចជាដើម្បីបម្រើឱ្យប្រយោជន៍ ដោយមិនពឹងផ្អែកគេ ក៏អាចឱ្យយើងរស់បាន។ សម្ដេចធិបតី ចាត់ទុកការពង្រឹងលើធនធានមនុស្ស គឺពិតជាមានសារសំខាន់ខ្លាំងណាស់ ក្នុងការចូលរួមអភិវឌ្ឍន៍ប្រទេសជាតិឱ្យកាន់តែរីកចម្រើន៕