សម្តេចធិបតី៖កម្ពុជាត្រៀមខ្លួនជាស្រេចចាក​ចេញ​ពីប្រទេសអភិវឌ្ឍន៍តិចតួច ទោះបីបាត់ការអនុគ្រោះ

នាយករដ្ឋមន្រ្តី សម្តេចធិបតី ហ៊ុ​ន ម៉ាណែត​ បានបញ្ជាក់ជំហរជាថ្មីថា កម្ពុជាបានត្រៀមខ្លួនជាស្រេច​ដើម្បីចាកចេញពីប្រទេសដែលមានការអភិវឌ្ឍន៍តិចតួច (LDC) ហើយក្លាយជាប្រទេសអ្នកមាននៅឆ្នាំ ២០៥០ តាមរយៈការពង្រឹងធនធានមនុស្ស និងពង្រឹងឯករាជ្យភាពយរបស់ខ្លួនក្នុងការកសាងប្រទេស។

នាឱកាសអញ្ជើញជាអធិបតី “ប្រគល់សញ្ញាបត្រជូនដល់និស្សិត នៃសាកលវិទ្យាល័យ លីមកុងវីង”​ ថ្ងៃទី​១៣​ ខែមិថុនា ឆ្នាំ ២០២៤ សម្តេចធិបតី ហ៊ុន ម៉ាណែត បានថ្លែងថា កម្ពុជាកំពុងតែ​នៅលើផ្លូវដើរចេញពី​ប្រទេសដែលមានការអភិវឌ្ឍន៍តិចតួច ទោះបីជួបបញ្ហាប្រឈមច្រើនក៏ដោយ។ បញ្ហាប្រឈមដែលសំដៅនោះ គឺនៅពេលដែលរួចផុតពីប្រទេសមានការអភិវឌ្ឍន៍តិចតួច កម្ពុជានឹងបាត់បង់​ការលើក​ទឹកចិត្តផ្នែក​ពន្ធ ឬប្រយោជន៍ផ្សេងៗពីអន្តរជាតិ ។

សម្តេចធិបតី ថ្លែងថា៖«បើយើងនៅជា​ប្រទេស​អភិវឌ្ឍន៍តិចតួច យើងមាន​ផលប្រយោជន៍មួយចំនួន គេឱ្យយើងខ្ចីថវិកាអត្រាការប្រាក់ទាប។ ពេលយើង​ចេញពីនេះ គោលការណ៍អនុគ្រោះមួយចំនួនគេលែងឱ្យយើងទៀតហើយ »។
យ៉ាងណាមិញ សម្តេចថ្លែងថា​ ការត្រៀមដើរចេញពីប្រទេស LDC ដោយសារកម្ពុជាបច្ចុប្បន្នអាចរក្សាបាននូវស្ថិរភាពគ្រប់វិស័យ និងការកសាងធនធានមនុស្ស ដើម្បីជួយដល់ការអភិវឌ្ឍប្រទេសដោយខ្លួនឯង។
សម្តេចថ្លែងថា៖«យើងអត់ត្រូវការរស់ដោយសារការពិន័យរបស់គេទេ យើងត្រូវការរស់ខ្លួនឯងទើបមានចីរភាព និងខ្លាំង បើយើងរស់ដោយសារការអនុគ្រោះ​ យើងត្រូវពឹងគេមួយជីវិត។ ប៉ុន្តែបើយើងពង្រឹងខ្លួនឯងដាក់ទិសដៅ ឆ្នាំ ២០៥០ មិនត្រឹមតែចាកចេញពីប្រទេសដែលក្រីក្រ ប្រទេសដែលអភិវឌ្ឍន៍តិចនោះទេ ប៉ុន្តែក្លាយទៅជាប្រទេសអ្នកមានឆ្នាំ ២០៥០ ប្រកួតស្មើគ្នាជាមួយបណ្តាប្រទេសទាំងអស់ នេះគឺជាអ្វីដែលត្រូវធ្វើ»។

ជាមួយគ្នានេះ សម្តេចធិបតី អរគុណចំពោះបណ្តាប្រទេសដែលផ្តល់ជំនួយដល់កម្ពុជាគ្រាដែលប្រទេសមានភាពទន់ខ្សោយ ក្រោយបញ្ចប់សង្គ្រាមរាំរ៉ៃ។ ប៉ុន្តែសម្តេចបន្ថែមថា នេះជាពេលវេលាដែលកម្ពុជាត្រូវពង្រឹងខ្លួនឯង និងអធិបតេយ្យភាពរបស់ខ្លួន។ សម្តេចមានប្រសាសន៍ថា៖«ត្រូវតែចេញមកខ្លួនឯង ពឹងគេរស់នៅមិនកើតទេ ពឹងនៅពេលទន់ខ្សោយ ចេញពីសង្គ្រាមយើងមិនអាចក្លាយទៅជា​ប្រទេសអ្នក​មានទេ យើងត្រូវពឹងគេ ប៉ុន្តែមិនរំពឹងគ្រប់ពេលរហូតនោះទេ។ កម្ពុជាយើងពឹងគេពីទស្សវត្ស ៨០ឬ ៩០ ឥឡូវយើងពឹង​ខ្លួនឯងលើគ្រប់វិស័យ ដែលជាម្ចាស់ការ​របស់យើង»។

គួរជម្រាបថា កម្ពុជា និងប្រទេសចំនួន ៤៥ ផ្សេងទៀតលើពិភពលោកត្រូវបានអង្គការសហប្រជាជាតិ ដាក់បញ្ចូលក្នុងក្រុមប្រទេសអភិវឌ្ឍន៍តិចតួច ឬប្រទេសក្រីក្របំផុតរបស់ពិភពលោក តាំងពី១៩៩១។

បើយោងតាមរបាយការណ៍របស់ធនាគារអភិវឌ្ឍន៍អាស៊ី (ADB) ចេញផ្សាយកាលពីខែមេសា ឆ្នាំ ២០២៤ កម្ពុជា​មានជំហររឹងមាំអាចនឹងឆ្លងផុតពីក្រុមប្រទេសអភិវឌ្ឍន៍តិចតួច ហៅកាត់ថា LDC នៅឆ្នាំ ២០២៧៕
អត្ថបទ៖ ឡាយ សាមាន