តម្លៃដំឡូងជ្វាមានការកើនឡើង ខណៈប្រជាកសិករត្អូញត្អែរពីការប្រមូលផលបានតិចដោយ​សារអាកាសធាតុក្ដៅ

នៅថ្ងៃទី១៣ ខែមិថុនា ឆ្នាំ២០២៤ ប្រជាកសិករដែលនិយមដាំដំឡូងជ្វាខួបរដូវប្រាំង និងរដូវវស្សាបានត្អូញត្អែរថា ឆ្នាំនេះអាកាសធាតុរាំងស្ងួតក្តៅខ្លាំងអស់រយ:ពេលជិតកន្លះឆ្នាំ ដែលធ្វើឲ្យដំឡូងជ្វាពុំសូវបានផល ខណៈឈ្មួញមករកទិញច្រើន និងលក់បានតម្លៃខ្ពស់គួរសមក្នុង១គីឡូក្រាមលក់បាន ២០០០ ទៅ ២៥០០រៀល។

អ្នកស្រី គង អូន រស់នៅក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ជាប្រជាកសិករដាំដំឡូងជ្វាបានឱ្យដឹងថា មួយរយៈពេលចុងក្រោយនេះឃើញមានក្រុមឈ្មួញកណ្ដាលបានចុះមកទិញដល់កន្លែងយកទៅចែកចាយតាមទីផ្សារ ដូចជា កំពត ព្រះសីហនុ និងភ្នំពេញផងដែ។ អ្នកស្រីបន្ថែមថា ទោះបីកន្លងមកដំឡូងជ្វាលក់មិនសូវបានថ្លៃ ក៏ប៉ុន្តែពួកគាត់នៅតែបន្តនាំគ្នាដាំដុះមិនអោយផ្ទៃដីនៅទំនេរនោះឡើយ តែមួយរយ:កាលចុងក្រោយនេះ តម្លៃដំឡូងជ្វាបានកំរើកមានទីផ្សារឡើងវិញ និងឱ្យតម្លៃទៅតាមប្រភេទដំឡូង ដូចជាប្រភេទដំឡូងជ្វាសាច់ក្រហម(ពណ៌ការ៉ុត)ក្នុង១គីឡូក្រាមចាប់ពី២០០០(ពីពាន់រៀល) ទៅ ២៥០០(ពីពាន់ប្រាំរយរៀល)ក្នុងមួយគឺឡូក្រាម ដោយឡែកដំឡូងសាច់ ស ក៏មានតម្លៃប្រហាក់ប្រហែលគ្នាផងដែរ។

ប្រជាកសិកនៅក្នុងភូមិភ្នំលាវ ឃុំពងទឹក ស្រុកដំណាក់ចង្អើរ បានលើកឡើងថា បើទោះបីជារដូវប្រាំងឆ្នាំនេះនៅតាមតំបន់ភូមិសាស្ត្រនានាទូទាំងប្រទេស ពិសេសភូមិសាស្ត្រខេត្តកែប កំពុងជួបគ្រោះរាំងស្ងួត តែបញ្ហាទាំងនេះពុំបានបង្កផលប៉ះពាល់ធ្ងន់ធ្ងរដល់ប្រជាកសិករដែលកំពុងដាំដំណាំដំឡូជ្វានោះឡើយ។ ជាងនេះទៅទៀត ក្រៅពីការដាំដុះដំណាំរួមផ្សំ ប្រជាពលរដ្ឋក្នុងតំបន់ខាងលើ ក៏មិនដែលភ្លេចនូវទំនៀមទំលាប់នៃការចិញ្ចឹមសត្វ ដូចជាគោ ជ្រូក មាន់ ទា សម្រាប់លក់យកកំរ៉ៃ ដែលធ្វើឱ្យគ្រួសារនីមួយៗនៅក្នុងតំបន់បានកាន់តែមានជីវភាពធូរធាបានមួយកម្រិតបន្ថែមទៀតផងដែរ៕

អត្ថបទ៖ សឹង រ៉ាត់