លោក ទូច សុឃៈ៖ ចាប់ពីខែឧសភា មកដល់ពេលនេះសមត្ថកិច្ចបង្ក្រាបក្មេងទំនើងបានជាង៨០០នាក់

អ្នកនាំពាក្យរងក្រសួងមហាផ្ទៃ លោក ទូច សុឃៈ (សុខៈ) បានឱ្យដឹងតាមរយៈសារសំឡេងក្នុងប្រព័ន្ធតេឡេក្រាម នៅព្រឹកថ្ងៃទី១៤ ខែមិថុនា ឆ្នាំ២០២៤នេះថា ចាប់ពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាដាក់បញ្ជាឱ្យបង្ក្រាបក្មេងទំនើងយ៉ាងម៉ឺងម៉ាត់នៅខែឧសភា មកដល់ពេលនេះ សមត្ថកិច្ចឃាត់ខ្លួនក្រុមក្មេងទំនើងបានចំនួន ៨៨៥នាក់។

អ្នកនាំពាក្យរង បានឱ្យដឹងថា បើគិតចាប់ពីថ្ងៃទី២៣ ខែឧសភា ដែលនាយករដ្ឋមន្ត្រីកម្ពុជាដាក់បញ្ជាឱ្យបង្ក្រាបក្រុមក្មេងទំនើងមិនដកដៃ រហូតដល់ថ្ងៃទី១៣ ខែមិថុនា សមត្ថកិច្ចក្រោមចំណុះក្រសួងមហាផ្ទៃបង្ក្រាបក្រុមក្មេងទំនើងបាន ២២៧ករណី ដោយឃាត់ខ្លួនពួកគេបានចំនួន ៨៨៥នាក់។ លោក ទូច សុឃៈ (សុខៈ) បានឱ្យដឹងថា ចំពោះករណីនេះ ភាគច្រើនសមត្ថកិច្ចបានកសាងសំណុំរឿងបញ្ជូនទៅកាន់តុលាការ យោងតាមបទបញ្ជាដ៏អង់អាចរបស់សម្តេចធិបតី ហ៊ុន ម៉ាណែត ​ និងក្រោមការដឹកនាំផ្ទាល់ពី ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា។

លោក ទូច សុឃៈ បានបញ្ជាក់ថា ក្រសួងមហាផ្ទៃបានដាក់ចេញនូវទិសដៅអទិភាព ៦ចំណុច តាំងពីការចាប់ផ្តើមក្នុងអាណត្តិថ្មីនេះ ដោយក្នុងនោះ ក៏មានការបង្ក្រាបក្មេងទំនើង ផងដែរ ពោល គឺធ្វើជាប្រចាំថ្ងៃ ជាបន្តបន្ទាប់ ឱ្យបានល្អនៅក្នុងអាណត្តិនេះ។ លោកបកស្រាយថា ក្រសួងមហាផ្ទៃ គឺអនុវត្តគោលការណ៍នេះជាប់ជានិច្ច មិនធ្វើតែមួយឆាវៗហើយឈប់បង្ក្រាបនោះឡើយ គឺធ្វើជាប្រចាំថ្ងៃ ប្រចាំខែ និងប្រចាំឆ្នាំ ដោយរំលឹកជាប្រចាំដល់អាជ្ញាធរ រួមទាំងពិនិត្យមើលស្ថានភាពគ្រប់ពេល ថាមានការប្រែប្រួលបែបណា ដើម្បីមានការដាក់គោលដៅ និងអនុសាសន៍ថ្មីបន្ថែមទៀត។

លោក ក៏បានលើកឡើងដែរថា ករណីក្មេងទំនើងនេះ គឺមិនអាចលុបបំបាត់១០០% មិនឱ្យមាននោះទេ។ នៅក្នុងពិភពលោកនេះ គឺគ្មាននោះទេដែលមិនមានបទល្មើសសោះ ឬ គ្មានក្រុមក្មេងទំនើងសោះឡើយ លោកថា វាជាធម្មជាតិរបស់មនុស្សជាទូទៅ និងជាធម្មជាតិរបស់សង្គមមួយ ដែលតែងតែមាននូវអំពើអវិជ្ជមាន អសីលធម៌ និងបទល្មើសផ្សេងៗ។ ទោះបីជាយ៉ាងនេះក្តី លោក ទូច សុឃៈ ក៏បានបន្ថែមថា ពាក់ព័ន្ធនឹងបញ្ហានេះ គឺគ្មានអ្វីក្រៅពីទប់ស្កាត់ បង្ក្រាប និងគ្រប់គ្រងស្ថានការណ៍ឱ្យបានល្អ បង្ការការពារកុំឱ្យកើតឡើងហួសប្រមាណ និងហួសពីការគ្រប់គ្រង៕