ស.ស.យ.ក រៀបចំព្រះរាជពិធីចម្រើនព្រះជន្មសម្តេចព្រះមហាក្សត្រី នរោត្តម មុនិនាថ សីហនុ នៅមុខព្រះបរមរាជវាំង

សហភាពសហព័ន្ធយុវជនកម្ពុជា (ស.ស.យ.ក) ក្រោមការដឹកនាំផ្ទាល់ដោយឯកឧត្តម ហ៊ុន ម៉ានី បានរៀបចំព្រះរាជពិធីចម្រើនព្រះជន្មសម្តេចព្រះមហាក្សត្រី នរោត្តម មុនិនាថ សីហនុ គម្រប់ ៨៨ យាងចូល ៨៩ព្រះវស្សា។

ក្នុងឱកាសនៃព្រះរាជពិធីចម្រើនព្រះជន្មសម្ដេចម៉ែ ស.ស.យ.ក បានរៀបចំកម្មវិធីសំខាន់ៗមួយចំនួន ដែលរួមមាន៖ ពិធីក្រាបថ្វាយបង្គំថ្វាយព្រះពរចម្រើនព្រះជន្ម ពិធីចម្រើនព្រះជន្មវស្សា ពិធីចម្រើនព្រះបរិត្ត និងគោចរបិណ្ឌបាត្រ ពិធីសម្ពោធពិព័រណ៍ព្រះបរមឆាយាល័ក្ខណ៍ ពិធីប្រគេនព្រះរាជទាន និងពិធីបញ្ចាំងខ្សែភាពយន្ត ដែលជាព្រះរាជនិពន្ធរបស់ព្រះវររាជបិតាជាតិខ្មែរ។

ជាក់ស្ដែង នាព្រឹកថ្ងៃទី១៥ ខែមិថុនា ឆ្នាំ២០២៤នេះ សហភាពសហព័ន្ធយុវជនកម្ពុជា បានរៀបចំព្រះរាជពិធីថ្វាយព្រះពរចម្រើនព្រះជន្មសម្តេចព្រះមហាក្សត្រី ព្រះវររាជមាតាជាតិខ្មែរ នៅបរិវេណខាងមុខព្រះដំណាក់ចន្ទឆាយា ព្រះបរមរាជវាំង ដោយមានពិធីចម្រើនព្រះបរិត្ត និងគោចរបិណ្ឌបាត្រ។

ការរៀបចំព្រះរាជពិធីនេះ ដើម្បីសម្តែងថ្វាយនូវកតញ្ញូកតវេទីចំពោះព្រះរាជបូជនីយកិច្ចរបស់សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុតនៃប្រជារាស្ត្រខ្មែរ៕