សម្តេចធិបតី បញ្ជាក់មូលហេតុដែលតំបន់បុរីខ្លះពុំទាន់មានទឹក ភ្លើង និងប្រព័ន្ធលូ

នាឱកាសអញ្ជើញ “បើកការដ្ឋានសាងសង់ស្ពានអាកាសភ្លោះ ចំណុចប្រសព្វមហាវិថី សម្តេចតេជោ ហ៊ុន សែន និងផ្លូវជាតិលេខ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល” នៅថ្ងៃទី ១៧ ខែមិថុនា នាយករដ្ឋមន្រ្តី សម្តេចធិបតី ហ៊ុន ម៉ាណែត បានថ្លែងថា ដោយសារតំបន់បុរីមួយចំនួន មានការអភិវឌ្ឍន៍​លឿនលើសការរំពឹងទុក ទើបធ្វើឱ្យបណ្តាញទឹក និងភ្លើង ​របស់រដ្ឋពុំទាន់បានតភ្ជាប់ទៅដល់។

យ៉ាងណាមិញ សម្តេចធិបតី ថ្លែងថា​ ដើម្បីដោះស្រាយបញ្ហាទាំងនោះ គឺរាជរដ្ឋាភិបាលបានដាក់​ចេញនូវដំណោះស្រាយចំពោះមុខ ជាពិសេសព្យាយាមដោះស្រាយឱ្យទាន់តម្រូវការរីកចម្រើន តួយ៉ាងសហការជាមួយវិស័យឯកជនក្នុងការតបណ្តាញទឹក ភ្លើង ជាដើម។
សម្តេចគូសបញ្ជាក់ថា៖« គ្រាន់តែមួយទសវត្សរ៍ក្រោយសង្គ្រាម គ្រាន់តែតំបន់រណបរាជធានីភ្នំពេញ តំបន់បុរី កើនឡើងលឿនណាស់ ដែលរាជរដ្ឋាភិបាលតបណ្តាញប្រព័ន្ធហេដ្ឋារចនាសម្ព័ន្ធអត់ទាន់។ កន្លែងខ្លះឃើញគេបង្ហោះ ធ្វើផ្លូវកាត់លូ ដាក់លូធ្វើផ្លូវ កន្លែងខ្លះដោយសារពេលដែលធ្វើផ្លូវ ធ្វើអគារ​ បុរី លឿនមែនទែន មុននឹងរដ្ឋតភ្ជាប់ប្រព័ន្ធខ្សែកាបយើងមិនទាន់រុញទៅដល់»។

សម្តេចបន្ថែមទៀតថា៖«សូម្បីការសាងសង់បុរីខ្លះលឿន ធ្វើលឿនមុនទាំងបណ្ណប្លង់រឹងមកដល់ផង យើង​ត្រូវតែឆ្លើយតបឱ្យគាត់។ ទឹក ភ្លើង ដាក់អគ្គិសនី ឯកជនសិន ក្រោយមកយើងតភ្ជាប់បណ្តាញជាតិ»។

ការថ្លែងជាសាធារណៈរបស់ សម្តេចធិបតី នាពេលនេះ បន្ទាប់ពីប្រជាពលរដ្ឋដែលកំពុងរស់ក្នុងបុរី នៅរាជធានីភ្នំពេញ ជាញឹកញាប់តែងតែបង្ហោះសារនៅលើបណ្តាញសង្គម ដោយរិះគន់ថា បុរីរបស់ពួក​គេពុំទាន់មានបណ្តាញទឹកស្អាត ភ្លើង និងប្រព័ន្ធលូ របស់រដ្ឋចូលទៅដល់។ ជាមួយគ្នានេះ ពលរដ្ឋដែលរស់នៅខ្វះបណ្តាញទឹកស្អាត និងអគ្គិសនី ស្នើរដ្ឋា​ភិ​បាលពន្លឿនការតភ្ជាប់បណ្តាញរបស់រដ្ឋចូលដល់បុរីឱ្យបានឆាប់រហ័ស ដើម្បីបង្កលក្ខណៈងាយស្រួលដល់ការរស់នៅប្រចាំថ្ងៃ៕

អត្ថបទ៖ ឡាយ​ សាមាន