ព័ត៌មានជាតិ

ដើម្បីបើកសហគ្រាសកម្មន្តសាល ត្រូវមានដំណើរការរៀបចំយ៉ាងណាខ្លះ?

បានផុស

១ សប្តាហ៍ មុន

នៅ

ថ្ងៃចន្ទ ១៧ មិថុនា ២០២៤

ដោយ

កាលពីពេលថ្មីៗនេះនៅក្នុងសិក្ខាសាលាមួយ មន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ បានបង្ហាញពីដំណើរការក្នុងការបើកសហគ្រាសកម្មន្តសាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសិក្ខាសាលាស្តីពី «លើសពីទីផ្សារកម្ពុជា៖ ការនាំយកផលិតផលកម្ពុជាទៅកាន់ទីផ្សារអន្តរជាតិតាមរយៈ Alibaba.com» ដែលរៀបចំឡើងកាលពីថ្ងៃ ២៧ ខែ ឧសភា ឆ្នាំ ២០១៤ មន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ បានធ្វើបទបង្ហាញពីការជំរុញការនាំផលិតផលកម្ពុជាចូលក្នុងទីផ្សារជាតិ និងអន្តរជាតិ ហើយនៅក្នុងសិក្ខាសាលាពេញមួយព្រឹក មន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ ក៏បានលើកឡើងពាក់ព័ន្ធ «ការស្នើសុំច្បាប់អាជីវកម្ម និងបើកដំណើរការសហគ្រាសកម្មន្តសាល»។

មន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ បានបង្ហាញពីដំណើរការក្នុងការបើកសហគ្រាសកម្មន្តសាលជាបន្តបន្ទាប់មានដូចជា៖

-ចុះបញ្ជីពាណិជ្ជកម្ម
-ចុះបញ្ជីពន្ធដារ
-សុំច្បាប់បង្កើតរោងចក្រ សហគ្រាស
-សុំវិញ្ញាបនបត្រអនុញ្ញាតិដំណើរការរោងចក្រ សហគ្រាស
-សុំច្បាប់ផលិត ឬ ចបផ ឬ CS
-យកសំណាកផលិតផលទៅពិនិត្យគុណភាពរៀងរាល់ ៣ ខែម្តង
-ស្នើសុំច្បាប់ផ្សេងទៀតពីក្រសួងស្ថាប័នពាក់ព័ន្ធ

សហគ្រាសធុនតូច និងមធ្យម បានដើរតួនាទីយ៉ាងសំខាន់ក្នុងការជំរុញសេដ្ឋកិច្ចជាតិ។ តាមលទ្ធផលជំរឿនសេដ្ឋកិច្ចពេញលេញរបស់ក្រសួងផែនការនៅឆ្នាំ ២០២២ សហគ្រាសធុនមីក្រូ តូច និងមធ្យម ទាំងក្នុងប្រព័ន្ធនិងក្រៅប្រព័ន្ធនៅកម្ពុជា មានចំនួនប្រមាណ ៧៥៣,៦៧០ មូលដ្ឋាន និងកម្លាំងពលកម្មសរុបមានចំនួន ២.៩៨០.៥៦៩ នាក់។

បើតាមរបាយការណ៍ទទួលបានពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គិតត្រឹមខែតុលា ឆ្នាំ ២០២៣ សហគ្រាសដែលបានចុះបញ្ជីផ្លូវការសរុបមានចំនួន ៤៤,៦២៨ មូលដ្ឋាន។

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ បានកំណត់និយមន័យសហគ្រាសខ្នាតតូច មធ្យមនិងធំ តាមទំហំទុនវិនិយោគ និងចំនួនកម្មករបម្រើការងារ។

-សហគ្រាសខ្នាតមីក្រូ មានទុនវិនិយោគក្រោមទុន ៥ ម៉ឺនដុល្លារ និងមានកម្មករបម្រើការងារក្រោម ៥ នាក់។
-សហគ្រាសខ្នាតតូច មានទុនវិនិយោគចាប់ពី ៥ ម៉ឺនដុល្លារ ទៅ ៥០ ម៉ឺនដុល្លារ និងមានកម្មករបម្រើការងារចាប់ពី ៩ នាក់ដល់ ៤៩ នាក់។
-សហគ្រាសខ្នាតមធ្យម មានទុនវិនិយោគចាប់ពី ៥០ ម៉ឺនដុល្លារ ទៅ ១ លានដុល្លារ និងមានកម្មករបម្រើការងារចាប់ពី ៥០ នាក់ទៅ ១៩៩ នាក់។
-សហគ្រាសខ្នាតធំ មានទុនវិនិយោគលើសពី ១ លានដុល្លារ និងមានកម្មករបម្រើការងារចាប់ពី ២០០ នាក់ឡើងទៅ។

មន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍បានលើកឡើងថា សហគ្រាសនាំចេញនៅក្នុងប្រទេសកម្ពុជា ភាគច្រើនជាសហគ្រាសខ្នាតមធ្យម និងធំ ហើយសហគ្រាសធុនតូចនិងមីក្រូ ភាគច្រើនជាផលិតផលកែច្នៃចំណីអាហារ។ បន្ថែមពីនេះ មន្រ្តីក្រសួងក៏បានលើកឡើងពីបញ្ហាប្រឈមមួយចំនួន សម្រាប់ដំណើរការសហគ្រាសនៅកម្ពុជាមានដូចជា៖

-ការទទួលបានហិរញ្ញប្បទាន
-ការទទួលបានព័ត៌មាន
-ការចូលទីផ្សារ
-ការគាំទ្រផ្នែកច្បាប់ និងគោលនយោបាយគាំទ្រ
-ការប្រកួតប្រជែងមិនស្មើភាព
-សមត្ថភាពផលិត
-ធនធានមនុស្ស និងកម្លាំងពលកម្ម
-វត្ថុធាតុដើម
-ការរចនា និងវេចខ្ចប់
-អនុលោមភាពស្តង់ដាផលិតផលជាដើម

កន្លងទៅនេះ ក្រសួងពាណិជ្ជកម្មកម្ពុជាបានបង្កើតកិច្ចសហការជាមួយក្រុមហ៊ុន Alibaba ក្នុងការចាប់ដៃគ្នាដើម្បីជំរុញការនាំយកផលិតផលកម្ពុជាទីកាន់ទីផ្សារអន្តរជាតិ។

កាលពីថ្ងៃទី ១៧ ខែតុលា ឆ្នាំ២០២៣ ក្នុងអំឡុងចូលរួមវេទិកា “ខ្សែក្រវ៉ាត់មួយ ផ្លូវមួយ» នៅទីក្រុងប៉េកាំង ក្រសួងពាណិជ្ជកម្មកម្ពុជា បានចុះអនុស្សរណៈនៃការយោគយល់គ្នា (MoU) ជាមួយក្រុមហ៊ុន Alibaba ដើម្បីជំរុញការធ្វើពាណិជ្ជកម្មតាមប្រព័ន្ធអេឡិចត្រូនិក សម្រាប់ការនាំចេញផលិតផលខ្មែរទៅកាន់ទីផ្សារចិន និងតភ្ជាប់ទៅទីផ្សារអន្តរជាតិផ្សេងៗទៀត។

លោកស្រី ចម និម្មល រដ្ឋមន្រ្តីក្រសួងពាណិជ្ជកម្មបានថ្លែងពីកិច្ចសហការជាមួយក្រុមហ៊ុន Alibaba នឹងជួយជំរុញកិត្តិនាមផលិតផលកម្ពុជាឲ្យកាន់តែមានភាពប្រកួតប្រជែង និងទទួលស្គាល់ពីគុណភាពស្តង់ដារពីអ្នកប្រើប្រាស់អន្តរជាតិ។

រដ្ឋមន្រ្តីក្រសួងពាណិជ្ជកម្មបានគូសបញ្ជាក់ថា ដើម្បីដាក់លក់និងជំរុញការនាំចេញផលិតផលខ្មែរទៅកាន់ទីផ្សារអន្តរជាតិ ក្រសួងពាណិជ្ជកម្មនឹងសហការជាមួយក្រុមហ៊ុន Alibaba ក្នុងការបើកពន្លាជាតិកម្ពុជានៅក្នុងផ្សារពាណិជ្ជកម្ម Alibaba.com នៅខែកញ្ញាខាងមុខ នៅក្នុងព្រឹត្តិការណ៍អមពិព័រណ៍ចិន-អាស៊ានលើកទី២១ នៅទីក្រុងណាននីង ខេត្តក្វាងស៊ី ប្រទេសចិន និងក្នុងព្រឹត្តការណ៍ពិព័រណ៍ផ្សេងៗទៀត ដើម្បីចូលរួមផ្សព្វផ្សាយផលិតផលកម្ពុជាបន្ថែមទៀត។

ចាប់តាំងពីការចាប់ផ្តើមនៃការអភិវឌ្ឍន៍វិស័យពាណិជ្ជកម្មតាមប្រព័ន្ធអេឡិចត្រូនិកក្នុងឆ្នាំ ២០១៧ ដល់ ឆ្នាំ២០២២ កម្ពុជាក្លាយជាប្រទេសដែលមានការអនុវត្តខ្ពស់ជាងគេ ជាមួយនឹងអត្រានៃការអនុវត្ត ៩២% សម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិក៕

Related Topics:សហគ្រាសក្នុងស្រុក