កម្ពុជាទទួលបានភ្ញៀវទេសចរអន្តរជាតិជាង ២ លាននាក់កើន ២៣%

នៅក្នុងរយៈពេល ៤ ខែឆ្នាំ ២០២៤ គិចាប់ពីខែមរា ដល់ខែមេសា កម្ពុជាទទួលបានភ្ញៀវអន្តរជាតិសរុបចំនួនជាង ២ លាននាក់ (២ ១១៦ ៦០៩) មានការកើនឡើង ២៣ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៣។ នេះបើយោងតាមរបាយការណ៍របស់ក្រសួងទេសចរណ៍។

លោក ខៀវ ធី ប្រធាន​សមាគមមគ្គទេសក៍​​ទេសចរ​អង្គរបានឱ្យដឹងថា កំណើនទេសចរអន្តរជាតិ គឺជាសញ្ញាវិជ្ជមានសម្រាប់វិស័យទេសចរនៅកម្ពុជា។

លោក ខៀវ ធី បន្តថា ​កំណើនទេស​ចរបាន​ជួយទៅដល់ប្រជាជនក្នុងស្រុក ឱ្យមានការងារធ្វើ ​រាប់ចាប់តាំងពីអ្នកបើកបរ ​មគ្គុទេស​ទេសចរ អ្នកលក់ដូរ ​សណ្ឋា​គារផ្ទះសំណាក់ ​ហើយក៏បានផល​ទៅដល់អ្នកដាំដុះ និងចិញ្ចឹម​សត្វផងដែរ។

លោក សុខ សូកេន រដ្ឋមន្រ្តីក្រសួងទេសចរណ៍ ធ្លាប់លើកឡើងថា នៅឆ្នាំ២០២៤នេះ ប្រទេស​ចិន​ឈរនៅលំដាប់ថ្នាក់​ទី៣ ជាប្រទេសដែលមានភ្ញៀវទេសចរមកកម្សាន្តនៅកម្ពុជាក្នុងចំនួនច្រើន ហើយនៅតែបន្តកើនឡើង ក្នុងន័យនេះ អនាគតនៃវិស័យទេសចរណ៍កម្ពុជាគឺមិន​អាចកាត់ផ្តាច់​បានពីការស្រូបទាញកំណើននៃលំហូរទេសចរ និងវិនិយោគិន​ពីចិនបានឡើយ។

បើតាមលោករដ្ឋមន្ត្រី កំណើនទេសចរចិនគឺជាកាលានុវត្តន៍​ដ៏សំខាន់ដែលមិនត្រឹម​តែជំរុញនូវ​ការអភិវឌ្ឍន៍វិស័យទេសច​រណ៍ប៉ណ្ណោះទេ ប៉ុន្តែថែមទាំងបង្កើតនូវឱកាស​វិនិយោគក្នុង​វិស័យផ្សេងៗ ដែលកម្ពុជា និងប្រទេសជាច្រើននៅលើពិភព​លោក បានចាត់ទុកចិនជាដៃគូយុទ្ធសាស្រ្ត​ និងជាប្រភពទីផ្សារដ៏សំខាន់បំផុត​សម្រាប់មូលដ្ឋាននៃកំណើនសេដ្ឋកិច្ច និងការអភិវឌ្ឍន៍ប្រទេសជាតិរបស់ខ្លួន។

យោងតាមក្រសួងទេសចរណ៍ ក្នុងចំណោមទេសចរជាង ២ លាននាក់ ទេសចរថៃឈរនៅ​លំដាប់​លេខរៀងទី ១ មានចំនួន ៥៨៨ ៣១២ នាក់ កើន ៣,២ ភាគរយ វៀតណាមចំនួន ៤១៤ ៣៦៦ នាក់ កើន ៤៣ ភាគរយ ចិន ២៦០ ៤៥៥ កើន ៤១,៥ ភាគរយ ឡាវ ១១៧ ៧២៥ កើន ៤៦ ភាគរយ និងអាមេរិក ចំនួន ៨២ ៨៦២ កើន ២០ ភាគរយ៕

អត្ថបទ៖ ឡេង ដេត