ព័ត៌មានជាតិ

រដ្ឋមន្ត្រីសុខាភិបាល ជំរុញថ្នាក់ដឹកនាំ និងមន្ត្រី ត្រូវពង្រឹងក្រមសីលធម៌ វិជ្ជាជីវៈសុខាភិបាល ឱ្យបានខ្ជាប់ខ្ជួន

បានផុស

២ សប្តាហ៍ មុន

នៅ

ថ្ងៃអង្គារ ១៨ មិថុនា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានជំរុញដល់ថ្នាក់ដឹកនាំក្រសួងសុខាភិបាល អង្គភាពថ្នាក់ជាតិ ក៏ដូចជាគ្រប់មូលដ្ឋានសុខាភិបាលសាធារណៈ ត្រូវយកចិត្តទុកដាក់ប្រុងប្រយ័ត្នខ្ពស់ កុំធ្វេសប្រហែស ត្រូវឆ្លើយតប និងដោះស្រាយបញ្ហាឱ្យបានល្អ ទាន់ពេលវេលា និងត្រូវពង្រឹងក្រមសីលធម៌ វិជ្ជាជីវៈសុខាភិបាល ឱ្យខ្ជាប់ខ្ជួន ដើម្បីលើកម្ពស់គុណភាពផ្តល់សេវាជូនប្រជាពលរដ្ឋកាន់តែល្អប្រសើរថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំកម្រិតថ្នាក់ដឹកនាំលើកទី ២ ខែមិថុនា ដើម្បីពិនិត្យវឌ្ឍនភាពការងារ និងលើកទិសដៅការងារបន្ត កាលពីថ្ងៃទី ១៧ មិថុនា លោករដ្ឋមន្ត្រី ក៏បានណែនាំដល់ថ្នាក់ដឹកនាំ និងមន្ត្រីក្រោមឱវាទ ត្រូវចេះជួយគ្នា សាមគ្គីគ្នា ត្រូវមានទំនាក់ទំនងល្អរវាងបុគ្គល និងបុគ្គល អង្គភាព និងអង្គភាព ចូលរួមដោះស្រាយបញ្ហារួមគ្នា ជាពិសេសនូវកិច្ចការដែលត្រូវធ្វើ ដោយត្រូវយកចិត្តទុកដាក់ក្នុងការចាត់ចែងអនុវត្តឱ្យបានភ្លាមៗ ជៀសវាងការទុកយូរដោយមិនយកទៅអនុវត្ត ហើយត្រូវធ្វើការតាមដានជាប់ជាប្រចាំនូវការងារដែលបានដាក់ឱ្យអនុវត្ត ក៏ដូចជាត្រូវរាយការណ៍ត្រឡប់មកវិញភ្លាមៗ ជាបន្តបន្ទាប់ ពីដើមដល់ចប់។

ជាចុងក្រោយ លោករដ្ឋមន្ត្រី សូមថ្លែងអរគុណដល់ថ្នាក់ដឹកនាំ ទីប្រឹក្សា ថ្នាក់ដឹកនាំអង្គភាពថ្នាក់កណ្តាល និងប្រធានមន្ទីរសុខាភិបាល នៃរដ្ឋបាលរាជធានី-ខេត្ត ព្រមទាំងមន្ត្រីសុខាភិបាលគ្រប់លំដាប់ថ្នាក់ ដែលតែងតែខិតខំក្នុងការបំពេញការងារប្រកបដោយប្រសិទ្ធភាពខ្ពស់ និងបំពេញភារកិច្ចរបស់ខ្លួនប្រកបដោយស្មារតីទទួលខុសត្រូវ ក្នុងកិច្ចការដោះស្រាយបញ្ហានានាជូនប្រជាពលរដ្ឋបានទាន់ពេលវេលា៕

អត្ថបទ ៖ សំអឿន