អភិបាលខេត្តកោះកុង៖ សព្វថ្ងៃខេត្តនេះមានផលិតផលក្នុងស្រុក៤១មុខដែលចាំការទទួលស្គាល់ជាផលិតផលភូមិ១ផលិតផល១

លោកស្រី មិថុនា ភូថង អភិបាលខេត្តកោះកុង បង្ហាញថា ខេត្តមួយនេះមានផលិតផលក្នុងស្រុកសរុបចំនួន៤១មុខ នៅឆ្នាំ២០២៣ ខណៈសព្វថ្ងៃកំពុងរង់ចាំលទ្ធផលការទទួលស្គាល់ពីថ្នាក់ជាតិ ជាផលិតផលភូមិ១ផលិតផល១ខេត្តកោះកុង។

ឆ្នាំ២០២៣ គណៈកម្មាធិការជំរុញចលនាភូមិ១ផលិតផល១ ខេត្តកោះកុង បានប្រមូលចងក្រងផលិតផលខ្មែរដែលមានសក្តានុពលក្នុងខេត្តចំនួន៤១មុខបន្ថែមទៀត ក្នុងនោះទំនិញចំនួន២២មុខ និងសេវាកម្មចំនួន១៩មុខ។ លោកស្រី មិថុនា ភូថង អភិបាលខេត្តកោះកុង បានគូសបញ្ជាក់ល្ងាចថ្ងៃទី១៨ ខែមិថុនា ឆ្នាំ២០២៤ថា មុខផលិតផលទាំងអស់នោះ បានស្នើសុំគណៈកម្មាធិការជាតិជំរុញចលនាភូមិ១ ផលិតផល១ ទទួលស្គាល់ជាផលិតផលភូមិ១ផលិតផល១ខេត្តកោះកុង។ បច្ចុប្បន្នកំពុង រង់ចាំលទ្ធផល នូវការទទួលស្គាល់ពីថ្នាក់ជាតិ ក្នុងការជាប់ជាផលិតផលភូមិ១ផលិតផល១ ខេត្តដូចឆ្នាំ២០២២ផងដែរ។

ក្នុងវេទិកាផ្គូផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុក ក្រោមគម្រោង ការទទួលបានទីផ្សារសម្រាប់អ្នកផលិត ក្នុងស្រុក និងសហគ្រាសធុនមីក្រូ តូច និងមធ្យម (ភូមិ១ផលិតផល១) លោកស្រី មិថុនា ភូថង ថ្លែងអំណអរគុណដល់គណៈ កម្មាធិការជាតិជំរុញចលនាភូមិ១ ផលិតផល១ ដែលបានពិនិត្យ វាយតម្លៃ និងទទួលស្គាល់ផលិតផលខ្មែរដែលមានសក្តានុពលក្នុងខេត្តកោះកុងចំនួន៤៤មុខ ក្នុងនោះ ទំនិញចំនួន៣៣មុខ និងសេវាកម្មចំនួន១១មុខ បានជាប់ជាផលិតផលភូមិ១ផលិតផល១ ខេត្តកោះកុង ក្នុងឆ្នាំ២០២២។

គួរកត់សម្គាល់ថា ការដែលត្រូវបានកំណត់ទទួលស្គាល់ជាផលិតផលភូមិ១ផលិតផល១ គឺផ្អែកលើលក្ខណៈ វិនិច្ឆ័យសំខាន់ចំនួនបួនគឺ៖ ទី១.បានឆ្លើយតបនឹងនិយមន័យផលិតផលភូមិ១ផលិតផល១។ ទី២.មានការកែច្នៃដោយបង្កប់គំនិតច្នៃប្រឌិត ទី៣.មានសក្តាដានុពលពាណិជ្ជកម្ម និងទី៤.គឺមានសារសំខាន់សេដ្ឋកិច្ច សម្រាប់សមូហភាព។

លោក សួង ណយ អនុប្រធានគណៈកម្មាធិការជាតិជំរុញចលនាភូមិ១ផលិតផល១ បានពន្យល់ថា ដើម្បីអ្នកផលិតយល់ដឹងអំពីតម្រូវការទីផ្សារ ការវេចខ្ចប់ សោភណភាព គុណភាព បរិមាណ ស្តង់ដារ អនាម័យ តម្លៃ ផលិតតាមតម្រូវការរបស់អ្នកទិញ។ ពិសេសអ្នកទិញយល់ដឹងអំពីប្រភព និងសមត្ថភាពរបស់អ្នកផលិតក្នុងការវេចខ្ចប់ គុណភាព សោភណភាព បរិមាណ ស្ដង់ដារ អនាម័យ ជាពិសេសតម្លៃ។ លោក បានបន្ថែមទៀតថា ជាក់ស្តែងការរៀបចំវេទិកានាឱកាសនេះឡើង គឺមានគោលបំណងដើម្បីឱ្យអ្នកផលិត និងអ្នកទិញ បានជួបគ្ន និងធ្វើបទបង្ហាញពីផលិតផលរបស់ខ្លួន និងការរកទីផ្សារផលិតផលក្នុងស្រុក ព្រមទាំងការចងក្រង ផលិតករ សេវាករ និងសិប្បករ នៅតាមមូលដ្ឋាន ឱ្យចូលជាសមាជិកចលនា ភូមិ១ផលិតផល១។ ម្យ៉ាងវិញទៀត ការរៀបចំវេទិកានាឱកាសនេះ ក៏មានបំណងជំរុញ ឱ្យអ្នកពាក់ព័ន្ធធ្វើការណែនាំ និងពន្យល់ដល់ប្រជាពលរដ្ឋ និងអ្នកផលិតតាមមូលដ្ឋានឱ្យបានយល់ច្បាស់ បន្ថែមទៀតអំពីសារសំខាន់ និងផលប្រយោជន៍ក្នុងការចូលរួមចលនាភូមិ១ផលិត១ និងធ្វើយ៉ាង ណាជំរុញពួកគាត់ចូលជាសមាជិកចលនានេះ ឱ្យបានទូលំទូលាយ។

រដ្ឋបាលខេត្តកោះកុង ក៏ដូចជាគណៈកម្មាធិការជំរុញចលនាភូមិ១ផលិតផល១ កំពុងគាំទ្រចូលរួមផ្សព្វផ្សាយ និងជំរុញការអនុវត្តចលនា ភូមិ១ផលិតផល១ ឱ្យបានខ្លាំងក្លា ដើម្បីរួមចំណែកអនុវត្តគោលនយោបាយរបស់រាជរដ្ឋាភិបាលឱ្យទទួលបានជោគជ័យ ព្រោះថាវេទិកានេះគឺពិតជា បានរួមចំណែកក្នុងការអនុវត្តយុទ្ធសាស្ត្រជាតិ សម្រាប់ការកាត់បន្ថយភាពក្រីក្រ និងការកៀរគរសក្តានុពលសេដ្ឋកិច្ចក្នុងស្រុកនៃផលិតផល និង សេវាកម្ម ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋាន៕

អត្ថបទ៖ សិរីវឌ្ឍនៈ