រយៈពេល២ថ្ងៃ កម្លាំងកងប្រដាប់អាវុធរាប់ពាន់នាក់ បានចាក់វ៉ាក់សាំងការពារជំងឺកូវីដ១៩

ខេត្តសៀមរាប៖ កងកម្លាំងប្រដាប់អាវុធ ជាច្រើនពាន់នាក់នៅយោធភូមិភាគទី៤ បានទទួលចាក់វ៉ាក់សាំងការពារជំងឺកូវីដ១៩ ដើម្បីបង្ការនិងការពារខ្លួនក្នុងការឆ្លងជំងឺកូវីដ១៩ ។ ការចាក់វ៉ាក់សាំងនៅគោលដៅទី១នេះ ធ្វើឡើងនៅទីបញ្ជាការយោធភូមិភាគទី៤ ស្ថិតនៅស្រុកប្រាសាទបាគង ខេត្ដសៀមរាប ចាប់ពីថ្ងៃទី ២៦ ដល់ថ្ងៃទី ២៧ ខែកុម្ភៈឆ្នាំ២០២១នេះ។

លោក ឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ មានប្រសាសន៍ថា អ្នកដែលទទួលបានវ៉ាក់សាំងការពារពីជំងឺកូវីដ១៩នេះ រួមមានប៉ូលិស កងកម្លាំងយោធា និងកងកម្លាំងកងរាជអាវុធហត្ថ ព្រមទាំងក្រុមគ្រួសារកងទ័ព ដែលចំណុះឱ្យយោធភូមិភាគទី៤ ព្រមទាំងកងកម្លាំងតំបន់ប្រតិបត្ដិការសឹកទាំង៤ខេត្ដរួមមាន សៀមរាប ឧត្ដរមានជ័យ ព្រះវិហារ និងកំពង់ធំ ។

ឯកឧត្ដមបន្ដថា ក្រោយពីបានចាក់វ៉ាក់សាំងការពារជំងឺកូវីដ១៩នេះរួចរាល់ ឯកឧត្ដមមានអារម្មណ៍ធម្មតា ពោលគ្មានប្រតិកម្មជាតិថ្នាំអ្វីនោះទេ ដែលផ្ទុយពីជនអគតិមួយចំនួនដែលលើកឡើងកន្លងមកថា វ៉ាក់សាំងការពារកូវីដ១៩ដែលបានទទួលជំនួយពីចិននេះ មានភាពមិនប្រក្រតី ដែលមានគោលបំណបង្ខូចកិតិយសរាជរដ្ឋាភិបាល។

ឯកឧត្ដមបន្ថែមថា ការចាក់ថ្នាំការពារកូវីដ១៩លើកទី១ នេះនិងបន្ដទៅគោលដៅផ្សេងៗទៀត ដែលស្ថិតនៅទិមុខដែលចំណុះឱ្យយោធភូមិភាគទី៤ទាំងអស់។

យោងតាមរបាយការណ៍របស់ពីបញ្ជាការយោធភូមិភាគទី៤ បានបង្ហាញថា ការចាក់វ៉ាក់សាំងដល់កងកងកម្លាំងប្រដាប់អាវុធ និងគ្រួសារកងទ័ពក្នុងគោលដៅទី១នៅយោធភូមិភាគទី៤ ដែលក្នុងរយៈពេល២ថ្ងៃ ចាប់ពីរសៀលថ្ងៃទី២៦ដល់ថ្ងៃទី២៧ខែកុម្ភៈនេះ បានចំនួនជាង២៤០០នាក់ ក្នុងចំណោមចំនួនសរុបជាង២ម៉ឺននាក់( ២៣,៣៤៦នាក់) ដែលក្នុងនោះកងយោធពលខេមរភូមិន្ទចំនួន២២,០៩៩នាក់ គ្រួសារបញ្ជាការកងអង្គរក្ស៨៩នាក់ នគរបាលព្រំដែន ១១៥៨នាក់៕

អត្ថបទ៖ គឿនវេត

ចុចអាន៖ លោកស្រី ឱ វណ្ណឌីន៖ វ៉ាក់សាំង តែមួយមុខមិនមែនជាដំណោះស្រាយមាសទប់ស្កាត់ការចម្លងកូវីដ-១៩ឡើយ