ព័ត៌មានជាតិ
ភ្ញៀវទេសចរសម្រុកទៅលេងស្រុកសំឡូតអំឡុងពេលប្រមូលផលទុរេន
ស្រុកសំឡូត ជាស្រុកមួយសម្បូរទៅដោយព្រៃភ្នំក្រំថ្ម ច្រលងដងអូរ ដែលជាកន្លែងគួឲ្យគយគន់ ខណៈបច្ចុប្បន្ននេះ
នៅលើទឹកដីស្រុកសំឡូត មានរមនីយដ្ឋានធម្មជាតិ និងរមនីយដ្ឋានធម្មជាតិកែច្នៃច្រើនជាងគេ ក្នុងចំណោមក្រុង-ស្រុក ទាំង១៤នៃខេត្តបាត់ដំបង សម្រាប់បំរើដល់វិស័យទេសចរណ៍ ក្នុងនោះផ្នែកវិស័យកសិកម្ម ក៏សម្បូរបែបផងដែរ ពិសេសស្រុកមួយនេះក៏បានល្បីល្បាញផ្នែកដំណាំទុរេន ដែលមានរសជាតិផ្អែមឆ្ងាញ់ធ្វើឲ្យភ្ញៀវទេសចរក្នុងស្រុកសម្រុកនាំគ្នាទៅ
លេងកម្សាន្ត និងភ្លក្សរសជាតិដ៏ផ្អែមឆ្ងាញ់ក្នុងស្រុកមួយនេះផង។
![](https://www.kampucheathmey.com/wp-content/uploads/2024/06/Screenshot_20240617_144623.jpg)
បើតាមអាជ្ញាធរឃុំសំឡូតចាស់ និងឃុំស៊ុង នៃស្រុកសំឡូត បាននិយាយឲ្យដឹងប្រហាក់ប្រហែលគ្នាថា ស្ទើររាល់ចុងសប្តាហ៍ ភ្ញៀវក្នុងខេត្ត និងតាមបណ្តាខេត្តនានា បាននាំគ្នាមកលេងកម្សាន្តយ៉ាងកុះករ ជាពិសេសនៅក្នុងរដូវកាលកសិករប្រមូលផលផ្លែទុរេន។ ជាក់ស្ដែងកាលពីចុងសប្តាហ៍មុន ក្នុងរយៈពេល២ថ្ងៃ គឺថ្ងៃសៅរ្តិ៍ និងថ្ងៃអាទិត្យ ថ្ងៃទី១៥ និង១៦ មិថុនា គេឃើញមានភ្ញៀវទេសចរក្នុងស្រុកមកច្រើន ខ្លះមកពីតាមបណ្ដាខេត្តនានា តាមរយៈយានយន្តគ្រប់ប្រភេទឆ្ពោះទៅកាន់ស្រុកសំឡូតដែលជាស្រុកមួយល្បីល្បាញថា សម្បូរចម្ការទុរេនដែលមានរសជាតិផ្អែមឈ្ងុយឆ្ងាញ់ និងសម្បូររមណីយដ្ឋានធម្មជាតិ រហូតមានការកកស្ទះចរាចរណ៍ នៅលើដងផ្លូវក្នុងស្រុកផង។
លោក ចំរើន និងគ្នីគ្នាមកពីខេត្តបន្ទាយមានជ័យ បានលើកឡើងថា រាល់ចុងសប្តាហ៍ លោកតែងមកលេងកម្សាន្តក្នុងស្រុកសំឡូត នៅតាមរមនីយដ្ឋានដែលមានទឹកធ្លាក់ មិនដែលខកខាននោះទេ ពិសេសទស្សនាចម្ការទុរេនដ៏ធំល្វឹងល្វើយរបស់កសិករនៅទៅនោះ។ លោកបន្តថា “និយាយទៅ ឲ្យតែដល់រដូវប្រមូលផលផ្លែទុរេន គឺខ្ញុំ និងគ្រួសារមករាល់ចុងសប្តាហ៍ ហើយបើក្រៅពីរដូវប្រមូលផលទុរេន មួយខែខ្ញុំមកលេង២ដង ហើយផ្លែទុរេនឆ្នាំនេះ ខ្ញុំបានទិញផ្ញើអ្នកនៅផ្ទះបាន៤គីឡូក្រាម បើគិតពីតម្លៃ បើតាមខ្ញុំសង្កេត ដូចជាមិនថោកប៉ុន្មានទេ បើពិនិត្យលើបរិមាណនិងគុណភាព“។
![](https://www.kampucheathmey.com/wp-content/uploads/2024/06/Screenshot_20240617_144638.jpg)
ស្រដៀង និងការលើកឡើងពីលោកចំរើន ដែលជាអតិថិជនមកពីខេត្តបន្ទាយមានជ័យជាមួយគ្នា គឺកញ្ញា ចាន់ធូ បានលើកឡើងថា “មិនខុសគ្នាប៉ុន្មានទេ បើនិយាយពីតម្លៃវិញ វាប្រហាក់ប្រហែលគ្នានឹងឆ្នាំមុនដែរ បើផ្អែកលើគុណភាពផ្លែ តែរស់ជាតិនៅតែផ្អែមឆ្ងាញ់ ខ្ញុំទិញតែ២គីឡូក្រាមសម្រាប់យកទៅផ្ទះ“។
បើក្រឡេកទៅលើម្ចាស់ចម្ការនីមួយៗ បានត្អូញត្អែប្រហាក់ប្រហែលគ្នាប្រាប់អ្នកសារព័ត៌មានថា ផ្លែទុរេនឆ្នាំនេះលក់មិនបានថ្លៃទេ ចុះថោកខ្លាំងជាងឆ្នាំមុន ហើយទិន្នផលក៏ប្រមូលបានតិច ដោយសារខ្វះទឹកស្រោចស្រប។ កំពុងថ្លឹងលក់ផ្លែទុរេនឲ្យភ្ញៀវអ្នកស្រី សុម៉ាលី ជាម្ចាស់ចម្ការទុរេនបានថ្លែងថា “អត់បានថ្លៃទេឆ្នាំនេះ ១គីឡូក្រាមលក់បានចន្លោះពី១៥០០០ ទៅ១៨០០០រៀល ហើយឆ្នាំនេះខ្ញុំប្រមូលផលបានតិចជាងឆ្នាំកន្លងទៅ “។
![](https://www.kampucheathmey.com/wp-content/uploads/2024/06/Screenshot_20240617_144652.jpg)
បើតាមមន្ត្រីកសិកម្មខេត្ត លោក ហេង សិទ្ទ បានឲ្យដឹងថា តម្លៃដែលកសិករលើកឡើងនេះ គឺជាតម្លៃសម្រាប់( វ៉ៃអ៊ួ)ថ្លឹងលក់ចម្រុះ ទាំងតូចទាំងផ្លែធំ ចន្លោះពី១៥០០០-១៨០០០រៀល មិនម៉ែនជាតម្លៃជ្រើសទេ។ បើតម្លៃជ្រើសសម្រាប់ឆ្នាំមុន ផ្លែតូច១គីឡូក្រាមតម្លៃចន្លោះពី១៣០០០ ដល់ ១៤០០០រៀល ហើយបើផ្លែធំលក់១គីឡូក្រាមបានចន្លោះពី១៨០០០ដល់២មុឺនរៀល។ លោកថា “បើគិតពីតម្លៃប៉ុណ្នឹងខ្ញុំថាមិនថោកទេ ព្រោះតែទិន្នផលថយគុណភាព ដោយសារតែកត្តារាំងស្ងួតមិនបានផ្តល់ទឹកគ្រប់គ្រាន់ មិនមែនមកពីកត្តាទីផ្សារទេ បើធៀបនឹងប្រទេស មីយ៉ាន់ម៉ា នាំមកលក់នៅកម្ពុជា បាន១មុឺនរៀលប៉ុណ្ណោះ សម្រាប់ផ្លែទុរេន០៣គីឡូក្រាម អ៊ីចឹងស្មើនឹង១គីឡូក្រាមបានតែជាង៣០០០រៀលប៉ុណ្ណោះ ហើយទុរេនពីវៀតណាម ក៏តម្លៃទាបជាងយើងដែរ” ។ លោកបន្តថា សម្រាប់ក្នុងស្រុកសំឡូត មានផ្ទៃដីដាំដុះដំណាំ ទុរេន ចំនួន ៥៤៦ហិកតា ក្នុងនោះផ្ទៃដីប្រមូលផលចំនួន ៤១៤ហិកតា៕
អត្ថបទ៖ សៅ សារិទ្ធ
![](https://www.kampucheathmey.com/wp-content/uploads/2024/06/Screenshot_20240617_144644.jpg)
![](https://www.kampucheathmey.com/wp-content/uploads/2024/06/Screenshot_20240617_144711.jpg)
-
សន្តិសុខសង្គម៥ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
KPT+១ សប្តាហ៍ ago
ប្រវត្តិដ៏គួរឱ្យចាប់អារម្មណ៍របស់ វត្តចំណាស់ទាំង ៧ ក្នុងខេត្តបាត់ដំបង
-
សន្តិសុខសង្គម៥ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៥ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៤ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៤ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+២ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ១ សប្តាហ៍ ago
ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ