សម្ដេចតេជោ ហ៊ុន សែន ប្រកាសចាក់វ៉ាក់សាំង AstraZeneca

ក្រោយក្រសួងសុខាភិបាលជូនដំណឹងរួចមកថា កម្ពុជានឹងទទួលបានវ៉ាក់សាំង អាស្រ្តាហ្សេនីកា (AstraZeneca) ដែលផលិតនៅឥណ្ឌាចំនួន ៣២៤,០០០ដូស សម្ដេចអគ្គមហាសេនាបតីតេជោ ហ៊ុន សែន បានប្រកាសចាក់វ៉ាក់សាំងនេះ បន្ទាប់ពីវាមកដល់កម្ពុជានៅ២ថ្ងៃក្រោយ។

វ៉ាក់សាំង AstraZeneca ចំនួន ៣២៤,០០០ ដូស ជាវ៉ាក់សាំងក្នុងចំណោម ១,១០៤,០០០ដូស ដែលកម្ពុជាត្រូវបានទទួលក្នុងឆមាសទី១ ឆ្នាំ២០២១ ដែលជាជំនួយបថមផ្តល់ដោយមជ្ឈមណ្ឌលកូវ៉ាក់ (COVAX Facility)។

យោងតាមប្រភពពីក្រសួងបានឱ្យដឹងថា ប្រសិនបើពុំមានការប្រែប្រួលទេ វ៉ាក់សាំងនេះនឹងមកដល់កម្ពុជានៅម៉ោង ១៩:៥០ល្ងាច ថ្ងៃទី២ មីនា២០២១។ ក្នុងនោះឯកឧត្តម ម៉ម ប៊ុនហេង នឹងតំណាងឱ្យរាជរដ្ឋាភិបាលកម្ពុជាទទួលយកវ៉ាក់សាំងនេះពីតំណាងអង្គការសុខភាពពិភពលោក និងតំណាងអង្គការយូនីសេហ្វប្រចាំកម្ពុជានៅយប់ថ្ងៃទី២ មីនា២០២១ នៅព្រលានយន្តហោះអន្តរជាតិភ្នំពេញ។

តាមគម្រោងរបស់កូវ៉ាក់នឹងផ្តល់ឱ្យកម្ពុជាចំនួន ២០ភាគរយ នៃចំនួនប្រជាជន១៦លាននាក់ ដែលស្មើនឹង៣លាន២សែននាក់ ឬស្មើនឹងវ៉ាក់សាំងចំនួន ៦លាន៤សែនដូស។

ទន្ទឹមគ្នាដែរ សម្ដេចអគ្គមហាសេនាបតីតេជោ ហ៊ុន សែន បានប្រកាសទទួលចាក់វ៉ាក់សាំង AstraZeneca នៅម៉ោង ៨និង ៣០ នាទីព្រឹកថ្ងៃទី ៤ មីនា ២០២១ នៅមន្ទីរពេទ្យកាល់ម៉ែត្រ ដោយមានការធ្វើសន្និសីទសារព័ត៌មានផងដែរ៕

អត្ថបទ៖ សន្យា