ដំណាំកសិកម្មជាង ១ ម៉ឺនហិកតា កំពុងរងការវាយប្រហារពីសត្វដង្កូវហ្វូង

យ៉ាងហោចណាស់មានផ្ទៃដីដំណាំកសិកម្មប្រមាណជិត ១ ម៉ឺន ៤ ពាន់ហិកតា ស្ថិតនៅក្នុងខេត្ត​ចំនួន ១០ ​កំពុង​​រងផលប៉ះពាល់ និងធ្វើឱ្យខូចខាត​ដោយសារ​ដង្កូវហ្វូង។ ក្នុងចំណោមផ្ទៃដី​កសិកម្ម​​​​ដែលរងការវាយប្រហារពីសត្វដង្កូវហ្វូងមានដំណាំស្រូវ ដំណាំឧស្សាហកម្ម និងដំណាំរួម​ផ្សំផ្សេងៗ​ទៀត។

កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ករណី​ផ្ទុះ​រាល​​ដាល​សត្វដង្កូវហ្វូងនេះ គឺនៅអាចគ្រប់គ្រងបាន មិនមានលក្ខណៈទ្រង់ទ្រាយធំនោះទេ ខណៈ​​មន្ត្រី​ចាប់តាំងពីថ្នាក់ជាតិ និងមូលដ្ឋានកំពុងចុះអន្តរាគមន៍ជួយប្រជាពលរដ្ឋ។

យោងតាមរបាយការណ៍របស់ក្រសួងកសិកម្ម គិតត្រឹមថ្ងៃទី ២០ ខែមិថុនា ឆ្នាំ ២០២៤ ផ្ទៃដីដំ​ណាំ​កសិកម្មដែលមានដំណាំស្រូវ និងដំណាំឧស្សាហកម្មផ្សេងៗ ចំនួន ១,៣ ម៉ឺនហិកតា ស្ថិតក្នុង​ខេត្តចំនួន ១០ ដែលមានខេត្តតាកែវ សៀមរាប កំពង់ធំ ព្រះវិហារ ស្ទឹងត្រែង ត្បូងឃ្មុំ និងខេត្ត​មួយចំនួនទៀត បានរងផលប៉ះពាល់ និងខូចខាតពីការវាយប្រហារសត្វដង្កូវហ្វូង៕

អត្ថបទ៖ ឡេង ដេត