​មាន​ចរាចរណ៍​យានយន្ត​សរុប ៩៧ ៧៩០ ដង ប្រើប្រាស់​ផ្លូវ​ល្បឿនលឿន​ភ្នំពេញ-ក្រុង​ព្រះសីហនុ

របាយការណ៍​លំហូរចរាចរណ៍ប្រចាំសប្តាហ៍របស់​ក្រុមហ៊ុនគ្រប់គ្រង​​ផ្លូវ​ល្បឿនលឿន​ភ្នំពេញ-ខេត្តព្រះសីហនុបាន​បង្ហាញ​ថា គិតចាប់ពីថ្ងៃទី១០ ខែមិថុនា រហូតដល់ ថ្ងៃទី​១៦ ខែ​មិថុនា ឆ្នាំ២០២៤ មាន​ចរាចរណ៍យានយន្ត​សរុបចំនួន ៩៧ ៧៩០ ដង បាន​ប្រើប្រាស់​ផ្លូវ​ល្បឿនលឿន​ភ្នំពេញ-ក្រុង​ព្រះសីហនុ។

​​​នៅក្នុងនោះ​របាយការណ៍​ក៏​បាន​បញ្ជាក់​ដែរថា មាន​អ្នក​ស្វែងរកជំនួយ​សង្គ្រោះ​តាម​ទូរសព្ទ​ចំនួន ២០៥ ខ្សែ (ក្នុង​នោះ​គ្រោះ​ថ្នាក់​ចរាចរណ៍មាន​ ២ ករណី ស្វែងរកជំនួយមាន​ ៧៧ ករណី និងប្រឹក្សាយោបល់​សួរព័ត៌មាន​មាន​ចំនួន ១២៦ ករណី)។

បន្ទាប់ពី​ដាក់​​ឲ្យ​បើកបរសាកល្បងរួមទាំង​ការ​បញ្ចុះ​តម្លៃ​សម្រាប់ការធ្វើ​ដំណើរ​ផង​នោះ ក្រុមហ៊ុន​គ្រប់គ្រង​ផ្លូវ​ល្បឿន​លឿន​ភ្នំពេញ-ក្រុង​ព្រះសីហនុ បានចេញសេចក្តី​​ជូនដំណឹង​​ដល់​អ្នកប្រើប្រាស់​​ផ្លូវ​ល្បឿន​លឿន​ភ្នំពេញ-​ក្រុង​ព្រះសីហនុ ពីការ​ចាប់ផ្តើមគិត​​តម្លៃ​​​ដើមវិញ​​ សម្រាប់ការ​ប្រើប្រាស់​ផ្លូវល្បឿនលឿន​ភ្នំពេញ-ក្រុង​ព្រះសីហនុ​​ចាប់​ពី​ថ្ងៃ ០១ ឧសភា ២០២៤។

​ការ​វិលត្រឡប់​គិត​តម្លៃសេវាធ្វើដំណើរមកតម្លៃដើមវិញ ក្រុមហ៊ុន​​បែងចែកជាដំណាក់កាលនិង​តាមគោលការណ៍​​​ដូចខាងក្រោម៖

១- បន្តរក្សាការបញ្ចុះតម្លៃ ២០% សម្រាប់អតិថិជនដែលប្រើប្រាស់គន្លង ETC និង ANPR រហូតដល់ថ្ងៃទី៣១ ខែតុលា ឆ្នាំ២០២៤ វេលាម៉ោង ២៤:០០ នាទី។ ចាប់ពីថ្ងៃទី១ ខែវិច្ឆិកា ឆ្នាំ​២០២៤ វេលាម៉ោង 00:00 នាទី ថ្លៃសេវាធ្វើដំណើរ​នឹង​ត្រឡប់​មក​តម្លៃ​ដើមវិញ។

២- ចំពោះការទូទាត់ជាសាច់ប្រាក់សុទ្ធ (MTC) នឹងត្រឡប់តម្លៃសេវាធ្វើដំណើរមកតម្លៃដើមវិញចាប់ពីថ្ងៃទី១ ខែឧសភា ឆ្នាំ ២០២៤ វេលាម៉ោង ០០:00 នាទី។

៣- ចាប់ពីថ្ងៃទី០១ ខែមេសា ឆ្នាំ២០២៤ នេះតទៅ សាធារណជនអាចបំពាក់ឧបករណ៍ ETC ដោយឥតគិតថ្លៃដោយគ្រាន់តែបញ្ចូលទឹកប្រាក់ក្នុងគណនីចំនួន ២០ (ម្ភៃដុល្លារអាម៉េរិច)។ សាធារណជនគ្រប់រូបអាចធ្វើការស្នើ​សុំ​ឧបករណ៍ ETC បាននៅតាមអគារ​រដ្ឋបាល​នៅគ្រប់ច្រក​ចូលផ្លូវល្បឿនលឿន និង​មជ្ឈមណ្ឌល​ផ្តល់​សេវាកម្ម​ ETC ដែលមានទីតាំង​នៅខាងស្តាំដៃ​បញ្ជរបង់ប្រាក់ភ្នំពេញ និងក្រុងព្រះសីហនុ។

៤- ការអនុគ្រោះផ្សេងៗសម្រាប់ភ្ញៀវ VIP មិនទទួលផលប៉ះពាល់ពីគោលការណ៍ខាងលើឡើយ ដោយ​ក្រុមហ៊ុននឹងបន្តរក្សា​ការអនុគ្រោះតាម​កិច្ចព្រមព្រៀង​ដែលភាគីទាំងពីរបានចុះហត្ថលេខា។

លោក ផន រឹម មន្រ្តី​អ្នកនាំពាក្យ​ក្រសួង​សាធារណការ​និងដឹកជញ្ជូនបាន​គូស​បញ្ជាក់ថា ការ​វិលត្រឡប់​គិត​តាម​តម្លៃដើមវិញនេះ ប៉ះពាល់​សម្រាប់​តែ​អ្នកប្រើប្រាស់​ដែល​​ទូទាត់ជាសាច់ប្រាក់សុទ្ធ (MTC) ប៉ុណ្ណោះ។

លោក​​លើកទឹកចិត្តឱ្យ​សាធារណជនបំពាក់ឧបករណ៍ ETC ដើម្បីបន្ត​ទទួល​បានការបញ្ចុះតម្លៃលើ​ការ​ប្រើប្រាស់​ផ្លូវ​ល្បឿន​លឿន​ ក៏​ដូចជា​ជួយ​បង្កើនប្រសិទ្ធិភាពចរាចរណ៍​​ និងកាត់បន្ថយការកកស្ទះពេល​ទូទាត់សាច់ប្រាក់នៅទីតាំងបញ្ជរ​បង់ប្រាក់៕