ព័ត៌មានជាតិ

ក្រសួងព័ត៌មាន និង ក្រសួងឧស្សាហកម្ម ចុះអនុស្សរណៈយោគយល់គ្នា ដើម្បីរួមសហការគ្នាផ្សព្វផ្សាយព័ត៌មានពាក់ព័ន្ធ បេសកកម្ម និងគោលនយោបាយរួមតែមួយ

បានផុស

២ ម៉ោង មុន

នៅ

ថ្ងៃសុក្រ ២១ មិថុនា ២០២៤

ដោយ

រដ្ឋមន្ត្រីក្រសួងព័ត៌មាន លោកនេត្រ ភក្ត្រា បានការចុះហត្ថលេខាលើអនុស្សរណៈនៃការយោគយល់គ្នាជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍គឺជាកិច្ចសហប្រតិបត្តិការដ៏សំខាន់មួយស្ថិតក្នុងប្រព័ន្ធ “ ជវភាពនៃប្រព័ន្ធតួអង្គតែមួយ “ ដែលជាគោលការណ៍ដាក់ចុះដោយរាជរដ្ឋាភិបាលកម្ពុជា មានន័យថា ក្រសួង ស្ថាប័ន នៅក្រោមរាជរដ្ឋាភិបាល គឺបំពេញការងារមិនជាន់គ្នានោះទេ ហើយបម្រើឱ្យគ្នាទៅវិញទៅមក ដើម្បីឈានទៅសម្រេចគោលនយោបាយរួមតែមួយរបស់យើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុស្សរណៈដែលក្រសួងទាំងពីរបានចុះហត្ថលេខានាឱកាសនេះ គឺជាការបង្កើននូវកិច្ចសហប្រតិបត្តិការថ្មីមួយ នៅក្នុងចំណោមក្រសួង ស្ថាប័ន ចំណុះរាជរដ្ឋាភិបាល ដើម្បីរួមសហការគ្នាក្នុងការផ្សព្វផ្សាយនូវព័ត៌មានពាក់ព័ន្ធបេសកកម្ម គោលនយោបាយរបស់ក្រសួង សកម្មភាព ផែនការ និងសមិទ្ធផលផ្សេងៗដែលក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សម្រេចបានក្នុងរយៈពេលកន្លងមក ហើយជាការផ្តល់ព័ត៌មានជាប្រចាំដល់ប្រជាពលរដ្ឋបានដឹង។

ក្នុងឱកាសអញ្ជើញចុះហត្ថលេខាលើអនុស្សរណៈនៃការយោគយល់ជាមួយ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅព្រឹកថ្ងៃទី២១ ខែមិថុនា ឆ្នាំ២០២៤ នាសាលចតុម្មុខមង្គលទីស្តីការក្រសួងព័ត៌មាន លោករដ្ឋមន្ត្រី នេត្រ ភក្ត្រា បានគូសបញ្ជាក់ពីសារៈសំខាន់នៃកិច្ចសហប្រតិបត្តិការនៅក្នុងក្របខណ្ឌក្រសួង ស្ថាប័នក្រោមចំណុះរាជរដ្ឋាភិបាល ពិសេសក្នុងការផ្សព្វផ្សាយព័ត៌មាន ព្រោះកន្លងមកមានកិច្ចការងារសំខាន់ៗរបស់រាជរដ្ឋាភិបាល ក្រសួង ស្ថាប័ននានា បានធ្វើច្រើន និងសម្រេចបានសមិទ្ធផលច្រើន តែការផ្សព្វផ្សាយនៅមានកំរិត ដែលធ្វើឱ្យប្រជាពលរដ្ឋទទួលបានព័ត៌មាន ក៏នៅមានកំរិត ហើយពេលខ្លះប្រជាពលរដ្ឋជឿទៅលើការឃោសនា អកុសល ឬការផ្សាយព័ត៌មានដែលមិនត្រឹមត្រូវរបស់ក្រុមជនមួយចំនួន។

ដោយមើលឃើញពីសារៈសំខាន់ដើម្បីផ្សព្វផ្សាយឱ្យប្រជាជនបានដឹង បានឃើញ គឺក្រសួងព័ត៌មាន និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ត្រូវតែចាប់ដៃសហការគ្នាព្រោះក្រសួង ក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ជាក្រសួងមួយដ៏មានសារៈសំខាន់ ដែលបានផ្តោតទៅលើឧស្សាហកម្មរបស់ប្រទេស ផ្តោតលើការសិក្សាស្រាវជ្រាវផ្នែកវិទ្យាសាស្ត្រ ពាក់ព័ន្ធការប្រើប្រាស់ផ្នែកបច្ចេកវិទ្យា និងការបង្កើតថ្មីៗនៅក្នុងក្របខណ្ឌ នវានុវត្តន៍របស់កម្ពុជា។

លោកនេត្រ ភក្ត្រា បានបញ្ជាក់ថា ក្រសួងព័ត៌មាន ពិតជាដើរតួនាទីសំខាន់ក្នុងការជំរុញការប្រើប្រាស់ការសិក្សា ផ្នែកវិទ្យាសាស្ត្រ បច្ចេកវិទ្យា វិស្វកម្ម និងសិល្បៈ ដែលចាំបាច់ត្រូវចូលរួមក្នុងការផ្សាយផ្សព្វតាមប្រព័ន្ធផ្សាយរបស់ជាតិ មានច្រើនប្រព័ន្ធទាំងបុរាណ និងសម័យ។

លោករដ្ឋមន្ត្រី ក្រសួងព័ត៌មាន បានគូសបញ្ជាក់ដែរថា សង្វាក់ផលិតកម្ម ការផលិតនានានៅក្នុងប្រទេសកម្ពុជា បើពិនិត្យមើលនៅលើទីផ្សារឃើញមានផលិតជាច្រើនដែលបានដាក់លក់ ហើយក្នុង នោះផលិតមួយចំនួនធំជាផលិតផលបានផលិតក្នុងប្រទេសកម្ពុជា។ ប៉ុន្តែបងប្អូនប្រជាពលរដ្ឋជាអ្នកប្រើប្រាស់មិនបានដឹងថា សង្វាក់ផលិតកម្ម និងដំណើរការនៃការផលិត ឬក៏ដំណើរនៃការងារដែលនាំអោយចេញនូវផលិតផលទាំងអស់នោះ ថាតើវាមានការវិវឌ្ឍយ៉ាងដូចម្ត៉េច? ទាំងអស់នេះហើយ ដែលលោករដ្ឋមន្ត្រី នេត្រ ភក្ត្រា យល់ឃើញថា ជាកិច្ចការងារមួយដែល ក្រសួងព័ត៌មាន ត្រូវជួយដល់ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ទៅលើការជួយផ្សព្វផ្សាយនូវព័ត៌មានទាំងអស់នេះជូនទៅដល់ប្រជាពលរដ្ឋ ដើម្បីកសាងនូវជំនឿទុកចិត្តបន្ថែមទៀត ទៅលើផលិតផលដែលបានផលិតនៅក្នុងស្រុក ហើយក៏កសាងនូវជំនឿទុកចិត្តទៅលើគុណភាព និងកម្រិតស្តង់ដារផ្សេងៗរាល់ផលិតផលដែលផលិតបាន។

លោក រដ្ឋមន្ត្រី បានលើកឡើងថា យើងតែងតែបានឃើញផលិតផល ដែលផលិតបានហើយបានដាក់លក់នៅលើទីផ្សារ ប៉ុន្តែរូបភាពផ្សេងៗនៅក្នុងរោងចក្រ បើសិនជាមិនមែនជាការសម្ងាត់ ឬភាពជាឯកជនរបស់រោងចក្រនោះទេ រូបភាព មួយចំនួននៃដំណើរការផលិតកម្មគួរតែត្រូវបានផ្សព្វផ្សាយ ដើម្បីឱ្យប្រជាពលរដ្ឋបានដឹង បានឃើញ ហើយក៏ជាការបង្ហាញនូវមោទនភាព ថាប្រទេសកម្ពុជា ជាប្រទេសមួយដែលបានចាកចេញពីប្រទេសដែលមានភាពខ្ទេចខ្ទាំដោយសង្គ្រាម ជាប្រទេសបែកបាក់ តោកយ៉ាក ក្រីក្រពីមុន។ ប៉ុន្តែនាពេលបច្ចុប្បន្ននេះ សេដ្ឋកិច្ចមានការរីកចំរើនខ្លាំង ប្រទេសជាតិមានការអភិវឌ្ឍខ្ពស់ ហើយជាមួយបច្ចេកវិទ្យាដែលយើងធ្លាប់តែឃើញនូវតាមទូរទស្សន៍ និងខ្សែភាពយន្តឯកសាររបស់បរទេស ឃើញពីភាពជឿនលឿនរបស់គេ ក៏ប៉ុន្តែអ្វីៗទាំងអស់នោះក៏មាននៅក្នុងប្រទេសកម្ពុជា នាពេលបច្ចុប្បន្ននេះដែរ។

នៅក្នុងឱកាសនៃពិធីចុះហត្ថលេខានេះដែរ លោក រដ្ឋមន្ត្រី នេត្រ ភក្ត្រា បានជម្រាបជូនថា នៅថ្ងៃទី២២ ខែមិថុនា គឺគ្រប់រយៈពេល ១០ខែ នៃរាជរដ្ឋាភិបាលកម្ពុជាអាណត្តិទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញនូវ ល្បឿនការងារគឺមានសន្ទុះយ៉ាងលឿនដោយសម្រេចបានកិច្ចការងារសំខាន់ៗជាច្រើន។

បើយោងតាមការស្ទង់មតិនាពេលកន្លងទៅនេះ នៅមុនការបង្កើតរដ្ឋាភិបាលអាណត្តិទី៧ ប្រជាពលរដ្ឋបានផ្តល់នូវជំនឿទុកចិត្តលើរដ្ឋាភិបាលចំនួន ៧៧% ។ រយៈពេល ៥ ខែនៅក្នុងអាណត្តិថ្មីនៃរាជរដ្ឋាភិបាលអាណត្តិទី៧ គឺនៅដើមខែមករា ឆ្នាំ២០២៤ ការស្ទង់មតិសាជាថ្មី បានបង្ហាញនូវជំនឿទុកចិត្តរបស់ប្រជាពលរដ្ឋមកលើរាជរដ្ឋាភិបាល គឺកើនឡើងរហូតដល់ ៨២ % ដែលជាការបង្ហាញនូវជំនឿទុកចិត្តរបស់ប្រជាពលរដ្ឋ មកលើការដឹកនាំរបស់អ្នកបន្តវេនជំនាន់ក្រោយ ដែលបានដាក់ចុះនូវគោលនយោបាយដ៏ត្រឹមត្រូវ និងជាក់ស្តែងនិយម។

លោកហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា ការចុះអនុស្សរណៈរវាងក្រសួងទាំងពីរនាឱកាសនេះ បង្ហាពភាពជាដៃគូ ហើយជាជំហានដ៏សំខាន់មួយ នៅក្នុងកិច្ចខិតខំប្រឹងប្រែង រួមរបស់យើងដើម្បីលើកកម្ពស់ការផ្សព្វផ្សាយអំពីអាណត្តិកិច្ចរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលរួមមានដូចជាការ អភិវឌ្ឍវិស័យឧស្សាហកម្ម, សហគ្រាសធុនតូច និងមធ្យម និង សិប្បកម្ម ការផ្គត់ផ្គង់ទឹកស្អាត, វិស័យវិទ្យាសាស្ត្រ បច្ចេកវិទ្យា និងនវានុវត្តន៍, ហេដ្ឋារចនាសម្ព័ន្ធគុណភាពជាតិ និងការអភិវឌ្ឍ សេដ្ឋកិច្ចក្រៅប្រព័ន្ធ រួមទាំងមាតិកាព័ត៌មានទាំងឡាយដែលនឹងផ្តល់ជាសារប្រយោជន៍ដល់ទស្សនិកជនគោលដៅឱ្យបានកាន់តែជ្រួតជ្រាបអំពីសមិទ្ធផល និងកិច្ចខិតខំប្រឹងប្រែងរបស់ក្រសួង និងរាជរដ្ឋាភិបាលនៃនីតិកាលទី៧នេះ។

លោក រដ្ឋមន្ត្រី ហែម វណ្ណឌី បានគូសបញ្ជាក់ថា ភាពជាដៃគូរបស់យើង នឹងផ្តោតលើការងារសំខាន់ បីគឺ៖ ទី១, ការផ្សព្វផ្សាយព័ត៌មានតាមប្រព័ន្ធផ្សព្វផ្សាយរបស់ក្រសួងព័ត៌មាន, កិច្ចសហការក្នុងការផលិតមាតិកាព័ត៌មាន និងការកសាងសមត្ថភាព។ កិច្ចសហការនេះនឹងជួយឱ្យប្រជាជនទទួលបានតថភាពពិត ព័ត៌មានត្រឹមត្រូវ ច្បាស់លាស់ និងគ្រប់ជ្រុងជ្រោយ ដែលនឹងជំរុញវប្បធម៌ចូលរួម នវានុវត្តន៍ និងពន្លឿនវឌ្ឍនភាពរបស់យើង។

ទីពីរ៖ កិច្ចសហប្រតិបត្តិការដើម្បីផលិតមាតិការួមគ្នាដើម្បីនាំមកជូននូវរូបភាព និងការចែករំលែកចំណេះដឹង ចំណេះធ្វើព្រមទាំងនវានុវត្តន៍សំខាន់ទាក់ទងនឹងខ្សែច្រវាក់ផលិតកម្មឧស្សាហកម្ម បច្ចេកវិទ្យាទំនើប បច្ចេកវិទ្យាដែលមានលក្ខណៈសមស្របនឹងទីផ្សារកម្ពុជា គឺជាការងារអាទិភាព។

ទីបី៖ ភាពជាដៃគូរបស់នឹងរួមបញ្ចូលគំនិតផ្តួចផ្តើមកសាងសមត្ថភាពរួមគ្នា ដូចជាការបណ្តុះបណ្តាលជំនាញអ្នកនាំពាក្យ និងវិធីសាស្ត្រគ្រប់គ្រងប្រព័ន្ធផ្សព្វផ្សាយសង្គមជាដើម។ សមត្ថភាពនេះនឹងជួយឱ្យយើងផ្តល់ព័ត៌មានទៅកាន់សាធារណជនបានកាន់តែទូលំទូលាយ និងជំរុញលើកកម្ពស់សង្គម ដែលពលរដ្ឋមានការយល់ដឹង និងមានការចូលរួមខ្ពស់៕