បុរសម្នាក់ ត្រូវសត្វថ្លែនខាំបណ្តាលឱ្យស្លាប់ ក្រោយបញ្ជូនទៅសង្គ្រោះនៅមណ្ឌលសុខភាព

នៅថ្ងៃទី២១ ខែមិថុនា ឆ្នាំ២០២៤ វេលាម៉ោង ០៨៖០០នាទី មានបុរសវ័យចំណាស់ម្នាក់ អាយុ ៥០ឆ្នាំ ត្រូវបានសត្វថ្លែនមួយក្បាលខាំបណ្តាលឱ្យស្លាប់ ក្រោយពីបានដឹកទៅសង្រ្គោះនៅមណ្ឌលសុខភាព។ នេះបើតាមការឱ្យដឹងពី អគ្គស្នងការដ្ឋាននគរបាលជាតិ។

ហេតុការដ៍ចម្លែកមួយនេះ បានកើតឡើងនៅត្រង់ចំណុច ៣៦គ្រួសារ ស្ថិត​នៅក្នុងភូមិពូគង់ ឃុំស្រែព្រះ ស្រុកកែវសីមា ខេត្តមណ្ឌលគិរី។ ជនរងគ្រោះដែលបានស្លាប់ដោយសាសត្វថ្លែនខាំមាន ឈ្មោះ កង អ៊ីន ភេទប្រុស អាយុ ៥០ឆ្នាំ ជនជាតិខ្មែរ សញ្ជាតិខ្មែរ មុខរបរកសិករមានទីកន្លែងកំណើតរស់នៅ ភូមិទឹកយង់ ឃុំកក់ ស្រុកពញាក្រែក ខេត្តកំពង់ចាម។ ទីលំ​នៅបច្ចុប្បន្ន រស់នៅចំណុច ៣៦គ្រួសារ ស្ថិតនៅភូមិស្រែពូគង់ ឃុំស្រែព្រះ ស្រុកកែវសីមា ខេត្តមណ្ឌល​គិរី។

តាមការបំភ្លឺពីប្រពន្ធសពជនរងគ្រោះ​​​​​​​​​​​​​​ ឈ្មោះ សួន មិត អាយុ ៤៧ឆ្នាំ ដែលរស់នៅជាមួយគ្នានៅចំណុចកន្លែងកើត​ហេតុ​ខាងលើ បានបញ្ជក់ប្រាប់សមត្ថកិច្ចថា មូលហេតុដែលប្ដីរបស់គាត់ស្លាប់ នៅមុនពេលកើត​ហេតុ ថ្ងៃទី២០ ខែមិថុនា ឆ្នាំ២០២៤ វេលាម៉ោង ១៩៖០០នាទីយប់គាត់ និងប្តីដែលជាជនរងគ្រោះបានដេកសម្រាកនៅលើផ្ទះរបស់គាត់ និងកូនៗចំនួន ៣នាក់ ទៀតនៅក្នុងមុងជាមួយគ្នា។ លុះដល់ម៉ោង ២៤៖០០ នាទី រំលងអាធ្រាតឈានចូល ថ្ងៃទី២១ ខែ​មិថុ​នា ឆ្នាំ២០២៤ ប្ដីរបស់គាត់បានស្រែកហៅឱ្យគាត់យកកូនៗ របស់គាត់ចេញពីមុងពេលនោះគាត់ស្មានថាប្ដីរបស់គាត់ត្រូវសត្វពស់ចឹកពេលនោះគាត់ក៏រកមើលសត្វពស់ តែរកមើលមិនឃើញ ឃើញតែសត្វថ្លែន ១ក្បាល នៅកន្លែងនោះ។ ភ្លាមនោះបុរសជាដែលជាជនរងគ្រោះគាត់ក៏បានវាយសត្វថ្លែននោះ តែវាយមិនត្រូវសត្វថ្លែននោះក៏បានជ្រុះទៅដីបាត់ទៅ។

ក្រោយពេលដែលថ្លែនសត្វថ្លែននោះ បានខាំក្នុងរយៈប្រហែល ១ម៉ោង ប្ដីរបស់​គាត់មាន អាការៈចុកទ្រូង និងរឹងថ្គាម រហូត​ដល់ម៉ោង ០៣៖០០នាទី ទាបភ្លឺ ប្ដីគាត់មានអាការៈធ្ងន់ធ្ងរទៅៗដោយរឹងថ្គាមនិយាយពុំកើត និងបែកពពុះមាត់ រហូតដល់ម៉ោង ០៥៖០០នាទីព្រឹក ទើបមានអ្នកជិតខាងជួយជូនប្ដីគាត់យកទៅសង្គ្រោះ នៅមណ្ឌលសុខភាពនៅកាបី ឃុំក្រញូងសែនជ័យ ស្រុកស្នួល ខេត្តក្រចេះ រហូត​ដល់ម៉ោង ០៨៖០០នាទី គាត់បានទទួលដំណឹងពី ឈ្មោះ យ៉ង់ លីន ដែលជាអ្នកជូនប្ដីគាត់​ទៅនោះថាប្ដីរបស់គាត់បានស្លាប់បាត់បង់​ជីវិតបាត់ទៅហើយ។

តាមការពិនិត្យលើសាកសពដោយមានការចូលរួមពី លោកវេជ្ជបណ្ឌិត និងកម្លាំងប៉ុស្ដិ៍នគរបាលស្រែព្រះបានធ្វើកោសលវិច្ឆ័យទៅលើដងខ្លួននៃសពជនរងគ្រោះ និងបានសន្និដ្ឋានថា ឈ្មោះ កង អ៊ីន ភេទប្រុស អាយុ ៥០ឆ្នាំ ពិតជាស្លាប់ដោយសារសត្វថ្លែនខាំ ពិតប្រាកដមែន មិនមែនពាក់ព័ន្ធក្នុងអំពើឃាតកម្មឡើយ។ ក្រោយពីបានពិនិត្យទៅលើដងខ្លួនសាកសពចប់សពគ្រប់ រួចមកកម្លាំងសមត្ថកិច្ចបានធ្វើការប្រគល់សាកសពឱ្យទៅ ក្រុមគ្រួសារសពយកទៅធ្វើបុណ្យទៅតាមប្រពៃណី នៅគេហដ្ឋានរបស់ខ្លួន៕