ឯកឧត្ដម ហ៊ុន ម៉ានី ៖ សាសនាឥស្លាម បានរួមចំណែកធានាភាពសុខសាន្ត និងបុព្វហេតុសង្គមជាតិជារួម

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី​ក្រសួង​មុខងារ​សាធារណៈ តំណាង​ដ៏​ខ្ពង់ខ្ពស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​កម្ពុជា និង លោក​ជំទាវ​បណ្ឌិត ពេជ ចន្ទមុន្នី ហ៊ុន ម៉ាណែត គូស​បញ្ជាក់​ថា សាសនា​ឥស្លាម បាន​ចូលរួម​ចំណែក​ក្នុង​ការ​ធានា​នូវ​ភាព​សុខសាន្ត ភាព​សុខដុម នៃ​សង្គម​ការពារ អភិរក្ស វប្បធម៌ ប្រពៃណី និង​បុព្វហេតុ​សង្គមជាតិ​ជា​រួម។

ការ​គូស​បញ្ជាក់​នេះ ក្នុង​ឱកាស ឯកឧត្ដម ហ៊ុន ម៉ានី បាន​អញ្ជើញ​ជា​អធិបតី​ដ៏​ខ្ពង់ខ្ពស់​ក្នុង​ពិធី​សម្ពោធ​វិហារ​ឥស្លាម ម៉ាស្ជិទ​អាល់​អឹក​ពើរ​ជ្រៃ​អណ្តែត ក្នុង​ខេត្ត​កណ្ដាល កាលពី​ថ្ងៃ​ទី ២៣ ខែ​មិថុនា ឆ្នាំ ២០២៤ ម្សិលមិញ។

នា​ឱកាស​នោះ​ដែរ ឯកឧត្ដម ហ៊ុន ម៉ានី បាន​មាន​ប្រសាសន៍​ថា ដោយ​ទទួល​បាន​ការ​អនុញ្ញាត​ដ៏​ខ្ពង់ខ្ពស់ ឯកឧត្ដម មាន​កិត្តិយស​បាន​ចូលរួម​ជា​តំណាង​ដ៏​ខ្ពង់ខ្ពស់ សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង លោកជំទាវ​បណ្ឌិត ពេជ ចន្ទមុន្នី ហ៊ុន ម៉ាណែត ដើម្បី​សម្ពោធ​វិហារ​ឥស្លាម ម៉ាស្ជិទ​អាល់​អឹក​ពើរ​ជ្រៃ​អណ្តែត នៅ​ភូមិ​ព្រែក​តា​ព្រហ្ម ឃុំ​កំពង់​អុស ស្រុក​ពញាឮ ខេត្ត​កណ្ដាល។

ឯកឧត្ដម ហ៊ុន ម៉ានី មាន​ប្រសាសន៍​បន្ត​ថា តាំងពី​ដើម​រៀងមក សាសនា​ឥស្លាម បាន​ចូលរួម​ចំណែក​ជាមួយ​សាសនា​ដទៃ​ទៀត ក្នុង​ការ​ដើរ​តួនាទី​យ៉ាង​សំខាន់​ក្នុង​សង្គម​ខ្មែរ ជាពិសេស​ការ​លើក​កម្ពស់​ការ​អប់រំ​ចរិយា​ធម៌ និង​សីលធម៌ ដល់​ប្រជាពលរដ្ឋ​ដែល​ជា​សាសនិក​ឥស្លាម​គ្រប់រូប។

ឯកឧត្ដម ហ៊ុន ម៉ានី គូស​បញ្ជាក់​ថា «តាមរយៈ​ការ​អប់រំ​ទូន្មាន​ទាំងអស់​ខាង​លើ​នេះ សាសនា​ឥស្លាម ក៏បាន​ចូលរួម​ចំណែក​ក្នុង​ការ​ធានា​នូវ​ភាព​សុខសាន្ត ភាព​សុខដុម នៃ​សង្គម​ការពារ អភិរក្ស វប្បធម៌ ប្រពៃណី និង​បុព្វហេតុ​សង្គមជាតិ​ជា​រួម​ផង​ដែរ»។

ឯកឧត្ដម ហ៊ុន ម៉ានី គូស​បញ្ជាក់​បន្ថែម​ថា ក្នុង​ន័យ​នេះ និង​ជា​បន្តបន្ទាប់ ការ​ពង្រឹង​តួនាទី ភារកិច្ច​របស់​គណៈ​អ៊ី​ម៉ាំ ហា​កឹម តួន និង​ម៉ាស្ជិត ស៊ូរ៉ាវ ព្រមទាំង​សាលា​បង្រៀន​សាសនា ពិត​ជា​មាន​សារៈសំខាន់ និង​មាន​អត្ថប្រយោជន៍​សម្រាប់​ការ​ប្រតិបត្តិ​ជំនឿ​សាសនា និង​ការ​រួម​ចំណែក​ចូលរួម​អភិវឌ្ឍន៍​សហគមន៍​ឥស្លាម និង​សង្គមជាតិ។ ដូច្នេះ​ហើយ​ទើប​ថ្នាក់​ដឹកនាំ​គ្រប់​ជាន់ថ្នាក់ ជា​ពិសេស​រាជរដ្ឋាភិបាល តែងតែ​បង្ក​បរិយាកាស​ល្អ និង​យកចិត្តទុកដាក់​លើក​កម្ពស់​វិស័យ​សាសនា​ឥស្លាម​តាមរយៈ​ការ​ចូលរួម​អភិវឌ្ឍន៍ និង​ជំរុញ​កសាង​ហេដ្ឋារចនាសម្ព័ន្ធ​នានា​ជាច្រើន​សម្រាប់​បម្រើ​សាសនា​ឥស្លាម​ជា​បន្តបន្ទាប់។

ឯកឧត្ដម​ឧបនាយករដ្ឋមន្ត្រី បន្ត​ថា សមិទ្ធផល​ដែល​យើង​ទាំងអស់​គ្នា​មើល​ឃើញ​នា​ពេល​បច្ចុប្បន្ន មិន​អាច​កើត​ឡើង​ដោយ​ឯកឯង​បាន​ទេ បើ​មិន​មាន​ការ​ចូលរួម​ចំណែក​ពី​គ្រប់​ភាគី​ពាក់ព័ន្ធ និង​ការ​ខិតខំ​ប្រឹងប្រែង​របស់​រាជរដ្ឋាភិបាល​ដែល​ដឹកនាំ​ដោយ​គណបក្ស​ប្រជាជន​កម្ពុជា​ដែល​បាន​នាំមក​នូវ​សន្តិភាព និង​ស្ថិរភាព​នយោបាយ​ដូច​ពេលនេះ ដែល​ធានា​ដល់​ការ​អភិវឌ្ឍ​លើ​គ្រប់​វិស័យ​ទាំង​ផ្នែក​សាសនា​ចក្រ និង​អាណាចក្រ។ កត្តា​សន្តិភាព និង​ស្ថិរភាព​នយោបាយ​នេះ​ហើយ ដែល​បាន​ផ្តល់​ឱកាស​ឲ្យ​យើង​ទាំងអស់​គ្នា​បាន​ជួបជុំ​ធ្វើបុណ្យ​រួមគ្នា និង​ប្រមូល​បច្ច័យ​ពី​គ្រប់ទិសទី មក​កសាង​សមិទ្ធផល​នានា​ជាច្រើន ឲ្យ​ចេញ​ជា​រូបរាង​សម្រាប់​បម្រើ​ឲ្យ​ឥស្លាម​សាសនា ដូច​ពេលនេះ។

ឯកឧត្ដម​ឧបនាយករដ្ឋមន្ត្រី បន្ត​ទៀត​ថា ជំនួសមុខ​ឲ្យ សម្ដេច​មហា​បវរ​ធិបតី ហ៊ុន ម៉ាណែត និង លោកជំទាវ​បណ្ឌិត ឯកឧត្ដម សូម​ចូលរួម​អបអរសាទរ​ជាថ្មី​ជាមួយ​សហគមន៍​ឥស្លាម​នៅ​ទូទាំង​ប្រទេស និង​គ្រប់​លំដាប់ថ្នាក់ និង​ប្រជាពលរដ្ឋ​ទាំងអស់ ចំពោះ​សមិទ្ធផល​ថ្មីៗ នានា ជា​បន្តបន្ទាប់ រួម​ទាំង​មាស្ជិត​អាល់​អឹក​ពើរ​ជ្រៃ​អណ្តែត ដ៏​ថ្មីសន្លាង​នេះ។

គួរ​ជម្រាប​ថា ម៉ាស្ជិទ​អាល់​អឹក​ពើរ​ជ្រៃ​អណ្តែត ដែល​ដាក់​សម្ពោធ ម្សិលមិញ​នេះ មាន​ទទឹង ១៨ ម៉ែត្រ បណ្ដោយ ២០ ម៉ែត្រ សាងសង់​នៅ​លើ​ផ្ទៃ​ដី ៩៣១២ ម៉ែត្រ​ការ៉េ ដោយ​បាន​ចាប់ផ្ដើម​កសាង កាលពី​ថ្ងៃ​ទី ៣ ខែ​កក្កដា ឆ្នាំ ២០២២ ជា​ព្រះវិហារ​សាងសង់​ជំនួស​វិហារ​ដែល​មាន​សភាព​ទ្រុឌ​ទ្រោម។

វិហារ​ឥស្លាម ម៉ាស្ជិទ​អាល់​អឹក​ពើរ​ជ្រៃ​អណ្តែត ស្ថិត​ក្នុង​ភូមិ​ព្រែក​តាព្រហ្ម ឃុំ​កំពង់អុស ស្រុក​ពញាឮ ខេត្ត​កណ្ដាល មាន​ប្រជាពលរដ្ឋ​ខ្មែរ-ឥស្លាម រស់នៅ​ជា​អចិន្ត្រៃយ៍ ដែល​ជា​ឥស្លាម​បរិស័ទ ចំណុះ​ឲ្យ​វិហារ​ចំនួន ២១៧ គ្រួសារ ស្មើ​នឹង​ចំនួន​មនុស្ស​សរុប ៨៥១ នាក់ ស្រី ៤៤៣ នាក់៕

អត្ថបទ ៖ ពិសី