ទស្សនកិច្ចរដ្ឋមន្រ្តីការបរទេសថៃមកកម្ពុជា នឹងរិះរកវិធីសាស្ត្រដើម្បីពង្រឹងកិច្ចសហការទ្វេភាគី

តបតាមសំណើររបស់ភាគីកម្ពុជា រដ្ឋមន្ត្រីការបរទសថៃ នឹងអញ្ជើញបំពេញទស្សនកិច្ចផ្លូវការនៅកម្ពុជា ថ្ងៃទី​២៧ ខែមិថុនា ឆ្នាំ ២០២៤ ខាងមុខនេះ ដើម្បីពិភាក្សាការងារ និងពិនិត្យវឌ្ឍនភាពនៃកិច្ចសហប្រតិបត្តិការទ្វេភាគី បន្ទាប់ពីប្រទេសទាំងពីរបានដំឡើងកម្រិតទំនាក់ទំនងទ្វេភាគីទៅជាភាពជាដៃគូយុទ្ធសាស្រ្តកាលពីដើមឆ្នាំ២០២៤។

សេចក្តីប្រកាសព័ត៌មានក្រសួងការបទេស និងសហប្រតិបត្តិការអន្តរជាតិ ចុះថ្ងៃទី ២៤ មិថុនានេះ បានឱ្យដឹងថា ក្នុងអំឡុងពេលទស្សនកិច្ចនេះលោក ម៉ារីត សាងៀមផុង្ស (Maris Sangiampongsa) នឹងចូលជួបសម្តែងការគួរសមដាច់ដោយឡែកជាមួយ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោក ម៉ារីត សាងៀមផុង្ស ក៏នឹងជួបពិភាក្សាទ្វេភាគីជាមួយ ឧបនាយករដ្ឋមន្រ្តី រដ្ឋមន្រ្តីក្រសួងការបរទេសលោក សុខ ចិន្តាសោភា ដែលក្នុងឱកាសនោះរដ្ឋមន្ត្រីការបរទេសទាំងពីរ នឹងផ្លាស់ប្តូរទស្សនអំពី មធ្យោបាយ​នានាដើម្បីពង្រឹងទំនាក់ទំនងទ្វេភាគី ព្រមទាំងរិះរកវិធីសាស្ត្រនានាដើម្បីពង្រីកកិច្ចសហប្រតិបត្តិ​ការ​បន្ទាប់ពីប្រទេសទាំងពីរបានដំឡើង​កម្រិតទំនាក់ទំនងទ្វេភាគីទៅជាភាពជាដៃគូយុទ្ធសាស្ត កាលពីខែកុម្ភៈ ឆ្នាំ២០២៤។ ភាគីទាំងពីរ ក៏រំពឹងនឹងពិភាក្សាលើបញ្ហាតំបន់ និងអន្តរជាតិមួយចំនួនដែលជាប្រយោជន៍និងក្តីកង្វល់រួម។

យោងតាមក្រសួងការបរទេសថៃ ក្នុងដំណើរទស្សនកិច្ចនេះ រដ្ឋមន្រ្តីការបរទេសថៃ នឹងជួបពិភាក្សាទ្វេភាគីជាមួយសមភាគីកម្ពុជា ដើម្បីតាមដានវឌ្ឍនភាពនៃកិច្ចសហប្រតិបត្តិការទ្វេភាគី ក្នុង​នោះ​រួម​បញ្ចូល​ទាំង​ការ​បង្កើន​ទំនាក់ទំនង​ទ្វេភាគី​ទៅ​ជា​ដៃគូ​យុទ្ធសាស្ត្រ ពាណិជ្ជកម្ម និង​ការ​វិនិយោគ ការអភិវឌ្ឍន៍​តំបន់​ព្រំដែន ការងារ អប់រំ និង​កិច្ចសហប្រតិបត្តិការ​អភិវឌ្ឍន៍។ ក្រសួងការបរទេសថៃ ឱ្យដឹងទៀតថា ក្រៅពីមានជំនួបជាមួយថ្នាក់ដឹកនាំកំពូលកម្ពុជា រដ្ឋមន្រ្តីការបរទេសថៃ  ​ក៏​នឹង​ជួប​ជាមួយ​តំណាង​សហគមន៍​ធុរកិច្ច​ថៃ និង​ទីភ្នាក់ងារ​រដ្ឋាភិបាល​ថៃ ក្រោម​ការ​ដឹកនាំ​របស់ Team Thailand នៅ​កម្ពុជាផងដែរ។

គួរជម្រាបថា កម្ពុជា-ថៃ បានឯកភាពដំឡើងកម្រិតទំនាក់ទំនងទ្វេភាគីពី “ការពង្រឹងភាពជាដៃគូដើម្បីសន្ដិភាព និងវិបុលភាព” ទៅជា “ភាពជាដៃគូយុទ្ធសាស្ត្រ”។ ការឯកភាពធ្វើឡើងក្នុងអំឡុងពេល នាយករដ្ឋមន្រ្តីថៃលោក សេដ្ឋា ថាវីស៊ីន (Srettha Thavisin) បានបំពេញទស្សនកិច្ចផ្លូវការ កាលពីខែកុម្ភៈ ឆ្នាំ ២០២៤។

ក្នុងឱកាសនោះ សមភាគីទាំងពីរ បានវាយតម្លៃខ្ពស់លើលទ្ធផលនៃកិច្ចសហប្រតិបត្តិការទ្វេភាគីកន្លងមក និងបានផ្លាស់ប្ដូរយោបល់ពីការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ លើវិស័យជាច្រើន ដែលរួមមាន៖ វិស័យនយោបាយ សេដ្ឋកិច្ច ការពារជាតិ សន្ដិសុខ ពាណិជ្ជកម្ម វិនិយោគ ទេសចរណ៍ ការងារ និងវិស័យថាមពល។ ក្នុងក្របខ័ណ្ឌនៃការពង្រឹងទំនាក់ទំនងនយោបាយ និងការទូត សមភាគីទាំងពីរ បានឯកភាពលើការដំឡើងកម្រិតទំនាក់ទំនងទ្វេភាគី ពី “ការពង្រឹងភាពជាដៃគូដើម្បីសន្ដិភាព និងវិបុលភាព” ទៅជា “ភាពជាដៃគូយុទ្ធសាស្ត្រ” ដើម្បីផលប្រយោជន៍ទៅវិញទៅមក សម្រាប់ជាតិ និងប្រជាជននៃប្រទេសទាំងពីរ។

នាយករដ្ឋមន្រ្តីទាំងពីរ ក៏បានអញ្ជើញចូលរួមជាអធិបតី ក្នុងពិធីចុះ​ហត្ថលេខា​ និងផ្លាស់ប្តូរឯកសារកិច្ចសហប្រតិបត្តិការចំនួន ៥ រួមមាន ១-អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យនៃការកាត់បន្ថយហានិភ័យគ្រោះមហន្តរាយ និងការឆ្លើយតបគ្រោះអាសន្ន រវាងគណៈកម្មាធិការជាតិគ្រប់គ្រងគ្រោះមហន្តរាយកម្ពុជា និងក្រសួងមហាផ្ទៃថៃ។ ២-អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យសិក្សាធិការ វិទ្យាសាស្រ្ត និងបច្ចេកវិទ្យា រវាងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍កម្ពុជា និងក្រសួងឧត្តមសិក្សា វិទ្យាសាស្រ្ត ស្រាវជ្រាវ និងនវានុវត្តន៍ថៃ។ ៣-អនុស្សរណៈនៃការយោគយល់គ្នាស្តីពីទំនិញឆ្លងកាត់ រវាងអគ្គនាយកដ្ឋានគយ និងរដ្ឋាករកម្ពុជា និងនាយកដ្ឋានគយថៃ។ ៤-អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងធនាគារនាំចេញ-នាំចូលថៃ និង ៥-អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងគណៈកម្មាធិការពាណិជ្ជកម្មថៃ ៕ 

អត្ថបទ៖ ឡាយ​ សាមាន