ពលរដ្ឋស្រុងមោងឬស្សី សម្តែងក្តីកង្វល់ជុំវិញសហគ្រាសផ្គត់ផ្គង់ទឹកមិនស្អាត ប៉ះពាល់ដល់សុខភាព

មជ្ឈដ្ឋានប្រើប្រាស់ទឹកស្អាត ក្នុងស្រុកមោងឬស្សី ខេត្តបាត់ដំបង បានរិះគន់ទៅលើសហគ្រាសផ្គត់ផ្គង់ទឹកស្អាតថា ផលិតទឹកពុំមានស្តង់ដាអនាម័យ ធ្វើឱ្យប៉ះពាល់ដល់សុខភាពពលរដ្ឋ ខណៈក្រុមហ៊ុនចែកចាយទឹកស្អាតទទួលស្គាល់ពីភាពខ្វះចន្លោះ ដោយអះអាងថា ខ្វះសម្ភារ ប៉ុន្តែនឹងព្យាយាមកែលម្អឱ្យបានល្អប្រសើរ។

បច្ចុប្បន្ន មានអ្នកប្រើប្រាស់ទឹកស្អាត ក្នុងស្រុកមោងឬស្សី ប្រមាណ ៥ ០០០ ខ្នងផ្ទះ បានសម្តែងក្តីកង្វល់ពីបញ្ហាសុខភាពជុំវិញការប្រើប្រាស់ទឹកពុំមានអនាម័យ ពោលទឹកកង្វក់ និងក្លិនមិនល្អ ដែលផ្គត់ផ្គង់ដោយ សហគ្រាសទឹកស្អាត ផាន់ណារ៉ាមោងឬស្សី។ នេះបើតាមពលរដ្ឋ បានបង្ហោះសារនៅលើបណ្តាញសង្គមថ្មីៗនេះ។
ពលរដ្ឋអះអាងថា៖«ប្រភពទឹកឆៅដែលក្រុមហ៊ុនទឹកស្អាត បានទាញយកមកផលិតជាទឹកស្អាត គឺយកពីក្នុងស្ទឹងមោងឬស្សី ដែលបច្ចុប្បន្នទឹកស្ទឹងស្ថិតនៅក្នុងបាតស្ទឹង និងមានសភាពកង្វក់ ឡើងស្លែ ខៀវ សឹងតែមានក្លិនស្អុយថែមទៀតផង»។
ក្រៅពីផ្គត់ផ្គង់ទឹកមិនស្អាត ពលរដ្ឋដែលរស់នៅតំបន់នោះ ក៏បានធ្វើការរិះគន់ទៅ ពីភាពមិនប្រក្រតីមួយចំនួនពាក់ព័ន្ធ លេខនាឡិកាស្ទង់ទឹកអតិថិជនផងដែរ។

បើតាមការរៀបរាប់របស់អ្នកប្រើប្រាស់ បានលើកឡើងថា ៖«ក្រុមហ៊ុនបានកត់ត្រាលើសលេខកុងទ័ររហូតដល់ជាង ៧០ ម៉ែត្រគូប ទើបមានការតវ៉ា ដូច្នេះហើយទើបក្រុមហ៊ុនកាត់បណ្ដាក់ដើម្បីរំលោះសងម្ចាស់កុងទ័រវិញ»។

បញ្ហាទី ២ អ្នកប្រើប្រាស់ទឹកស្អាត បានលើកឡើងថា ពួកគេបានទូទាត់លុយតាម QR រួចទៅហើយលុះដល់ថ្ងៃដាច់ខែខាងក្រុមហ៊ុនទឹកស្អាតបានយកវិក័យប័ត្រមកដល់ផ្ទះដើម្បីទារលុយម្ដងទៀត។
ជុំវិញបញ្ហាខាងលើនេះ អ្នកស្រី រឿន មុំ ជាម្ចាស់សហគ្រាសទឹកស្អាត ផាន់ណារ៉ា ស្រុកមោងឬស្សី បានថ្លែងប្រាប់នៅថ្ងៃទី ២៤ ខែមិថុនានេះថា សម្រាប់ទឹកស្ទឹងមោងឬស្សី ដែលមានសភាពកង្វក់ និងឡើងស្លែពណ៌ខៀវនោះគឺពិតជាត្រឹមត្រូវ។ ប៉ុន្តែអ្នកស្រីបានពន្យល់ថា ប្រភពទឹកមានតែមួយ គឺស្ទឹងមោងឬស្សី ដូច្នេះគ្មានជម្រើសណាមួយក្រៅពីនេះឡើយ ប៉ុន្តែក្រុមហ៊ុនត្រូវចំណាយទៅលើថ្នាំនិងក្លរីនច្រើន ដើម្បីបម្លែងទឹកឱ្យថ្លាសម្រាប់ប្រើប្រាស់បាន។
អ្នកស្រីទទួលស្គាល់ថា៖« យូរៗម្ដងទឹកមានសភាពកករដីគឺពិតប្រាកដ ប៉ុន្តែក្រុមហ៊ុនរបស់អ្នកស្រីមិនអាចផលិតទឹកឱ្យបានស្អាតដូចនៅទីក្រុងភ្នំពេញឡើយ ព្រោះសម្ភារនិងបរិក្ខារវាខុសគ្នាឆ្ងាយ»។

ចំណែក ការចុះស្រង់លេខនាទិកាស្ទង់លើសចំនួននោះ គឺក្រុមហ៊ុន បានសម្រេចបញ្ឈប់បុគ្គលិកពីការងាររួចហើយដោយសារតែបុគ្គលរូបនេះប្រព្រឹត្តអំពើមិនគប្បីទៅលើអតិថិជន។ អ្នកស្រីថ្លែងថា៖« ក្រុមហ៊ុន បានទូទាត់សងទៅម្ចាស់វិញតាមរយៈការកាត់ថ្លៃប្រើប្រាស់ទឹកប្រចាំខែតទៅមុខរហូតដល់រួចរាល់លុយទាំងអស់នេះ។ ត្រង់ចំណុចដែលថា ការទូទាត់លុយតាម QR រួចហើយតែក្រុមហ៊ុននៅតែទៅទារលុយទៀតនោះគឺអ្នកស្រីបានសំណូមពរឱ្យអតិថិជនដែលប្រើប្រាស់ទឹកស្អាតទាំងអស់ សូមទៅផ្លាស់ប្ដូរឈ្មោះនៅក្រុមហ៊ុនផលិតទឹកស្អាតដើម្បីឱ្យសមស្របទៅនឹងកុងដែលបាញ់លុយតាម QR»៕
អត្ថបទ ៖ សោ និយមរ័ត្ន