ព័ត៌មានជាតិ

ឯកឧត្ដម ហ៊ុន ម៉ានី ថ្លែងសារក្នុងវេទិកា UN Public Service នៅសាធារណរដ្ឋកូរ៉េ

បានផុស

៧ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ ត្រូវបានអញ្ជើញផ្ដល់កិត្តិយសឡើងថ្លែងសារជូនដល់ថ្នាក់ដឹកនាំមកពីបណ្ដាប្រទេសផ្សេងៗ និងអង្គពិធីទាំងមូល ក្នុងវេទិកា UN Public Service នៅសាធារណរដ្ឋកូរ៉េ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេទិកាសាធារណៈ និងពិធីប្រគល់ពានរង្វាន់របស់អង្គការសហប្រជាជាតិ បានចាប់ផ្ដើមជាផ្លូវការ កាលពីព្រឹកថ្ងៃទី ២៤ ខែមិថុនា ឆ្នាំ ២០២៤ ដោយពិធីបើកបានប្រព្រឹត្តដោយអនុសាសន៍ស្វាគមន៍យ៉ាងកក់ក្ដៅពីសំណាក់ រដ្ឋមន្ត្រីក្រសួងមហាផ្ទៃ និងសុវត្ថិភាព នៃសាធារណរដ្ឋកូរ៉េ និងអគ្គលេខាធិការរងសម្រាប់កិច្ចការសេដ្ឋកិច្ច និងសង្គម របស់អង្គការសហប្រជាជាតិ ព្រមទាំងមានការចូលរួមថ្លែងសុន្ទរកថាគន្លឹះដោយ ឯកឧត្ដម បាន គីម៉ូន (Ban Ki-moon) អតីតអគ្គលេខាធិការ នៃអង្គការសហប្រជាជាតិ។

ទន្ទឹមនេះ នាឱកាស នៃពិធីទទួលទានអាហារល្ងាច ក្នុងថ្ងៃដដែល ឯកឧត្ដម ហ៊ុន ម៉ានី ត្រូវបានអញ្ជើញផ្ដល់កិត្តិយសឡើងថ្លែងសារជូនដល់ថ្នាក់ដឹកនាំមកពីបណ្ដាប្រទេសផ្សេងៗ និងអង្គពិធីទាំងមូល។ មានប្រសាសន៍ជូនដល់ប្រតិភូអន្តរជាតិទាំងអស់ដែលបានចូលរួមក្នុងវេទិកាសាធារណៈរបស់អង្គការសហប្រជាជាតិ ឯកឧត្ដម ហ៊ុន ម៉ានី បានលើកឡើងថា តាមរយៈការចូលរួមក្នុងការប្រជុំ និងកម្មវិធីអមនានា ប្រតិភូកម្ពុជា ទទួលបានធាតុចូលជាច្រើន ក៏ដូចជាបានចូលរួមពិភាក្សាបំផុសគំនិត ស្វែងរកវិធីសាស្ត្រប្រកបដោយភាពច្នៃប្រឌិត និងនវានុវត្តន៍ ហើយចែករំលែកចំណេះដឹង បទពិសោធទាំងនោះ ជូនគ្នាទៅវិញទៅមក។

ជាមួយនេះ ឯកឧត្ដមឧបនាយករដ្ឋមន្ត្រី បានបន្ថែមដោយបានលើកទឹកចិត្តដល់អ្នកចូលរួមក្នុងវេទិកាទាំងមូលឲ្យប្រើប្រាស់វេទិកានេះ ឲ្យអស់ពីលទ្ធភាពក្នុងការចែករំលែក និងសិក្សារៀនសូត្រ ដកស្រង់បទពិសោធពីគ្នាទៅវិញទៅមក ក្នុងគោលដៅអភិវឌ្ឍន៍ឧត្ដមភាពកិច្ចការសេវាសាធារណៈឲ្យបានកាន់តែប្រសើរ។

សូមជម្រាបថា វេទិកា UN Public Service ត្រូវបានរៀបចំឡើងរយៈពេល ៣ ថ្ងៃ ដោយមានជាសិក្ខាសាលាផ្សេងៗ ពាក់ព័ន្ធនឹងវិស័យមុខងារសាធារណៈ និងការងារកែទម្រង់រដ្ឋបាលសាធារណៈ ក្រោមប្រធានបទ “ការជំរុញនវានុវត្តន៍ក្នុងពេលមានបញ្ហាប្រឈមសកល ៖ ទស្សនវិស័យរបស់វិស័យសាធារណៈ” (Fostering Innovation amid Global Challenges: a Public Sector Perspective)៕